Зара (Бешанковічы), газета, г. п. Бешанковічы

Подробности

Створана 19.04.2017 12:23

Адноўлена 28.03.2019 14:46

Сродкі масавай інфармацыі Бешанковіцкага раёна прадстаўлены раённай газетай «Зара» і праграмай «Бешанковіцкае раённае радыёвяшчанне».

Першапачаткова раённая газета называлася «Сталінец». Партыйны друк на ўсіх этапах гісторыі Кампартыі Беларусі займаў адно з вядучых месцаў у арсенале сродкаў прапаганды, арганізацыі і выхавання мас.

У 1930 годзе ў сувязі з ліквідацыяй у адміністрацыйным дзяленні акруг рашэннем ЦК ад 15 ліпеня былі ліквідаваны акруговыя газеты.

Як указвалася ў пастанове ЦК ВКП(б) ад 11 жніўня «павінна быць разгорнута сетка раённых газет у прамысловых і важнейшых сельскагаспадарчых раёнах». «Раённая газета, – гаварылася далей у пастанове, – павінна быць масавым палітычным органам і мець ярка выражаны вытворчы характар (у адпаведнасці з эканомікай раёна)».

У пастанове былі таксама выказаны практычныя ўказанні па выпуску раённых газет: падборка кадраў журналістаў, стварэнне паліграфічнай базы, забеспячэнне паперай, распаўсюджванне друку і г. д.

На працягу 1930–1931 гг. ЦК ВКП(б) прыняў некалькі пастаноў з мэтай паляпшэння работы друку, у тым ліку раённых газет, развіцця рабселькораўскага руху на месцах. Рабселкораўскі рух у Бешанковіцкім раёне бярэ свой пачатак у першыя гады Савецкай улады. Рабочыя і сялянскія актывісты, адчуваючы вялікую сілу бальшавіцкага друку у барацьбе за новае жыццё, пісалі артыкулы ў акруговыя, рэспубліканскія і цэнтральныя газеты.

У 1925 годзе ў раёне налічвалася 15 селькораў. Райкам партыі бачыў у іх асобе сваіх надзейных памочнікаў у барацьбе з недахопамі, рэгулярна збіраў добраахвотных памочнікаў друку для вучобы, абмену вопытам, сумеснага абмеркавання планаў работы. У 1930 годзе ў раёне ўжо налічвалася 60 селькораў.

3 ліку лепшых актывістаў друку райкам ВКП(б) зацвярджаў на бюро кандыдатаў у няштатныя карэспандэнты ў рэспубліканскія і саюзныя газеты. Тыражы на перыядычныя выданні раслі з кожным годам. Райкам партыі, партыйныя ячэйкі імкнуліся, каб газеты і часопісы чыталі як мага больш людзей.

У 1928 годзе ў раёне на газету «Звязда» было падпісана 75 чалавек. У наступным годзе ў раён ужо дастаўлялася 1326 экземпляраў усіх перыядычных выданняў. Адна газета ў сярэднім прыпадала на 5,5 двароў сельскіх жыхароў, а ў сярэднім па раёне (уключаючы Бешанковічы) –1 экземпляр на 4, 5 двары.

16 ліпеня 1932 года на пасяджэнні райкама КП(б)Б было разгледжана пытанне аб арганізацыі раённай друкаванай газеты. Так, 29 ліпеня 1932 года рэдактарам газеты «Сталінец» быў зацверджаны Я. Шылянкоў, яго намеснікам – С. Яловік. Былі падабраны адпаведныя кадры супрацоўнікаў рэдакцыі і друкарні з ліку актывістаў селькораўскага руху.

12 жніўня 1932 года быў выпушчаны першы нумар раённай газеты «Сталінец». У гэты ж дзень 4,5 тыс. экзэмпляраў раёнкі паступілі падпісшчыкам. Гэта была вялікая падзея ў грамадскім і культурным жыцці Бешанковіцкага краю. Нягледзячы на складанасці арганізацыйнага перыяду, недахоп кваліфікаваных кадраў, газета стала хутка набываць мэтанакіраваны характар, дапамагаць райкаму КП(б)Б і райвыканкаму хутчэй ажыццяўляць у вёсцы сацыялістычныя пераўтварэнні, разгортваць сацыялістычнае спаборніцтва сярод рабочых і сялян раёна.

У далейшым штат работнікаў рэдакцыі мяняўся, папаўняўся з ліку партыйных і камсамольскіх актывістаў, рабочых і сельскіх карэспандэнтаў.

Да 1939 года раённая газета выходзіла 9 разоў у месяц. У кастрычніку таго ж года бюро райкама КП(б)Б зацвердзіла перыядычнасць раёнкі – 12 разоў у месяц. Тады ж было прынята і рашэнне аб умацаванні паліграфічнай базы газеты, перададзены адзін з будынкаў, пасля рэканструкцыі якога тут была размешчана друкарня.

Пасля пераводу Ф. Н. Шаіркі ў Гарадок раённую газету ў Бешанковічах рэдагаваў М. Р. Сямёнаў, а з ліпеня 1940 года – А. В. Глікман.

На працягу амаль дзесяці даваенных гадоў бешанковіцкая раённая газета была баявым памочнікам райкама партыі і райвыканкама. Вакол яе рос і згуртоўваўся актыў рабочых і сялянскіх карэспандэнтаў, многія з якіх у далейшым сталі журналістамі, былі вылучаны на кіруючую работу ў партыйныя, савецкія і гаспадарчыя арганізацыі.

З 25 мая 1943 года выпуск газеты быў адноўлены пры Лепельскім падпольным райкаме КП(б)Б. Пад назвай «Сталінец» Бешанковіцкая раённая газета выдавалася да 1956 года. У 1956 – пачатку 1957 гг. газета называлася «За Радзіму». З лютага 1957 г. раённая газета стала называцца «Зара». У далейшым газету ўзначальвалі Д. Тарасевіч, І. Коныш, Б. Сувораў, В. Ганковіч, М. Прыгожы. З сакавіка 1990 па снежань 2003 гг. рэдактарам газеты «Зара» працаваў Г. Галкоўскі, са снежня 2003 па люты 2013 гг. – Л. Паўлоўская. З красавіка 2013 года газету «Зара» ўзначальвае С. Варошка.

У 2017 годзе за асвятленне падзей сацыяльна-эканамічнага жыцця Бешанковіцкага раёна газета «Зара» была ўзнагароджана Ганаровай граматай Віцебскага абласнога выканаўчага камітэта. Карэспандэнты газеты імкнуцца ўсебакова асвятляць справы працоўных калектываў, іх праблемы і цяжкасці, расказваць пра змены ў жыцці грамадства, весці летапіс спраў і здзяйсненняў працаўнікоў вёскі. Галоўным героем усіх газетных публікацый з'яўляецца чалавек працы.

Рэдакцыя мае ўласны настольна-выдавецкі комплекс, на якім набіраюцца і вярстаюцца матэрыялы. Бешанковіцкая раённая газета «Зара» выходзіць у свет два разы на тыдзень на беларускай і рускай мовах, аргументавана распавядае пра ўсе працэсы, якія адбываюцца ў грамадстве.

ЛІТАРАТУРА

1. Акулёнок, Л. Районка наша – юбиляр! Шагали вместе, вместе жили... / Л. Акулёнок // Зара (Бешанковічы). – 2012. – 24 жн. – С. 4–5.

2. Белавус, М. «Наша раёнка, у цябе сёння свята!» / М. Белавус // Зара (Бешанковiчы). – 2007. – 10 жн. – С. 7.

3. Галкоўскі, Р. Ад «Сталінца» да «Зары» / Р. Галкоўскі // Зара (Бешанковічы). – 2002. – 13 жн. – С. 1.

4. «Зара» // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 446.

5. З любімай газетай мы разам крочым па жыцці // Зара (Бешанковічы). – 2017. – 11 жн. – С. 4–5.

6. Крачкоўскі, А. В. Журналіста памятныя імгненні / А. В. Крачкоўскі // Зара (Бешанковічы). – 2017. – 4 жн. – С. 2, 6.

7. Крачкоўскі, А. Журналісцкай загартоўкі наш Віктар Піліпавіч! / А. Крачкоўскі // Зара (Бешанковiчы). – 2007. – 29 чэрв. – С. 7.

8. Крачкоўскі, А. З «Зарою» разам / А. Крачкоўскі // Зара (Бешанковiчы). – 2005. – 15 сак. – С. 2.

9. Крачкоўскі, А. На перадавой вызваленчай барацьбы / А. Крачкоўскі // Зара (Бешанковiчы). – 2007. – 29 мая. – С. 3.

10. Крачкоўскі, А. На шляху станаўлення / А. Крачкоўскі // Зара (Бешанковiчы). – 2007. – 8 мая. – С. 3.

11. Крачкоўскі, А. Першы ваенны нумар / А. Крачкоўскі // Зара (Бешанковiчы). – 2007. – 18 мая. – С. 7.

12. Крачкоўскі, А. Так нараджалася газета / А. Крачкоўскі // Зара (Бешанковiчы). – 2007. – 13 крас. – С. 2.

13. Крачкоўскі, А. У радах народных мсціўцаў / А. Крачкоўскі // Зара (Бешанковiчы). – 2007. – 22 мая. – С. 2.

14. Крачкоўскі, А. У раёне – друкаваная газета / А. Крачкоўскі // Зара (Бешанковічы). – 2001. – 10 ліп. – С. 2.

15. Паўлоўская, Л. Газета нашага жыцця / Л. Паўлоўская // Зара (Бешанковічы). – 2012. – 24 жн. – С. 1.

16. Паўлоўская, Л. З палымянаю назвай «Зара» / Л. Паўлоўская // Зара (Бешанковiчы). – 2007. – 7 жн. – С. 1.

17. Поджарая, С. Летописцы родного края / С. Поджарая // Зара (Бешанковічы). – 2009. – 6 сак. – С. 1–2.