Музей прыроды Бярэзінскага біясфернага запаведніка. Лепельскі раён, в. Домжарыцы

Подробности

Створана 02.05.2019 12:23

Адноўлена 02.05.2019 14:11

Музей прыроды Бярэзінскага біясфернага запаведніка заснаваны вясной 1940 года.

У час Вялікай Айчыннай вайны ўся маёмасць, архіўныя дадзеныя і будынак музея былі знішчаны нямецка-фашысцкімі захопнікамі.

У 1949 годзе музей зноў адкрыў свае дзверы для наведвальнікаў.

У 1951 годзе, у сувязі з ліквідацыяй Бярэзінскага запаведніка, усе калекцыйныя фонды музея былі перададзены Беларускаму дзяржаўнаму ўніверсітэту.

У студзені 1983 года ў в. Домжарыцы быў адкрыты музей прыроды. Месціцца ўстанова ў прыбудове да адміністрацыйнага будынка. Два паверхі плошчай 400 м2 застаўлены экспанатамі-чучаламі звяроў, птушак, рыб, паўзуноў, земнаводных. Выстаўлены дыярамы: «Бабры», «Ваўкі», «Дзікі кабан», «Зубр», «Лось», «Журавы» і іншыя.

Знаёміць з жыццем жывёльнага свету багата абстаўленая інфармацыйная зала. Яе аздабляў віцебскі мастак Мікалай Дундзін.

У экспазіцыйныя залы гарманічна ўпісаліся вялікія фотаздымкі вучонага і фатографа Дзяніса Іўковіча, якія яскрава адлюстроўваюць унікальную прыроду.

У экспазіцыі прадстаўлены карта з указаннем усіх нацыянальных паркаў і запаведнікаў Беларусі і карта Бярэзінскага біясфернага запаведніка.

Наведванне музея прыроды – толькі пачатак знаёмства з дзейнасцю Бярэзінскага біясфернага запаведніка і яго жыхарамі. Далей пачынаецца чатырохкіламетровая экалагічная сцежка, якая знаёміць турыстаў з навакольнымі ландшафтамі. У асноўным музей наведваюць групы школьнікаў і студэнтаў з Лепеля, Мінска, Віцебска, Полацка, Оршы, Барысава, Магілёва, тыя, хто адпачывае ў санаторыях «Баравое», «Лясное», пансіянаце «Лясныя азёры», дзіцячым рэабілітацыйным цэнтры «Жамчужына».

Наведваюць музей і замежныя турысты з Германіі, Швейцарыі, Польшчы, Францыі, Кітая, Расіі.

У музеі праходзяць міжнародныя форумы на экалагічную тэматыку.

У жніўні 2003 года на абласным экалагічным форуме Домжарыцкі музей прыроды заняў першае месца.

Адрас: Віцебская вобласць, Лепельскі раён, в. Домжарыцы, вуліца Цэнтральная, дом 3.

ЛІТАРАТУРА

1. Кляшчук, А. Фоталетапісец запаведных мясцін / А. Кляшчук // Звязда. – 2018. – 24 сак. – С. 1.

2. Музей природы Березинского биосферного заповедника // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 2. – С. 149–150.

3. Натараў, В. Запрашае заалагічны музей / В. Натараў // Віцебскі рабочы. – 1983. – 20 кастр. – С. 4.

4. Эсенскі, Ц. Музей прыроды / Ц. Эсенскі // Лепельскi край. – 2003. – 30 верас. – С. 3.