Музей этнаграфічны «Беларуская хатка». Глыбоцкі раён, в. Азярцы

Подробности

Створана 08.10.2019 12:23

Адноўлена 08.10.2019 14:27

У музеі прадстаўлены рэчы з сялянскага побыту беларусаў мінулага стагоддзя. Тут сабрана больш за 200 экспанатаў. Цэнтральнае месца ў «Беларускай хатцы» займае покуць («чырвоны кут»). Яе галоўны атрыбут – праваслаўны абраз Святой Кацярыны Пакутніцы, аздоблены ўзорным ручніком-набожнікам. Ёсць у музеі і «бабін кут» («качарэжнік»), аснову якога складае вялікая сялянская печ з адпаведнымі прадметамі вясковага быту – лыжкамі, дзежкамі, кадушкамі, кацялкамі, глінянымі кубкамі, драўлянымі начоўкамі, вёдрамі, міскамі, каромысламі і многім іншым.

За печчу ў «хатцы» знаходзіцца «куток адпачынку», прадстаўлены вялікім драўляным ложкам і дзіцячай люлькай.

«Беларуская хатка» – сапраўдны музей жаночых рамёстваў. Тут шмат саматканых, вышываных, вязаных рэчаў, стракатых насценных дываноў, карцін, узорных выцінанак, самаробных лялек.

У музеі можна ўбачыць такія прылады для апрацоўкі льну і вырабу тканіны, як калаўрот, матавіла, прасніца, шчоткі для часання.

Кожны экспанат музея здольны расказаць шмат цікавага з гісторыі Азярэцкага краю наведвальнікам.

Адрас: Віцебская вобласць, Глыбоцкі раён, в. Азярцы, вуліца Савецкая, 8 а.

ЛІТАРАТУРА

1. Гуйда, Л. «Беларуская хатка», альбо Азярэцкі музей этнаграфіі / Л. Гуйда // Веснік Глыбоччыны. – 2010 – 14 жн. – С. 7.

2. Мышкоўская, Л. На шчасце, на долю / Л. Мышкоўская // Веснік Глыбоччыны. – 2015. – 31 студз. – С. 8.