
Інфармацыйна-адукацыйнае мерапрыемства «Тэрыторыя ведаў»
- Details
- Створана 17.09.2026 16:21
Інфармацыйна-адукацыйнае мерапрыемства «Тэрыторыя ведаў» для студэнтаў першага курса кафедры правазнаўства і сацыяльна-гуманітарных дысцыплін Віцебскага філіяла Міжнароднага ўніверсітэта «МІПСА» адбылося ў бібліятэцы 15 верасня.
Сустрэча дапамагла будучым юрыстам асвоіць сучасныя інструменты для пошуку прававой інфармацыі і глыбей акунуцца ў тонкасці беларускага заканадаўства.
У час экскурсіі першакурснікі дэталёва азнаёміліся з магчымасцямі аддзела прававой інфармацыі і электронных рэсурсаў. Студэнтам прадэманстравалі шырокі спектр лічбавых баз даных, якія стануць іх галоўнымі памочнікамі ў вучобе і будучай даследчай дзейнасці. Каб замацаваць новыя веды ў гульнявой форме, для рабят правялі інтэрактыўную віктарыну «Вакол права». Першакурснікі актыўна ўключыліся ў спаборніцтва, прадэманстраваўшы выдатную эрудыцыю і базавую прававую граматнасць.
Важнай часткай сустрэчы стала выступленне спецыяліста Рэгіянальнага цэнтра прававой інфармацыі Віцебскай вобласці Юліі Дзірко. Яна падрабязна расказала студэнтам аб рабоце дзяржаўных інфармацыйна-прававых рэсурсаў НЦЗПІ Рэспублікі Беларусь і растлумачыла, як эфектыўна выкарыстоўваць іх для аналізу нарматыўных актаў.
Напрыканцы сустрэчы Юлія Мікалаеўна павіншавала будучых юрыстаў з надыходзячым Днём народнага адзінства. Яна падкрэсліла, што гэтае свята сімвалізуе жывую памяць аб мінулым, гонар за дасягненні сучаснай Беларусі і асабісты ўклад кожнага грамадзяніна ў будучыню краіны.


































