
«Радасць слова: кніжныя рэдкасці з калекцыі Віцебскай духоўнай семінарыі»
- Details
- Створана 17.09.2026 13:49
Прэзентацыя выставы кніжных рарытэтаў са збору царкоўна-археалагічнага кабінета Віцебскай духоўнай семінарыі адбылася 15 верасня ў выставачнай зале «Ex Libris».
Адкрыццё выставы «Радасць слова» стала яскравай падзеяй у праграме святочных мерапрыемстваў, прысвечаных святкаванню Дня бібліятэк Беларусі.
У экспазіцыі выставачнай залы «Ex Libris» прадстаўлена 28 рэдкіх старадрукаваных і кірылічных выданняў ХІХ – сярэдзіны ХХ стагоддзя. Сярод кніжных рарытэтаў – фрагмент старадрукаванага «Четвероевангелия» (1725) і «Каноник» (1739), рукапісная «Псалтирь» ХІХ стагоддзя і помнік стараабрадніцкага кнігадрукавання ў Расіі – раскошнае выданне «Апокалипсиса трехтолкового» (1913) Андрэя Кесарыйскага і др. Кожная кніга – артэфакт, які прадстаўляе розныя эпохі гісторыі Рускай Праваслаўнай Царквы і айчыннай культуры.
Адкрыла выставу дырэктар Віцебскай абласной бібліятэкі Таццяна Адамян, якая адзначыла культурную каштоўнасць прадстаўленых выданняў і падзякавала Віцебскай духоўнай семінарыі за супрацоўніцтва на ніве духоўнай асветы і магчымасць пазнаёміць жыхароў горада з кніжнымі жамчужынамі са збору царкоўнага археалагічнага кабінета.
На прэзентацыі прысутнічалі студэнты Віцебскай духоўнай семінарыі разам з першым прарэктарам протаіерэем Канстанцінам Ізафатавым і прарэктарам па выхаваўчай рабоце іерэем Дзіянісіем Андрэевым, навучэнцы Віцебскага кадэцкага вучылішча, чытачы і супрацоўнікі бібліятэкі.
У завяршэнні прэзентацыі айцец Дзіянісій правёў займальную экскурсію па экспазіцыі, адказаў на пытанні прысутных.
Выстава «Радасць слова: кніжныя рэдкасці з калекцыі Віцебскай духоўнай семінарыі» будзе экспанавацца ў выставачнай зале «Ex Libris» па 20 кастрычніка 2026 года.


































