Дняпроўская праўда, газета. Дубровенскі раён. г. Дуброўна

Подробности

Створана 10.10.2018 12:23

Адноўлена 17.01.2019 15:05

Летам 1924 года II сесія ЦВК БССР ліквідавала паветы і воласці, стварыўшы акругі і раёны. Па новаму адміністрацыйна-тэрытарыяльнаму падзелу Дуброўна становіцца горадам, цэнтрам Дубровенскага раёна Аршанскай акругі. Гэты факт адыграў значную ролю ў далейшым развіцці гарадка на Дняпры. З'явіліся больш спрыяльныя ўмовы для аднаўлення і развіцця разбуранай вайной гаспадаркі, расла занятасць насельніцтва, прыкметна павышаўся жыццёвы ўзровень.

У сувязі з гэтымі падзеямі ў шэрагу раёнаў ствараліся раённыя друкаваныя газеты.

У плане работы бюро Дубровенскага РК КП (б)Б на кастрычнік – лістапад 1930 года было запісана пытанне «Аб райгазеце». Яно было разгледжана на пясяджэнні бюро райкама 30 кастрычніка 1930 года пад фармулёўкай «Аб ходзе работы па арганізацыі раённай газеты».

I ўжо рашэннем таго ж бюро райкама ад 26 лістапада 1930 года загадчыкам рэдакцыі раённай газеты зацверджаны Маслоўскі. Дубровенская раённая газета пад назвай «За сацыялістычнае будаўніцтва» стала выходзіць з 5 сакавіка 1931 года.

Выпуск газеты на Дубровеншчыне суправаджаўся некаторымі цяжкасцямі з-за адсутнасці сваёй друкарні. Першыя нумары прыйшлося друкаваць у Мінску, а потым – у Аршанскай гарадской друкарні. Таму ў першыя гады яна выходзіла нерэгулярна, з вялікімі перабоямі.

Атрымаўшы друкарскую машыну, рэдакцыя размясцілася ў старым драўляным будынку па вуліцы Бярозкаўскай. З-за адсутнасці электраэнергіі машыну прыводзілі ў рух уручную па чарзе. Першымі друкарамі на Дубровеншчыне былі Шэпа Гершавіч Пішчыкер і Ерухім Саламонавіч Гадлін. Выходзіла газета на беларускай і яўрэйскай мовах адзін раз у пяць дзён. Падпісчыкаў тады яшчэ не было. Газета некаторы час дастаўлялася ў гаспадаркі, на прамысловыя прадпрыемствы і ў розныя ўстановы бясплатна.

З 16 студзеня 1960 года газета стала называцца «За камунізм».

У снежні 1960 года ў выніку змянення адміністрацыйна-тэрытарыяльнай структуры Дубровенскі раён далучылі да Аршанскага. Спыніла сваё існаванне раённая газета «За камунізм».

У студзені 1965 года Дубровенскі раён быў адноўлены. Вярнуліся ў Дуброўна рэдакцыя газеты і друкарня. 3 гэтага часу яна пачала называцца «Дняпроўская праўда».

Першы нумар пасля 3-гадовага перапынку выйшаў у пачатку красавіка 1965 года.

Зараз дубровенская раённая грамадска-палітычная газета «Дняпроўская праўда» выходзіць на беларускай мове два разы на тыдзень. Яе заснавальнікі – Дубровенскі раённы выканаўчы камітэт, Дубровенскі раённы Савет дэпутатаў.

Газета – неаднаразовы пераможца і прызёр рэспубліканскіх і абласных конкурсаў на лепшае асвятленне ў СМІ тэм па ўдасканаленні работы аграпрамысловага комплексу, здаровага ладу жыцця, ролі жанчыны ў сучасным свеце, на лепшую публікацыю матэрыялаў на экалагічную і патрыятычную тэматыку, асвятленне праблем моладзі, пытанняў міжнацыянальных і міжканфесіянальных адносін, супрацоўніцтва з суайчыннікамі за мяжой.

Галоўны рэдактар – Шурпакова Святлана Сямёнаўна.

Адрас рэдакцыі: 211040, Віцебская вобласць, г. Дуброўна, вуліца Камсамольская, 6.

Е-mail: Этот адрес электронной почты защищен от спам-ботов. У вас должен быть включен JavaScript для просмотра.

ЛІТАРАТУРА

1. 9 тысяч сустрэч з вамі, сябры! // Дняпроўская праўда (Дуброўна). – 2004. – 15 верас. – С. 1.

2. Дзікарава, А. Літаратурныя сустрэчы / А. Дзікарава // Дняпроўская праўда (Дуброўна). – 2002. – 13 крас. – С. 2.

3. «Дняпроўская праўда» // Сродкі масавай інфармацыі Віцебскай вобласці / тэкст Л. Д. Мышленка. – Віцебск : Віцебская абласная друкарня, 2003. – С. 14–15.

4. Дудараў, Л. З раёнкай праз усё жыццё / Л. Дудараў // Дняпроўская праўда (Дуброўна). – 2012. – 3 кастр. – С. 3.

5. Кулакоў, Ф. «...И душу греющие строчки» / Ф. Кулакоў // Дняпроўская праўда (Дуброўна). – 2001. – 31 сак. – С. 1, 3.

6. Кулакоў, Ф. На вірлівай плыні падзей і часу / Ф. Кулакоў // Дняпроўская праўда (Дуброўна). – 2006. – 4 сак. – С. 2.

7. Лебедева, О. «Дняпроўскай праўдзе» – 85! / О. Лебедева // Витебские вести. – 2016. – 3 марта. – С. 23.

8. Лебяда, Т. Даражэй за ўсё – давер / Т. Лебяда // Віцебскі рабочы. – 2001. – 15 сак. – С. 2.

9. Сіманькоў, М. Селькораўскі шлях / М. Сіманькоў // Дняпроўская праўда (Дуброўна). – 2001. – 3 сак. – С. 3.

10. Чапялова, Л. Душы прыгожыя парывы, або Шклянка мёду ад ангіны / Л. Чапялова // Дняпроўская праўда (Дуброўна). – 2002. – 29 мая. – С. 2–3.

11. Чапялова, Л. Палымяны летапісец раёна / Л. Чапялова // Дняпроўская праўда (Дуброўна). – 2006. – 4 сак. – С. 1.