Шаўра Рыгор Фёдаравіч нарадзіўся 30 жніўня 1944 года ў вёсцы Малы Поўсвіж Лепельскага раёна.

Выпускнік Поўсвіжскай сямігадовай школы 1958 года, старэйшыя класы скончыў у Лепельскай сярэдняй школе № 2 (зараз ДУА «Гімназія імя І. М. Ерашова г. Лепеля»).

Скончыў мастацка-графічны факультэт Віцебскага педінстытута ў 1917 годзе, аспірантуру Інстытута мастацтвазнаўства, этнаграфіі і фальклору Нацыянальнай акадэміі навук Беларусі ў 1976 годзе.

З 1970 года Рыгор Фёдаравіч, як мастак-акварэліст, удзельнічае ў рэспубліканскіх і мастацкіх выставах.

З 1977 года выкладае ў Беларускім універсітэце культуры і мастацтва (з 1993 года – загадчык кафедры народнага дэкаратыўна-прыкладнога мастацтва).

Даследуе праблемы развіцця беларускага прафесійнага, народнага, аматарскага мастацтва, творчасць сучасных беларускіх мастакоў.

З 1983 года – кандыдат мастацтвазнаўства.

З 1993 года з'яўляецца членам Саюза мастакоў Беларусі.

З 1997 года – прафесар мастацтвазнаўства.

Рыгор Фёдаравіч Шаўра з'яўляецца аўтарам больш за 150 навуковых прац, з іх 12 манаграфій і навучальных дапаможнікаў. Аўтар кніг: «Гаўрыла Вашчанка» (1978), «Міхась Засінец» (1981), «Альгерд Малішэўскі» (1988), «Творчасць Л. Трохалевай» (1981), «Пейзаж у беларускім жывапісе» (1980), «Перспектыва ў малюнку і жывапісе» (1999), «Малюнак у навучальным працэсе» (2003), «Развіццё народнага выяўленчага і дэкаратыўнага мастацтва Беларусі ў другой палове XIX – пачатку XXI стст.» (2006), «Народнае выяўленчае мастацтва» (2012), «Народныя мастацкія промыслы і дэкаратыўна-прыкладное мастацтва» (2015), «Малюнак» (2018).

Сярод мастацкіх твораў: «Над возерам Лепельскім» (1977), «Нацюрморт з гладыёлусамі» (1978), «Нацюрморт з сухіх кветак» (1982), «Над ракой Улай» (1997), «Настальгія» (1998), «Вячэрняя рапсодыя» (1998), «Кастрычніцкі мажор» (2000), «Лагойшчына зімой» (2002), «Гурзуф у кастрычніку» (2003), «Вечар на Заходняй Дзвіне» (2005), «Прыгожы» (2006), «На лепельскіх азёрах» (2007), «Туманная раніца» (2013), «Дарога на Вязынку» (2015), «На паўночнай Дзвіне», «Апошні сплаў», «Шэры дзень» і іншыя.

Яго творчыя работы знаходзяцца ў музеях Беларусі і прыватных галерэях Італіі, Англіі, Нарвегіі і іншых краінах Заходняй Еўропы.

Узнагароды: прэмія Прэзідэнта Рэспублікі Беларусь «За духоўнае адраджэнне» (2000), Дзяржаўная прэмія Беларусі (2003).

З 2009 года – доктар мастацтвазнаўства.

Жыве ў Мінску.

ЛІТАРАТУРА

1. Алимова, Е. Небо здесь не изменилось / Е. Алимова // Витебские вести. – 2018. – 11 мая. – С. 20.

2. Асоўская, К. Справаздача перад землякамі / К. Асоўская // Вiцебскi рабочы. – 2006. – 28 кастр. – С. 3.

3. Фатыхава, Г. А. Шаўра Рыгор Фёдаравіч / Г. А. Фатыхава // Культура Беларусі : энцыклапедыя : [у 6 т.] / рэдкал.: У. У. Андрыевіч [і інш.]. – Мінск : БелЭн імя П. Броўкі, 2015. – Т. 6 : М–Я. – С. 457–458.

4. Шауро Григорий Фёдорович // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 606.

5. Шауро Григорий Фёдорович // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн імя П. Броўкі, 2008. – Т. 7 : Снегирь–Ящерицын – С. 572.

6. Шаўра Рыгор Фёдаравіч // Беларускі Саюз Мастакоў = Belarussian Union of Artists : энцыклапедычны даведнік / аўт.-склад.: Б. А. Крэпак [і інш.] ; рэдкал.: Г. В. Буралкін [і інш.]. – Мінск : БТАА «Кавалер Паблішэрс», 1998. – С. 614.

СПАСЫЛКІ

 Беларускі дзяржаўны ўніверсітэт культуры і мастацтва. Шауро Григорий Федорович