Бурцаў Фёдар Львовіч нарадзіўся ў 1917 годзе ў Лепелі. Там жа скончыў школу.

Пачынаў вучыцца ў Маскве на курсах жывапісу і малюнка, але скончыць іх не паспеў, бо восенню 1939 года быў прызваны ў армію. Перш чым трапіць на фронт, вучыўся на танкіста ў Барысаве. Ваяваў на Заходнім, Калінскім, 3-м і 4-м Украінскіх франтах.

У дзеючай арміі, у баях пад Будапештам, ён быў цяжка паранены: гарэў у танку, у які трапіў снарад. Пасля доўгага лячэння ў шпіталях у канцы 1945 года вярнуўся ў Лепель у званні старшага лейтэнанта.

Узнагароджаны ордэнам Вялікай Айчыннай вайны II ступені, медалямі.

Пасля вайны ён быў дырэктарам Лепельскага Дома культуры, а затым стаў выкладаць чарчэнне і маляванне ў педвучылішчы. Таксама працаваў настаўнікам у школе-інтэрнаце і ў філіяле Віцебскіх мастацкіх майстэрняў.

Яго карціны розныя па сюжэтах і тэматыцы. Больш за ўсё пейзажаў – прырода Лепельшчыны. Многа работ прысвечана ваеннай тэматыцы: «Партызанскія могілкі ў вёсцы Антунова», «Рэшткі партызанскай зямлянкі», «На Віцебскім напрамку».

Творы Фёдара Львовіча выстаўляліся на розных выставах, ёсць яны і ў краязнаўчым музеі і ў прыватных калекцыях.

Памёр Ф. Л. Бурцаў у 1979 годзе.

ЛІТАРАТУРА

1. Міхно, У. Дух аптымізму / У. Міхно // Лепельскі край. – 2012. – 31 студз. – С. 2.

2. Мудры, Я. Салдаты Перамогі на карцінах мастакоў / Я. Мудры // Лепельскі край. – 2016. – 13 мая. – С. 4.

3. Свет мастацтва // Памяць: Лепельскі раён : гісторыка-дакументальныя хронікі гарадоў і раёнаў Беларусі / рэдкал.: Л. В. Лакініна [і інш.] ; уклад.: В. Я. Ланікіна, А. У. Стэльмах ; мастак Э. Э. Жакевіч. – Мінск : Беларусь, 1999. – С. 587.