Афганистан. Без права на забвение

Афганистан. Без права на забвение

Афганистан. Без права на забвение

Художники Витебщины

Художники Витебщины

Художники Витебщины

Дом рамёстваў «Стары млын», ДУК. Пастаўскі раён, г. Паставы

 

Сучасная назва Дом рамёстваў «Стары млын»
Тып дзяржаўная ўстанова культуры
Дата заснавання 1988
Месца знаходжання  Віцебская вобласць, Пастаўскі раён, г. Паставы

 

Пастаўскі Дом рамёстваў «Стары млын» быў адчынены ў 1998 г. Установа размясцілася ў будынку «Вадзянога млына», помніка прамысловай архітэктуры канца XIX – пач. XX ст.

Зараз тут працуюць чатыры выставачныя залы, ёсць майстэрні для вядзення гурткоў, метадычныя кабінеты. Асноўная мэта, якую ставяць работнікі Дома рамёстваў, – развіццё традыцый рэгіёна, падтрымка майстроў і захаванне народных рамёстваў, пераемнасць пакаленняў і ўзбагачэнне прыкладнога мастацтва. Работа па захаванні і перадачы гэтай спадчыны вядзецца ў гуртках па народнай вышыўцы, вязанні, аплікацыі з саломкі, саломапляценні, кераміцы, ганчарстве, народным ткацтве, габелене, пляценні паясоў.

У выставачных залах экспануюцца прадметы народнай творчасці, праводзяцца жанравыя выстаўкі, вернісажы мастакоў, аформлена зала-музей музычнай культуры Пастаўшчыны, вядзецца праца па стварэнні залы-музея «Млынарства і хлеб», якая прадставіць млынарскія традыцыі Пастаўшчыны, абрадавую выпечку.

Творчы калектыў Дома рамёстваў не раз меў гонар прадстаўляць Пастаўшчыну на раённых, мясцовых, рэспубліканскіх святах і конкурсах, былі прадстаўлены выставачныя калекцыі і за мяжой. Маюцца цесныя сувязі з калектывамі Эстоніі, Польшчы, Літвы, Латвіі, Расіі, Украіны.

Майстры Пастаўскага Дома рамёстваў з'яўляліся дыпламантамі рэспубліканскіх і міжнародных конкурсаў і фестываляў: «Славянскі базар у Віцебску», «Звіняць цымбалы і гармонік», «Ганчарны Круг», «Дажынкі», «Лазовы прут», «Свята разьбярства», «Берагіня» і інш.

Па выніках працы за 2005 г., Пастаўскі Дом рамёстваў «Стары млын» атрымаў узнагароду ў намінацыі «Лепшы Дом рамёстваў» на абласным конкурсе прафесійнага майстэрства. У 2014 г. таксама ўдастоены звання лепшага ў вобласці.

У мэтах адраджэння, развіцця, папулярызацыі народных мастацкіх промыслаў і рамёстваў, а таксама павышэння прафесійнага ўзроўню, удасканалення навыкаў майстэрства, майстры Дома рамёстваў прынялі ўдзел, арганізавалі і правялі самі 39 выстаў за студзень – жнівень 2013 г.

Дырэктар «Старога млына» Таццяна Петух – член Саюза майстроў Беларусі, надзвычай таленавітая майстрыха, валодае рознымі тэхналогіямі старажытных рамёстваў, арганізуе батлейку, дзе з ахвотай іграе дзятва. Вольга Гукава – адметны майстар-ганчар, яна ўмела спалучыла гліну з іншымі матэрыяламі. А яшчэ яна займаецца маляванкай і выцінанкай, вырабляе сувеніры. Метадыст Алена Крывенькая спецыялізуецца на ткацтве.

Таксама ў «Старым млыне» збіраюць рэцэпты нацыянальнай кухні, аднаўляюць абрады і гульні, якія былі распаўсюджаны на пастаўскай зямлі ў мінулым. Тут ў сяброўстве суседнічаюць Дом рамёстваў і Цэнтр культуры і народнай творчасці, майстры ткуць, вышываюць, плятуць пад музыку і песні самадзейных артыстаў, разам зберагаюць традыцыі продкаў, захоўваюць пераемнасць пакаленняў і ўзбагачаюць культуру народа.

Пастаўскі Дом рамёстваў уваходзіць у турыстычны маршрут і з'яўляецца для наведвальнікаў адным з найцікавейшых мясцін Пастаўшчыны. Ва ўстанове працуе салон-магазін, дзе кожны можа набыць вырабы народнага, самабытнага мастацтва.

Адрас: Віцебская вобласць, Пастаўскі раён, г. Паставы, вуліца Чырвонаармейская, д. 10.

 

Дом рамёстваў «Стары млын» у г. Паставы. Фотаздымак з сайта https://westki.info/Дом рамёстваў «Стары млын» у г. Паставы. Фотаздымак з сайта http://www.icr.su/ Дом рамёстваў «Стары млын» у г. Паставы. Фотаздымак з сайта https://orda.of.by/

ЛІТАРАТУРА

1. Александровіч, К. Натхненне сілкуе таленты / К. Александровіч // Вольнае Глыбокае. – 2014. – 10 крас. – С. 2.

2. Анішкевіч, А. Бэзавы куст «Старога млына» / А. Анішкевіч // Пастаўскі край. – 2018. – 20 чэрв. – С. 5.

3. Гамзовіч, Р. «Стары Млын» у Паставах працуе спраўна! / Р. Гамзовіч // Голас Радзiмы. – 2006. – 24 жн. – С. 11–12.

4. Гнілазуб, В. У «Старога млына» зноў выраслі крылы / В. Гнілазуб // Белорусская нива. – 2004. – 9 окт. – С. 18.

5. Жилинская, М. Возрожденный «Стары млын» / М. Жилинская // Народная газета. – 2000. – 9 жн. – С. 4.

6. Жучка, М. «Стары млын» збірае майстроў / М. Жучка // Рэспубліка. – 2005. – 28 верас. – С. 4.

7. Касаткіна, Ф. Новае жыццё «Старога млына» / Ф. Касаткіна // Пастаўскі край. – 2006. – 2–3 верас. – С. 5.

8. Лістапад, Ю. А ў млыне старым ткуць гісторыю кросны / Ю. Лістапад // Народная газета. – 2001. – 20 чэрв. – С. 4.

9. Лукович, Н. Старая мельница – хранительница традиций / Н. Лукович // Народнае слова. – 2006. – 10 студз. – С. 5.

10. Пастаўскі Дом рамёстваў «Стары млын» // Памяць: Пастаўскі раён : гісторыка-дакументальныя хронікі гарадоў і раёнаў Беларусі / рэдкал.: Г. К. Кісялёў [і інш.] ; уклад.: К. І. Козак, А. І. Кузняцоў ; рэд.-склад. Г. К. Кісялёў ; мастак Э. Э. Жакевіч. – Мінск : Белта, 2001. – С. 570–571.

11. Пашкевіч, Т. Пануюць творчасць і прыгажосць / Т. Пашкевіч // Витебские вести. – 2018. – 18 дек. – С. 7.

12. Пішч, Г. І майстар-клас ад майстра / Г. Пішч // Пастаўскі край. – 2009. – 2 ліп. – С. 16.

13. Поставский Дом ремёсел «Стары млын» // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 359–360.

14. Старая мельница собирает мастеров // 7 дней. – 2006. – 12 янв. – С. 9.

15. Шапавалава, А. МЛЫН творчасці і майстэрства / А. Шапавалава // Пастаўскі край. – 2013. – 6 чэрв. – С. 6.

16. Шапавалава, А. Пахне хлебам саломка / А. Шапавалава // Пастаўскi край. – 2006. – 16 лістап. – С. 8.

17. Шапавалава, А. Спадчына ў фота і рамёствах / А. Шапавалава // Пастаўскі край. – 2018. – 14 сак. – С. 4.

18. Шапавалава, А. Ткуць, плятуць, вышываюць, распісваюць... / А. Шапавалава // Пастаўскі край. – 2018. – 7 чэрв. – С. 6.

 

СПАСЫЛКІ

arrow  Поставы – «Стары млын» Дом ремёсел