Нікалаева Ганна Емяльянаўна
Нікалаева Ганна Емяльянаўна нарадзілася 13 кастрычніка 1918 года ў в. Халамер'е Гарадоцкага раёна ў сялянскай сям'і.
Пачынала свой працоўны шлях у сельскагаспадарчай арцелі «Маяк» Гарадоцкага раёна. У 1934 годзе пераехала працаваць у Шумнянскі сельсавет (зараз Ноўкінскі сельсавет Віцебскага раёна) сушыльшчыцай брыкетаў на торфапрадпрыемства «Гараднянскі Мох». Але шкодныя ўмовы працы па здабычы торфу і цяжкая ручная праца вымусілі маладую жанчыну перайсці працаваць санітаркай і раздатчыцай у санаторый імя Дзесяцігоддзя Беларускай ССР «Сасноўка».
З пачаткам Вялікай Айчыннай вайны Г. Е. Нікалаева вярнулася ў родную вёску. Пасля вызвалення раёна ад нямецка-фашысцкіх захопнікаў са снежня 1943 года Ганна Емяльянаўна працавала ў мясцовым калгасе «Маяк» паляводам. Яна прымала ўдзел у аднаўленні гаспадаркі, разбуранай захопнікамі.
У 1948 годзе Г. Нікалаева пераехала ў в. Сасноўка Віцебскага раёна. У 1949 годзе пачала працаваць ў падсобнай гаспадарцы пры туберкулёзным санаторыі «Сасноўка».
У 1959 годзе сельскія гаспадаркі Русакоўскага (Ноўкінскага) сельсавета былі аб'яднаны ў саўгас «Рудакова», да яго ж была далучана і падсобная гаспадарка санаторыя «Сасноўка». На працягу 13 гадоў Ганна Емяльянаўна працавала даяркай у гэтым саўгасе.
Пачынаючы з 1963 года, Ганна Емяльянаўна неаднаразова прымала ўдзел у працы ВДНГ СССР, была адзначана медалямі і ганаровымі граматамі Галоўнага выставачнага камітэта, яе імя было ўпісана ў Кнігу працоўнай славы раёна і вобласці.
Указам Прэзідыума Вярхоўнага Савета СССР ад 22 сакавіка 1966 года за выдатныя поспехі, дасягнутыя ў развіцці жывёлагадоўлі, павелічэнні вытворчасці і нарыхтоўкі мяса, малака, шэрсці і іншай прадукцыі, Нікалаевай Ганне Емяльянаўне было прысвоена званне «Герой Сацыялістычнай Працы».
Г. Е. Нікалаева абіралася дэпутатам Вярхоўнага Савета СССР. У 1970–1974 гг. – член Пастаяннай камісіі па сельскай гаспадарцы, дэпутат Віцебскага раённага і Ноўкінскага сельскага Саветаў дэпутатаў працоўных.
Узнагароджана ордэнамі Леніна, Працоўнага Чырвонага Сцяга, медалямі.
Жыла ў в. Сасноўка Віцебскага раёна.
Памерла Ганна Емяльянаўна 28 мая 2012 года.
ЛІТАРАТУРА
1. Ловейкина, С. Под сенью славы / С. Ловейкина // Жыццё Прыдзвіння (Віцебск). – 2003. – 14 кастр. – С. 1.
2. Мянжынская, В. Шчодрасць душы / В. Мянжынская // Віцебскі рабочы. – 1970. – 22 мая. – С. 2.
3. Нікалаева Ганна Емяльянаўна // Памяць: Гарадоцкі раён : гісторыка-дакументальныя хронікі гарадоў і раёнаў Беларусі / рэдкал.: Н. А. Бурунова [і інш.] ; уклад. С. І. Садоўская ; мастак Э. Э. Жакевіч. – Мінск : Беларусь, 2004. – С. 692.
4. Николаева Анна Емельяновна // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн, 2011. – Т. 2 : Витебская область : в 2 кн. – Кн. 2. – С. 184.
5. Николаева Анна Емельяновна // Слава и гордость земли Витебской : биографический справочник / сост. М. Н. Пригожий ; редкол.: М. П. Кузьмич [и др.]. – Витебск : Витебская областная типография, 2009. – С. 283.
6. Николаева Анна Емельяновна // Твои герои, Беларусь! Герои Социалистического Труда : биографический справочник / сост.: И. Н. Кулан, В. И. Козак, Е. Е. Соколов ; под общ. ред. А. Н. Новикова. – Минск : БелЭн імя П. Броўкі, 2014. – С. 165.
7. Столяренко, Н. Подарок Герою от Президента / Н. Столяренко // Жыццё Прыдзвiння (Вiцебск). – 2008. – 15 сак. – С. 3–4.
8. Судникович, С. Заветный рубеж / С. Судникович // Знаменосцы трудовой славы / сост.: Г. С. Гужва [и др] ; рец. Б. В. Стрельцов. – Минск : Беларусь, 1984. – С. 236–239.
СПАСЫЛКІ
