Лісіцын Уладзімір Сяргеевіч
Лісіцын Уладзімір Сяргеевіч нарадзіўся 13 красавіка 1944 года ў канцлагеры Флігенорт (Германія), беларускі паэт.
Паходзіў з сялянскай сям'і, якая жыла ў в. Пагосцішча Лёзненскага раёна. У час вайны яго маці і старэйшы брат былі вывезены ў канцлагер. Пасля вызвалення яны вярнуліся ў родную вёску. Уладзімір вучыўся ў Крынкаўскай сярэдняй школе, дзе займаўся ў літаратурным і драматычным гуртках.
У 1965 годзе скончыў горнапрамысловае педагагічнае вучылішча (Лісічанск, Украіна). Працаваў шахцёрам у Данбасе. Настаўнічаў на Лёзненшчыне, супрацоўнічаў з раённай газетай «Сцяг Перамогі». У 1970 годзе завочна скончыў тэатразнаўчае аддзяленне Беларускага тэатральна-мастацкага інстытута.
Друкавацца пачаў у 1964 годзе: першы верш «У драмгуртку» апублікаваны ў газеце «Віцебскі рабочы». Потым яго вершы з'яўляліся ў газетах «Голас Радзімы», «Мінская праўда», «Вячэрні Мінск», часопісах «Нёман», «Вожык», «Маладосць», зборніку «Дзень паэзіі». У 1974 годзе выйшла яго першая кніга паэзіі «Жураўлінае вясло». Уключаныя ў яе вершы прысвечаны роднаму краю, яго прыродзе, каханню. Ім уласціва яркая вобразнасць, філасафічная заглыбленасць, песеннасць, афарыстычнасць. У паэме «Дзірваны» распавядаецца пра цяжкі лёс беларускага хлопчыка ў гады вайны.
Апошнія гады жыў у Джанкоі (Крым) – працаваў дырэктарам Палаца культуры, настаўнічаў у школе.
Памёр Уладзімір Сяргеевіч 12 ліпеня 1973 года.
ЛІТАРАТУРА
1. Бельскі, А. Жураўліная элегія / А. Бельскі // Роднае слова. – 2004. – № 4. – С. 14–16.
2. Гук, С. Памяці таленавітага паэта / С. Гук // Народнае слова. – 2000. – 15 крас. – С. 2.
3. Жычка, Х. З. Лісіцын Уладзімір Сяргеевіч / Х. З. Жычка // Энцыклапедыя літаратуры і мастацтва Беларусі : у 5 т. / рэдкал.: І. П. Шамякін [і інш.]. – Мінск : БелСЭ, 1986. – Т. 3 : Карчма–Найгрыш. – С. 265.
4. Зуева, Т. Оставили след в истории района / Т. Зуева // Сцяг Перамогi (Лёзна). – 2007. – 14 ліп. – С. 7.
5. Симанович, Д. Сын освобождения и Победы / Д. Симанович // Народная газета. – 2004. – 17 крас. – С. 8.
6. Уладзімір Лісіцын // Беларускія пісьменнікі (1917–1990) : даведнік / склад. А. К. Гардзіцкі. – Мінск : Мастацкая літаратура, 1994. – С. 336.
7. Урупіна, Г. М. Лісіцын Уладзімір / Г. М. Урупіна, Т. М. Махнач // Беларускія пісьменнікі : біябібліяграфічны слоўнік : у 6 т. / рэдкал.: І. Э. Багдановіч [і інш.] ; маст. рэд. В. Г. Загародні. – Мінск : БелЭн, 1994. – Т. 4 : Лазарук–Перкін. – С. 49–50.
СПАСЫЛКІ
