Зубко Антоній (Антоній Рыгоравіч) нарадзіўся 2 ліпеня 1797 года ў в. Белае Полацкага павета Віцебскай губерні ў сям'і ўніяцкага святара, рэлігійны дзеяч, магістр багаслоўя (1822).

Скончыў Полацкую езуіцкую акадэмію са ступенню кандыдата філасофіі. У 1822 годзе – семінарыю пры Віленскім універсітэце. Выкладаў у Полацкай семінарыі логіку, рыторыку, царкоўную і ўсеагульную гісторыю, маральнае багаслоўе. У 1824 годзе – святар Полацкага ўніяцкага кафедральнага сабора. У 1828 годзе – першы рэктар заснаванай ім Жыровіцкай семінарыі. У 1833 годзе – епіскап брэсцкі, вікарый Літоўскай уніяцкай епархіі.

Блізка пазнаёміўшыся з І. Сямашкам, стаў яго прыхільнікам і дзейсным памочнікам па далучэнні ўніятаў да праваслаўя. На Полацкім царкоўным саборы ў 1839 годзе падпісаў акт аб аб'яднанні ўніяцкай царквы з праваслаўнай. У 1840 годзе – архіепіскап.

У канцы жыцця пасяліўся ў Жыровіцкім Свята-Успенскім мужчынскім манастыры, дзе і памёр 12 лютага 1884 года.

Аўтар гістарычнай працы «Аб грэка-ўніяцкай царкве ў Заходнім краі» (1864).

ЛІТАРАТУРА

1. Зубко Антоній // Памяць: Полацкі раён : гісторыка-дакументальныя хронікі гарадоў і раёнаў Беларусі / рэдкал.: І. Б. Каросцік, Р. І. Маслоўскі, А. Л. Петрашкевіч ; уклад. С. С. Чарняўская ; мастак Э. Э. Жакевіч. – Мінск : Вышэйшая школа, 1999. – С. 641.

2. Зубко Антоній // Энцыклапедыя гісторыі Беларусі : у 6 т. / рэдкал.: Г. П. Пашкоў [і інш.] ; маст. Э. Э. Жакевіч. – Мінск : БелЭн, 1996. – Т. 3 : Гімназіі–Кадэнцыя. – С. 454.

3. Шушкевіч, А. Архіепіскап Антоній / А. Шушкевіч // Лепельскі край. – 2004. – 10 жн. – С. 2.