Зубаў Руслан Цімафеевіч нарадзіўся ў 1941 годзе ў г. п. Лёзна.

У 1959 годзе скончыў Беларускую сярэднюю школу №1. Займаўся спортам, быў чэмпіёнам Віцебскай вобласці, прызёрам першынства Беларусі сярод школьнікаў па лёгкай атлетыцы.

У 1964 годзе паспяхова скончыў Разанскае вышэйшае паветрана-дэсантнае вучылішча, 9 гадоў служыў у ПДВ на розных пасадах. У 1963 годзе атрымаў сярэбраны значок «Майстар спорту СССР». А ў 1967 годзе стаў сярэбраным прызёрам чэмпіянату Расіі па марафоне і атрымаў ужо другі значок «Майстар спорту СССР». У 1969 годзе паступіў у Ваенную Акадэмію тылу і транспарту. Пасля заканчэння яе служыў на розных адміністрацыйна-гаспадарчых пасадах. Апошняя пасада – першы намеснік начальніка Цэнтральнага рэчавага ўпраўлення Міністэрства абароны РФ. У 1971 годзе выканаў норму майстра спорту СССР па афіцэрскім пяцібор'і, стаўшы сярэбраным прызёрам чэмпіянату Узброеных Сіл СССР. У 1976 годзе пасля 218-га скачка з парашутам атрымаў траўму левага галёнкаступнёвага суставу, далей медыкі забаранілі яму удзельнічаць у спаборніцтвах.

Звольніўся ў запас у 1996 годзе ў званні генерал-маёра, адслужыўшы ва Узброеных Сілах СССР і РФ 38 гадоў. Апошнія гады жыў у Маскве.

Узнагароджаны ордэнам Чырвонай Зоркі, медалямі.

Памёр Руслан Цімафеевіч у 2014 годзе.

ЛІТАРАТУРА

1. Шедченко, А. Генерал с улицы героев / А. Шедченко // Сцяг Перамогі (Лёзна). – 2018. – 7 снеж. – С. 7 ; 11 снеж. – С. 7.