Школа мастацтваў, ДУА. Лепельскі раён, г. Лепель

Подробности

Створана 02.05.2019 08:40

Адноўлена 30.03.2020 10:04

1 верасня 1958 года ў Лепелі пачала працаваць музычная школа. Яе філіял знаходзіўся ў п. Заслонава. Спачатку ў школе займаліся 60 чалавек.

У студзені 1959 года дырэктарам школы быў зацверджаны А. М. Палонскі, які працаваў на гэтай пасадзе больш за 20 гадоў.

Першымі настаўнікамі былі: Станіслаў Капульцэвіч, Эльвіра Хадорчанка, Людміла Кавалеўская, Віктар Колас, Віктар Комлеў і Мікола Глушко.

Навучанне праводзілася па дзвюх спецыяльнасцях: фартэпіяна і баян.

Першы выпуск 14 вучняў адбыўся ў 1963 годзе.

У 1965 годзе адкрыўся другі філіял школы ў вёсцы Бароўка.

Пазней былі адкрыты новыя аддзяленні і класы: домра, балалайка, скрыпка, гітара, цымбалы, труба і іншыя.

У студзені 1986 года школа пераехала ў другое памяшканне.

У 1988 годзе быў праведзены першы набор па класе харэаграфіі.

У 1989 годзе з'явіліся мастацкае і тэатральнае аддзяленні. Дзіцячая мастацкая школа была пераўтварана ў школу мастацтваў.

У студзені 1992 года школе быў перададзены будынак былога райкама партыі. У гэты час у школе налічвалася 336 навучэнцаў і 35 выкладчыкаў.

З 1983 года дырэктарам школы быў Б. П. Кавалеўскі.

У 1993 годзе Лепельская школа мастацтваў атрымала статус прафарыентаванай школы. Навучальны працэс адбываўся па двух накірунках: па прафарыентацыі і агульнаэстэтычным навучанні.

У 1989 годзе філіялы ў пасёлках Бароўка і Заслонава сталі самастойнымі школамі мастацтваў.

У яе складзе акрамя згаданых філіялаў дзейнічалі музычныя класы ў вёсках Пышна, Лядна і Вялікім Поўсвіжы. Паспяхова працуюць аддзяленні па музычнай, тэатральнай і харэаграфічнай накіраванасці.

У 2007 годзе Лепельская дзіцячая школа мастацтваў была прызнана лепшай у вобласці і за апошнія гады атрымала два гранты Прэзідэнта Рэспублікі Беларусь па падтрымцы таленавітай і адоранай моладзі.

У 2018 годзе ў школе займалася 844 дзіцяці ва ўзросце ад 3 да 17 гадоў.

На базе школы паспяхова працуюць 26 творчых калектываў, у тым ліку адзін народны (інструментальны ансамль «Сустрэча»), чатыры ўзорныя (два з іх – харэаграфічныя: «Зачаравашкі» і «Задума») і заслужаны аматарскі фальклорны калектыў Рэспублікі Беларусь «Сунічкі» (месціцца ў аг. Стаі) – адзіны ў краіне сельскі фальклорны калектыў, які носіць званне заслужанага.

Зараз дырэктарам працуе Вераніка Аляксандраўна Хамбак. Яна перамагла ў Рэспубліканскім конкурсе «Чалавек года ў сферы культуры 2017 года» ў намінацыі «Народная творчасць». У 2017 годзе яе ўзнагародзілі Ганаровай граматай Савета Міністраў Рэспублікі Беларусь за плённую працу, высокі прафесіяналізм і значны ўклад у развіццё беларускай культуры.

Сярод выпускнікоў – артысты тэатраў, абласных філармоній, мастакі, выкладчыкі музычных вучылішч і школ.

Адрас: Віцебская вобласць, Лепельскі раён, г. Лепель, пл. Свабоды, 9.

ЛІТАРАТУРА

1. Алимова, Е. Под сенью муз / Е. Алимова // Витебские вести. – 2018. – 5 мая. – С. 9.

2. Літвін, Э. М. Школа мастацтваў / Э. М. Літвін // Памяць: Лепельскі раён : гісторыка-дакументальныя хронікі гарадоў і раёнаў Беларусі / рэдкал.: Л. В. Лакініна [і інш.] ; уклад.: В. Я. Ланікіна, А. У. Стэльмах ; мастак Э. Э. Жакевіч. – Мінск : Беларусь, 1999. – С. 589–590.

3. Николаев, Е. Созвездие талантов / Е. Николаев // Лепельскі край. – 2018. – 11 мая. – С. 12.

4. Палонскі, А. Лепельскай музычнай школе – 40 гадоў / А. Палонскі // Лепельскі край. – 1998. – 20 кастр. – С. 2.

5. Сільвановіч, С. Нібыта крылы за спіной, узнікне музыка мая... / С. Сільвановіч // Лепельскі край. – 2016. – 15 сак. – С. 2.

6. Телятко, Е. Обвиняются... в таланте! / Е. Телятко // Віцебскі рабочы. – 2008. – 9 дек. – С. 5.с