Шчасная Нінэль Іванаўна нарадзілася 25 кастрычніка 1933 года ў г. Полацк у мнагадзетнай сям'і настаўнікаў. Жывапісец, графік, манументаліст. Член Беларускага Саюза архітэктараў (1963), Беларускага Саюза мастакоў (1966).

Пасля заканчэння 7 класаў агульнаадукацыйнай школы Нінэль Шчасная вучылася ў Мінскім мастацкім вучылішчы (1949–1954). У 1961 годзе скончыла жывапісны факультэт Інстытута жывапісу, скульптуры і архітэктуры імя І. Рэпіна ў Ленінградзе. З таго часу ўдзельнічае ў мастацкіх выстаўках. Стварыла сотні жывапісных і дзясяткі дэкаратыўна-прыкладных твораў, аформіла больш за 30 кніг і шэраг твораў станковай графікі і мастацкага посуду.

З 1966 года адбылося больш за 40 персанальных выставак Нінэль Шчаснай у Беларусі і за яе межамі. Да асноўных твораў можна аднесці палотны «Пад сонейкам», «Валошкі», «Пачвара і народ», «Пясочны гадзіннік. Аўтапартрэт», работы, прысвечаныя Вялікай Айчыннай вайне – «Самотная», «Толькі ягоная нявеста», «Вярнуўся. Партрэт М. А. Ладзіса, камандзіра 222-га Кобрынскага сапёрнага батальёна», партрэты І. Мележа, У. Дубоўкі, І. Шамякіна, А. Макаёнка, М. Матукоўскага, Р. Шырмы, П. Клімука, Я. Купалы, М. Багдановіча, «М. Танк і А. Куляшоў ля вогнішча», пейзажы «Бухара», «Вятры асеннія», «Спрадвечнае».

Творы мастачкі ёсць у Нацыянальным мастацкім музеі Беларусі, фондах Беларускага Саюза мастакоў, Нацыянальнага Полацкага гісторыка-культурнага музея-запаведніка, у Музеі сучаснага выяўленчага мастацтва ў Мінску, літаратурных музеях М. Багдановіча, Я.Купалы, іншых музеях Беларусі, а таксама ў прыватных калекцыях і галерэях розных краін свету.

Узнагароджана бронзавым медалём ВДНГ СССР, медалём «За заслугі ў выяўленчым мастацтве».

Памёрла Нінэль Іванаўна 14 мая 2013 года.

ЛІТАРАТУРА

1. Катляроў, І. Вясёлкавая віхура / І. Катляроў // Культура. – 2011. – 25 чэрв. – С. 7.

2. Нинель Счастной посвящается // Информ Плюс. – 2009. – 28 мая. – С. 7.

3. Птица-память... // Полацкі веснік. – 2013. – 18 мая. – С. 15.

4. Счастная Нинель Ивановна : некролог // Полацкі веснік. – 2013. – 18 мая. – С. 15.

5. Шчасная Нінэль Іванаўна // Памяць: Полацк : гісторыка-дакументальныя хронікі гарадоў і раёнаў Беларусі / рэдкал.: Г. П. Пашкоў [і інш.] ; склад. С. С. Чарняўская ; навук. рэд.: Г. В. Штыхаў, С. В. Тарасаў ; мастак Э. Э. Жакевіч. – Мінск : БелЭн, 2002. – С. 798–800.