Полацкая цэнтральная гарадская бальніца, УАЗ. Полацкі раён, г. Полацк

Подробности

Створана 04.06.2019 08:40

Адноўлена 04.06.2019 16:05

У 1910 годзе ў г. Полацк пражывала больш за пяцьдзясят тысяч чалавек. Урачэбную дапамогу насельніцтву аказвала гарадская земская бальніца на Верхнім замку і яўрэйская бальніца па вуліцы Невельскай. У гасцініцы Гранд-Гатэль працаваў лекар Ольдэнбург, а павятовы лекар Гнядоўскі вёў прыём на хаце. За медыцынскай кансультацыяй можна было звярнуцца да практыкуючых лекараў горада.

Урачэбная дапамога дапаўнялася працай дзевяці аптэк і аптэкарскіх магазінаў, дзе можна было не толькі купіць лекі, але і атрымаць медыцынскую кансультацыю. Бальніцы працягнулі сваю працу і пасля рэвалюцыі 1917 года, адкрыліся дзве амбулаторыі – школьная і гарадская. Яшчэ ў 1918 годзе ў горадзе быў абсталяваны барак для хворых сыпным тыфам і трэцяя амбулаторыя пры аптэцы. Вялікую ролю граў санітарна-эпідэміялагічны аддзел, які быў створаны ў 1919 годзе і падпарадкоўваўся аддзелу аховы здароўя.

1 верасня 1918 года працу па медыцынскім абслугоўванні насельніцтва ўзначаліў павятовы медыка-санітарны аддзел. Пазней ён стаў называцца павятовым аддзелам аховы здароўя. У верасні 1919 года павятовы аддзел аховы здароўя г. Полацка быў эвакуіраваны на станцыю Дрэтунь. Вярнуўся ён толькі ў 1920 годзе.

Народная бальніца – асноўная медыцынская ўстанова горада, якая адкрылася ў 1921 годзе на базе земскай бальніцы і фінляндскага шпіталя. У ёй працавала некалькі аддзяленняў: тэрапеўтычнае, хірургічнае, венералагічнае, інфекцыйнае і гінекалагічнае.

Дзяржаўная ўстанова аховы здароўя «Полацкая цэнтральная гарадская бальніца» вядзе адлік свайго летазлічэння з 21 лютага 1924 года. 21 лютага 1924 года Полацкай народнай бальніцы прысвоена імя У. І. Леніна і яна была ператворана ў Полацкую гарадскую бальніцу.

У 1926 годзе пры гарадской бальніцы было адкрыта радзільнае аддзяленне, на наступны год – дзіцячае і гінекалагічнае. У 1927 годзе адкрываецца гінекалагічнае і ЛОР-аддзяленне. У 1932 годзе – першы фізіятэрапеўтычны кабінет. У 1933 годзе – водалячэбніца і інфекцыйнае аддзяленне.

У гады вайны, з ліпеня 1941 па ліпень 1944 гг., будынкі бальніцы былі спалены і разбураны, медыцынскае абсталяванне разрабавана і знішчана. У 1948 годзе ў Полацкай гарадской бальніцы была арганізавана біяхімічная лабараторыя.

У кастрычніку 1986 года ахова здароўя горада аб'яднана з раёнам і бальніца стала называцца «Цэнтральная раённая бальніца імя У. І. Леніна». У чэрвені 1992 года, у сувязі з рэарганізацыяй, Полацкая цэнтральная раённая бальніца імя У. І. Леніна была перайменавана ў Полацкае галаўное тэрытарыяльнае медыцынскае аб'яднанне. У красавіку 1994 года Полацкае галаўное тэрытарыяльнае медыцынскае аб'яднанне перайменавана ў Тэрытарыяльнае медыцынскае аб'яднанне горада Полацка. У верасні 2001 года, у сувязі з перарэгістрацыяй, Тэрытарыяльнае медыцынскае аб'яднанне горада Полацка было перайменавана ва УАЗ «Полацкае гарадское тэрытарыяльнае медыцынскае аб'яднанне». 10 кастрычніка 2005 года ўстанова аховы здароўя «Полацкае гарадское тэрытарыяльнае медыцынскае аб'яднанне» было аб'яднана з раённымі лячэбна-прафілактычнымі ўстановамі і пераўтворана ў дзяржаўную ўстанову аховы здароўя «Полацкая цэнтральная гарадская бальніца».

Галоўныя ўрачы Полацкай гарадской бальніцы:

1925–1941 гг. – Магаршак Веніямін Саламонавіч;

1941–1944 гг. – Ізмайлавіч Віктар Веніямінавіч;

1945–1953 гг. – Каранеўскі Міхаіл Аронавіч;

1953–1963 гг. – Палыгаліна Алена Міхайлаўна;

1963–1983 гг. – Лебедзева Ганна Міхайлаўна;

1983–1986 гг. – Кохан Дзмітрый Пятровіч;

1986–1998 гг. – Пяткевіч Аляксей Іосіфавіч;

1998–2000 гг. – Ісаеў Уладзімір Міхайлавіч;

2000–2005 гг. – Лучанок Любоў Ігнацьеўна;

2005–2018 гг. – Гудкоў Аляксандр Васільевіч.

Установа аховы здароўя «Полацкая цэнтральная гарадская бальніца» з'яўляецца структурным падраздзяленнем ДУАЗ «Полацкая цэнтральная гарадская бальніца» 

Структурныя падраздзяленні цэнтральнай гарадской бальніцы

– Прыёмнае аддзяленне;

– Аддзяленне гнойнай хірургіі;

– Хірургічнае аддзяленне;

– Тэрапеўтычнае аддзяленне;

– Отарыналарынгалагічнае аддзяленне;

– Гінекалагічнае аддзяленне;

– Аддзяленне рэанімацыі і анестэзіялогіі;

– Аперацыйнае аддзяленне;

– Эндаскапічнае аддзяленне;

– Фізіятэрапеўтычнае аддзяленне;

– Кабінет ультрагукавога даследавання;

– Рэнтген кабінет;

– Клініка-дыягнастычная лабараторыя.

З 1 ліпеня 2017 года на базе Полацкай цэнтральнай гарадской бальніцы адкрыты міжраённы Цэнтр планавай малаінвазіўнай і эндаскапічнай хірургіі, з 2018 года – міжраённы Цэнтр тромбалітычнай тэрапіі.

Адрас: Віцебская вобласць, Полацкі раён, г. Полацк, вул. П. Броўкі, д. 73.

ЛІТАРАТУРА

1. Борисов, О. А. В ключе современных тенденций / О. А. Борисов ; беседовала Е. Каленик // Полацкі веснік. – 2018. – 17 жн. – С. 7.

2. Борсяк, Ю. Многопрофильная реабилитация / Ю. Борсяк // Медицинский вестник. – 2009. – 30 апр. – С. 3.

3. Будьте здоровы, полочане! / подгот. В. Морозова // Полацкі веснік. – 2016. – 25 сак. – С. 3.

4. Гудков, А. На страже жизни и здоровья / А. Гудков ; беседовала Е. Каленик // Полацкі веснік. – 2011. – 17 чэрв. – С. 4.

5. Каленик, Е. Без права на ошибку / Е. Каленик // Полацкі веснік. – 2018. – 4 мая. – С. 3.

6. Каленик, Е. Диагностика точная. Лечение – эффективное / Е. Каленик // Полацкі веснік. – 2018. – 28 верас. – С. 3.

7. Каленик, Е. Стратегия и тактика здоровья / Е. Каленик // Полацкі веснік. – 2013. – 5 сак. – С. 4.

8. Наша больница: вехи истории Полоцкой городской больницы им. В. И. Ленина // Полацкі веснік. – 2013. – 4 студз. – С. 5.

9. Сделать шаг навстречу / подгот. Е. Каленик // Полацкі веснік. – 2018. – 19 кастр. – С. 6.

10. Шаг за шагом к здоровью // Полацкi веснік. – 2004. – 21 снеж. – С. 6.

11. Яско, А. Как здоровому не стать больным / А. Яско // Народная газета. – 2008. – 14 кастр. – С. I–II.