Ахрэмаўцы, аг., Браслаўскі раён
- Подробности
- Створана 28.08.2017 12:23
- Адноўлена 30.08.2017 07:39
| Назва | Ахрэмаўцы |
| Адміністрацыйна-тэрытарыяльная адзінка | аграгарадок |
| Вобласць | Віцебская |
| Раён | Браслаўскі |
| Сельскі Савет | Ахрэмавіцкі |
| Першае ўзгадванне | 1748 |
Аграгарадок (з 2006 года) Ахрэмаўцы размешчаны на ўсходнім беразе возера Дрывяты, за 10 км на паўднёвы ўсход ад Браслава, на шашы Браслаў – Глыбокае. Назва паходзіць ад прозвішча Ахрэмавічаў, якія валодалі мясцовымі землямі ў XVII ст. 3 сярэдзіны XVIII ст. вёска адносілася да маёнтка Бяльмонты. У XIX – пачатку XX ст. Ахрэмаўцы – вёска Браслаўскай воласці Новааляксандраўскага павета, 300 жыхароў (1903), у перыяд Заходняй Беларусі – вёска Браслаўскай гміны, 74 дамы, 360 жыхароў (1931). У гады Вялікай Айчыннай вайны вёска была амаль цалкам знішчана (уцалела 9 дамоў з 93).
У 1995 годзе мелася 1549 жахароў, 495 гаспадарак. У 2009 г. – 516 гаспадарак, 1374 жыхары. Цэнтр сельсавета, сядзіба калгаса «Шлях Леніна». Дзейнічаюць прадпрыемствы: Браслаўскі торфабрыкетны завод, Браслаўскае прадпрыемства па вытворча-тэхнічным абслугоўванні сельскай гаспадаркі, Браслаўскае прадпрыемства па матэрыяльна-тэхнічным забеспячэнні аграпрамысловага комплексу. Працуюць сярэдняя і музычная школы, дзіцячы сад, 2 Дамы культуры, бібліятэка, 7 дзяржаўных і 2 прыватныя крамы, прадпрыемствы бытавога абслугоўвання, 2 лазні, фельчарска-акушэрскі пункт, аддзяленне сувязі.
У 1976 годзе да в. Ахрэмаўцы была далучана в. Бяльмонты. Захаваліся помнікі: курганны могільнік Бяльмонты, парк Бяльмонты, капліца XIX ст. на каталіцкіх могілках, мемарыяльная дошка ў гонар Азяраўскага антыфашысцкага падполля, скульптурная кампазіцыя на брацкай магіле савецкіх воінаў і партызанаў.
|
ЛІТАРАТУРА
1. Ахрэмаўцы // Памяць: Браслаўскі раён : гісторыка-дакументальныя хронікі гарадоў і раёнаў Беларусі / рэдкал.: К. В. Велічковіч [і інш.] ; уклад. К. С. Шыдлоўскі ; мастак Э. Э. Жакевіч. – Мінск : Паліграфафармленне, 1998. – С. 666.
2. Максімовіч, Д. Ленінскія мары – у сённяшняй яве / Д. Максімовіч // Браслаўская звязда. – 1980. – 21 лют. – С. 2.
3. Набеева, А. З любоўю да радных мясцін / А. Набеева // Браслаўская звязда. – 2015. – 22 жн. – С. 2.
4. Шпакоўская, Г. Ахрэмаўцы / Г. Шпакоўская // Народнае слова. – 2005. – 21 чэрв. – С. 4.
