Сушко Пятро (Пётр Паўлавіч)
Сушко Пятро (Пётр Паўлавіч) нарадзіўся 1 студзеня 1937 года ў в. Сушкі Браслаўскага павета Віленскай губерні (зараз Мёрскі раён) у сям'і Паўла Міхайлавіча Сушко. Паэт.
Паэтычная творчасць бацькі аказала непасрэднае ўздзеянне на выбар шляху Пятра Паўлавіча.
У 1953 годзе скончыў Чараскую сямігодку, у 1956 годзе – Міёрскую сярэднюю школу. У 1956–1958 гг. працаваў выхавацелем Аляксандраўскага дзіцячага дома Мёрскага раёна, лабарантам у сярэдняй школе. У 1966 годзе скончыў факультэт журналістыкі Беларускага дзяржаўнага ўніверсітэта. У 1966–1968 гг. працаваў загадчыкам аддзела мёрскай раённай газеты «Сцяг працы», у 1968–1969 гг. – карэспандэнтам газеты «Віцебскі рабочы».
Пераехаўшы ў Мінск, працаваў літсупрацоўнікам газеты «На страже Октября» (1969–1970), «Звязда» (1970–1973), часопіса «Вожык» (1973–1977), у 1977–1980 гг. – рэдактар аддзела літаратуры. У 1980–1987 гг. – адказны сакратар штотыднёвіка «Літаратура і мастацтва». З 1989 года працаваў старшым рэдактарам у выдавецтве «Полымя».
Друкавацца Пётр Сушко пачаў у 1954 годзе ў мёрскай газеце «Зара камунізму» (верш «Цёплы дожджык»).
З 1984 года – член Саюза пісьменнікаў Беларусі.
Аўтар зборнікаў сатырычных і гумарыстычных вершаў, баек, мініяцюр, вершаваных фельетонаў, пародый і эпіграм: «Ганарлівы сучок» (1975), «Восці напагатоў» (1978), «Парнаская кузня» (1981), «Касіў Ясь канюшыну» (1976), «Роздум ля Парнаса» (1983, пад псеўд. Кірша Рымар). Яго кніга «Паэтычнае веча» – першы ў беларускай літаратуры вянок парадыйных санетаў, якія вызначаюцца глыбокім філасофскім зместам. Плённа працаваў аўтар і ў жанры лірыкі. Яго зборнік «Пратокі» (1976) і вянок санетаў «Зямля гаючых траў» вызначаюцца глыбінёй пачуццяў, узнёсласцю думак, арыгінальнасцю вобразаў. Пісаў вершы і для дзяцей: зборнікі «Вясёлы Бай» (1980), «Чмялёва гушкалка» (1986), «Ехаў кот у лес па дровы» (1990).
Памёр Пётр Паўлавіч 20 лістапада 1996 года.
ЛІТАРАТУРА
1. Бялевіч, Л. А. Сушко Пятро / Л. А. Бялевіч, В. І. Козіч // Беларускія пісьменнікі : біябібліяграфічны слоўнік : у 6 т. / рэдкал.: І. Э. Багдановіч [і інш.]. – Мінск : БелЭн імя П. Броўкі, 1995. – Т. 5 : Пестрак–Сяўрук. – С. 454–456.
2. Жыбуль, В. Пятро Сушко / В. Жыбуль // Роднае слова. – 2007. – № 1. – С. 45.
3. Матэленак, Л. Прыгадаю – і былое вернецца / Л. Матэленак // Мiёрскiя навiны. – 2006. – 1 студз. – С. 4.
4. Не зарасці пракладзенаму следу: Сушко Пётр Паўлавіч // Міёрскія навіны. – 2017. – 27 чэрв. – С. 6.
5. Саламевіч, І. У. Сушко Пятро (Пётр Паўлавіч) / І. У. Саламевіч // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 2002. – Т. 15 : Следавікі–Трыо. – С. 300.
6. Собаль, В. Паэты з Сушкоў / В. Собаль // Віцебскі рабочы. – 1997. – 1 студз. – С. 2.
7. Сушко Петро (Пётр Павлович) // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 500.
СПАСЫЛКІ
