Браслаўская звязда. Браслаўскі раён. г. Браслаў

Подробности

Створана 19.04.2017 12:23

Адноўлена 14.03.2019 08:42

19 студзеня 1919 года выйшаў першы нумар газеты «Браслаўская камуна». Гэты друкаваны орган належаў Браслаўскаму рэвалюцыйнаму камітэту. Але больш ніякіх звестак пра гэтае выданне не захавалася.

Пасля аб'яднання Усходняй і Заходняй Беларусі адначасова са шматлікімі пераўтварэннямі ў створаным Браслаўскім раёне з'явілася сваё перыядычнае выданне – газета «Звязда». «Браслаўскай» яна стала пазней, у 1963 годзе. Газета з'яўлялася органам Браслаўскага павятовага камітэта кампартыі і павінна была адыгрываць ролю ідэалагічнага фарпоста Савецкай улады на захадзе Беларусі. Першы нумар выйшаў 1 кастрычніка 1939 года. Рэдакцыя і друкарня знаходзіліся ў будынку сучаснага краязнаўчага музея. Першым яе рэдактарам быў А .Ц. Васілеўскі. Спачатку газета друкавалася на дзвюх старонках невялікага памеру, а з № 8 стала большай па фармаце. Першыя нумары выдання не ўтрымлівалі ніякай мясцовай інфармацыі. На яе старонках часта з'яўляліся тэлеграмы, лісты, віншаванні.

У 1939 годзе ў газеце паведамлялася аб перайменаванні вуліц Браслава. Частымі, асабліва ў 1940–1941 гг., былі паведамленні аб школах, іх колькасці. Вясной 1941 года з'явіліся першыя звесткі аб ходзе сельгасработ. Тыраж «Звязды» ў 1939 годзе быў спачатку некалькі соцен і дасягнуў дзвюх тысяч. Пастаянным рэдактарам была Хая Навумаўна Мерхасіна. Яна ўзначаліла газету ў ліпені 1940 года. У часы вайны яна была ў эвакуацыі, пасля вярнулася ў Браслаў і з канца 1944 года зноў узначаліла газету. Доўгі час газету ўзначальваў М. Башлакоў, а з пачатку 80-х і да 2004 года – Н. Цярэнцьеў.

Газета, якая з'яўляецца органам Браслаўскага раённага выканаўчага камітэта і раённага Савета дэпутатаў, усебакова асвятляе жыццё раёна: развіццё сельскай гаспадаркі, прамысловасці, адукацыі, культуры. Газета выходзіць 2 разы на тыдзень, па серадах і суботах. На першай старонцы друкуюцца матэрыялы аб рабоце раённых органаў улады, афіцыйныя дакументы, звесткі аб узнагароджаннях. Другая старонка расказвае аб рабоце асобных прадпрыемстваў і арганізацый, аб цікавых людзях раёна. Трэцяя старонка суботняга выпуску газеты выходзіць пад рубрыкай «Суботнім вечарам» і ўтрымлівае звесткі забаўляльнага характару. Цікавы матэрыял аб жыцці моладзі змяшчае маладзёжная старонка «Змена». Ужо шмат гадоў на старонцы пад рубрыкай «Блакітны разліў» друкуюцца творы маладых паэтаў і пісьменнікаў Браслаўшчыны. На старонцы пад рубрыкай «Родныя прасторы» змяшчаецца матэрыял аб прыродзе Браслаўшчыны, яе ахове, аб экалагічным становішчы ў раёне. Матэрыял аб стане злачыннасці ў раёне змяшчаецца пад рубрыкай «З залы суда». Друкуюцца таксама матэрыялы пад рубрыкамі «Навіны культуры», «Весткі з бібліятэк», «Весткі з сельскіх саветаў». Апошняя старонка газеты прысвечана рэкламе. У апошні час у газеце сталі друкаваць шмат цікавых фотаздымкаў.

Газета «Браслаўская звязда» друкуецца ў КПУП «Наваполацкая друкарня». Яе тыраж 3878 экз.

Галоўны рэдактар – Каладынскі Вячаслаў Станіслававіч.

Адрас рэдакцыі: 211969, Віцебская вобласць, г. Браслаў, вуліца Садовая, 59.

Афіцыйны сайт: http://www.braslav-star.by

Е-mail: Этот адрес электронной почты защищен от спам-ботов. У вас должен быть включен JavaScript для просмотра. ; Этот адрес электронной почты защищен от спам-ботов. У вас должен быть включен JavaScript для просмотра.

ЛІТАРАТУРА

1. «Браслаўская звязда» // Сродкі масавай інфармацыі Віцебскай вобласці / рэд. Л. Д. Мышлёнак. – Віцебск : Віцебская абласная друкарня, 2003. – С. 12.

2. Денисов, Н. Д. Браслаўская звязда / Н. Д. Денисов // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 107–108.

3. Панцялеенка, А. Першыя газеты Браслаўшчыны / А. Панцялеенка // Браслаўская газета. – 2000. – 20 верас. – С. 2.

4. Панцялейка, А. «Браслаўская звязда» (1939–1949 гг.): пачатак і гісторыя фармавання раённай газеты / А. Панцялейка // Браслаўскія чытанні : матэрыялы V-й навукова-краязнаўчай канферэнцыі, прысвечанай 935-годдзю згадкі Браслава ў пісьмовых крыніцах / склад.: К. Шыдлоўскі [і інш.]. – Браслаў : Браслаўскае музейнае аб'яднанне, 2001. – С. 70–71.

5. Панцялейка, А. Даваенны перыяд / А. Панцялейка // Браслаўская звязда. – 2009. – 14 кастр. – С. 3.

6. Пашкевіч, Т. Разам стваралі летапіс Браслаўшчыны / Т. Пашкевіч // Браслаўская звязда. – 2009. – 14 кастр. – С. 3–4.

7. Пятушка, Т. Галоўны інфарматар браслаўчан / Т. Пятушка // Браслаўская звязда. – 2016. – 3 жн. – С. 4.

8. Раённай газеце 65 гадоў // Браслаўская звязда. – 2004. – 2 кастр. – С. 1–2.

9. Сергіевіч, К. Друкарская справа на Браслаўшчыне / К. Сергіевіч // Браслаўская звязда. – 2007. – 5 мая. – С. 5.

10. Шыдлоўскі, К. Мы можам ганарыцца сваёй мінуўшчынай / К. Шыдлоўскі // Браслаўская звязда. – 2004. – 4 верас. – С. 4.