
«Дабрадзеі»: чароўнае падарожжа да дабрыні
- Details
- Створана 17.09.2026 12:14
Асаблівы падарунак сваім чытачам з нагоды прафесійнага свята падрыхтавалі супрацоўнікі агульнай чытальнай залы. Прэм'ера батлеечнага спектакля «Дабрадзеі» адбылася 15 верасня.
Новая пастаноўка стала вынікам некалькіх месяцаў творчай работы калектыву: бібліятэкары самі распрацоўвалі сцэнарый на беларускай мове, шылі і майстравалі лялек, прадумвалі дэкарацыі, падбіралі музычнае афармленне. Таксама было вырашана дадаць у сюжэт інтэрактыў, каб гледачы сталі часткай тэатральнага дзеяння.
Першымі гасцямі прэм'еры сталі школьнікі сярэдняй школы № 2 г. Віцебска імя Ф. Ц. Блахіна. Юныя гледачы адправіліся ў павучальнае і вясёлае падарожжа разам з мудрай Козачкай, працавітым Каласком, шчырай Бульбачкай і хітрай Ліскай.
У цэнтры сюжэту – Саўка-манюка, якому нашы маленькія гледачы дапамагаюць пераадолець шкодныя звычкі. Рабяты актыўна ўдзельнічалі ў дзеянні: разгадвалі загадкі, спаборнічалі ў конкурсах, танчылі. Такія пастаноўкі не толькі забаўляюць, але і далучаюць дзяцей да роднай мовы, дапамагаюць адчуць прыгажосць і багацце беларускай культуры, фальклору і традыцый.
Прэм'ера «Дабрадзеі» – чарговы этап цікавага шляху ў развіцці батлеечнага тэатра ў абласной бібліятэцы. Наперадзе яшчэ шмат цёплых, пазнавальных і творчых сустрэч, якія дапамогуць дзецям палюбіць кнігу і зразумець, што сапраўдная сіла – у добрых справах.


































