Цэнтральная раённая бібліятэка, ДУК. Пастаўскі раён, г. Паставы
- Подробности
- Створана 18.04.2017 08:40
- Адноўлена 06.04.2020 12:39
Пастаўская раённая бібліятэка была адкрыта ў 1939 г. На пасаду загадчыка бібліятэкай быў накіраваны Фёдараў Уладзімір Пятровіч.
У гады Вялікай Айчыннай вайны бібліятэка была зачынена, кніжны фонд быў разрабаваны і знішчаны. Пасля вызвалення тэрыторыі нашага раёна ад нямецка-фашысцкіх захопнікаў бібліятэка пачала працаваць у красавіку 1945 г.
Першымі работнікамі былі камсамольцы: Казанскі і Бароўка (імёны не захаваліся). 30 ліпеня 1945 г. згодна з загадам Пастаўскага райкультасветаддзела бібліятэку зноў узначаліў У. П. Фёдараў. Вельмі цяжка было пачынаць працаваць ва ўмовах пасляваеннай разрухі, але ўжо ў 1945 г. пад бібліятэку былі аддадзены 2 пакоі, быў сабраны фонд у колькасці 1100 экз. Калі першапачатковая лічба чытачоў складала – 32, то ў 1946 г. – 370 чалавек, а кніжны фонд – 2069 тамоў. Шмат працы і энергіі было аддана У. П. Фёдаравым для прыцягнення чытачоў, павелічэння кнігавыдачы, паляпшэння матэрыяльнай базы. У сваіх успамінах Уладзімір Пятровіч казаў: «Першай маёй задачай было прывесці ў добры выгляд памяшканне, набыць патрэбную мэблю і павялічыць кніжны фонд. Для гэтага мы арганізавалі збор кніг сярод насельніцтва горада».
У ліку першых бібліятэкараў была Асяненка Галіна Віктараўна.
За актыўную працу ў 1947–1949 гг. бібліятэцы двойчы ўручаўся пераходны сцяг камітэта па справах культурна-асветніцкіх устаноў пры Савеце Міністраў БССР.
Пачынаючы з 1949 г., пры бібліятэцы арганізоўваецца сетка перасовак, якія абслугоўвалі ўвесь раён. У 1953 г. памяшканне бібліятэкі было пашырана. У той жа час была адчынена чытальная зала, пачаў дзейнічаць міжбібліятэчны абанемент.
У 1967 г. бібліятэка ўзнагароджана дыпломам 3 ступені Міністэрства культуры БССР і дыпломам 2 ступені Віцебскага ўпраўлення культуры.
У 1968 г. колькасць чытачоў склала 3975 чалавек, з іх: працоўныя – 760, служачыя – 1760, навучэнцы – 245. У шмат разоў павялічылася кнігавыдача галіновай літаратуры, так, калі ў 1946 г. кнігавыдача грамадска-палітычнай літаратуры складала – 785 экз., то ў 1968 г. – 16449 экз.; тэхнічнай – 452 і 2345; прыродазнаўчай – 561 і 2125.
Вялікая ўвага надавалася індывідуальнай рабоце з чытачамі, складаліся індывідуальныя планы чытання.
У 1968 г. праведзена 6 чытацкіх канферэнцый, 5 літаратурна-тэматычных вечароў.
З развіццём завочнага навучання бібліятэка стала цэнтрам дапамогі навучэнцам, тут яны маглі атрымаць матэрыял для вучобы, 80 чытачоў карысталіся паслугамі МБА.
Калі ў першыя гады ў бібліятэцы працавала 3 чалавекі, то ў 1968 г. – 5, усе мелі сярэднюю адукацыю.
Пры бібліятэцы быў створаны метадычны куток. У 1968 г. работнікамі бібліятэкі было зроблена 86 выездаў з мэтай аказання практычнай і метадычнай дапамогі бібліятэкам сяла. Практыкуюцца ўзаемаправеркі паміж сельскімі бібліятэкамі. Вялікая ўвага надаецца вучобе бібліятэчных кадраў, усе новыя работнікі праходзяць практыку пры раённай бібліятэцы.
У 1970 г. бібліятэка стала базавай бібліятэкай, у якой праходзяць практыку студэнты бібліятэчнага тэхнікума ім. А. С. Пушкіна.
У раённай бібліятэцы адчыняюцца новыя аддзелы: аддзел камплектавання і апрацоўкі кніжнага фонду, методыка-бібліяграфічны аддзел; пашыраецца штат супрацоўнікаў.
У 1978 г. у выніку цэнтралізацыі сеткі бібліятэк раёна яна стала цэнтральнай для ўсіх бібліятэк-філіялаў сістэмы.
Бібліятэка абслугоўвае каля 5 000 чытачоў, на яе базе дзейнічаюць два пункты выдачы: у Цэнтральнай раённай бальніцы і Ваенным шпіталі. Пры бібліятэцы працуюць: публічны цэнтр прававой інфармацыі, творчы клуб «Сучаснікі» і літаратурна-музычная гасцёўня «Сустрэчы з прыгожым». Праводзіць прэзентацыі новых выданняў, круглыя сталы, творчыя вечарыны, сустрэчы з пісьменнікамі, інфармацыйна-пазнавальныя гадзіны.
У канцы 2004 г. пачалася аўтаматызацыя бібліятэчных працэсаў, раённая бібліятэка набыла АБІС ALIS.
У 2007 г. пачалося бібліятэчнае абслугоўванне чытачоў у аўтаматызаваным рэжыме.
На базе раённай бібліятэкі праходзяць міжрэгіянальныя семінары з калегамі суседніх раёнаў, семінары-практыкумы для бібліятэкараў сістэмы. Па выніках 2008 г. Пастаўская цэнтральная раённая бібліятэка стала пераможцам раённага спаборніцтва сярод устаноў культуры.
У 2009 г. аддзел бібліятэчнага маркетынгу заняў першае месца па выніках абласнога конкурсу «Інавацыі ў рабоце бібліятэк».
З 2014 г. бібліятэка прымае актыўны ўдзел у Міжнародным фестывалі народнай музыкі «Звіняць цымбалы і гармонік». Стала традыцыяй першы фестывальны дзень адкрываць літаратурным святам, якое праходзіць на сцэне раённай канцэртнай залы. Госці горада і жыхары Пастаў знаёмяцца з літаратурнымі дасягненнямі мясцовых паэтаў і пісьменнікаў і творчасцю гасцей фестывалю.
У 2017 г. адзначыў 10-гадовы юбілей клуб па інтарэсах «Сучаснікі». У скарбонцы мерапрыемстваў клуба такія: краязнаўчая лабараторыя «Мая сям'я, мае вытокі, мой род – і блізкі, і далёкі», музычна-паэтычны вечар «Яны складалі гэтыя песні, а песні нас вучылі жыць», бібліятэчныя вячоркі «Тэрыторыя дабра і творчасці», музычны кіёск «Вечная вясна Валерыя Абадзінскага», літаратурна-музычная гасцёўня «Паэзія – не рамяство, паэзія – лёс», прысвечаная творчасці Э. Асадава і Р. Гамзатава і г. д.
Платныя паслугі, якія аказвае раённая бібліятэка:
– камерцыйны абанемент;
– выдача літаратуры з чытальнай залы на ноч (начны абанемент);
– раздрукоўка дакументаў з камп'ютэрнай базы дадзеных прававой інфармацыі;
– камп'ютэрныя паслугі: набор і раздрукоўка тэксту;
– ксеракапіраванне.
Пастаўская раённая бібліятэка займае значнае месца ў сацыяльна-культурным развіцці раёна. Галоўнымі напрамкамі дзейнасці з'яўляюцца: краязнаўства, патрыятычнае выхаванне, якасна новы ўзровень бібліятэчнага абслугоўвання, задавальненне інфармацыйных запытаў чытачоў, адраджэнне і развіццё беларускай культуры.
Адрас: Віцебская вобласць, Пастаўскі раён, г. Паставы, вуліца Савецкая, д. 9.
|
ЛІТАРАТУРА
1. Бандарэнка, І. Бібліятэкар – прафесія творчая / І. Бандарэнка // Пастаўскі край. – 2010. – 30 крас. – С. 5.
2. Бандарэнка, І. Кнігі, якія чытаюць / І. Бандарэнка // Пастаўскі край. – 2013. – 13 крас. – С. 9.
3. Бандарэнка, І. Наш штодзённы занятак / І. Бандарэнка // Пастаўскі край. – 2012. – 3 кастр. – С. 4.
4. Гірвель, В. Залатая восень «Сучаснікаў» / В. Гірвель // Пастаўскі край. – 2012. – 17 кастр. – С. 3.
5. Гірвель, В. І ў ХХІ стагоддзі за інфармацыяй ідзе чытач / В. Гірвель // Пастаўскі край. – 2009. – 9 снеж. – С. 5.
6. Гірвель, В. «Тут, на Зямлі, а, значыць, у Сусвеце, пракладзены наш непаўторны шлях» / В. Гірвель // Бібліятэка прапануе. – 2017. – № 4. – С. 13–15.
7. Касцень, Л. Нестандартныя ідэі і маркетынгавы падыход / Л. Касцень // Пастаўскі край. – 2009. – 28 лют. – С. 6.
8. Костень, Л. Г. Поставская центральная районная библиотека / Л. Г. Костень // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 357–358.
9. Лашук, Ф. К. Юбилей библиотеки / Ф. К. Лашук // Бібліятэчны свет. – 2000. – № 3. – С. 32.
10. Пастаўская цэнтральная раённая бібліятэка // Культура Беларусі : энцыклапедыя : [у 6 т.] / рэдкал.: У. У. Андрыевіч [і інш.]. – Мінск : БелЭн імя П. Броўкі, 2015. – Т. 6 : М–Я. – С. 141–142.
11. Шапавалава, А. Аб'яднала «Сучасніца» / А. Шапавалава // Пастаўскi край. – 2007. – 7 лют. – С. 2.
СПАСЫЛКІ
