Цэнтр дзяцей і моладзі, ДУДА. Ушацкі раён, г. п. Ушачы

Подробности

Створана 12.05.2020 08:40

Адноўлена 12.05.2020 09:53

Ушацкі раённы Цэнтр дзяцей і моладзі пачаў сваю дзейнасць з 1968 года як Дом піянераў. У 1993 годзе ён быў перайменаваны ў раённае аб'яднанне па арганізацыі пазашкольнай работы, а ў 1998 годзе – у Цэнтр пазашкольнай работы. З 2012 года ўстанова мае сучасную назву – ДУДА «Ушацкі раённы Цэнтр дзяцей і моладзі».

Асноўныя задачы: забеспячэнне неабходнай колькасці рознапрофільных аб'яднанняў па інтарэсах, садзейнічанне арганізацыі змястоўнага вольнага часу дзяцей і моладзі; развіццё творчых здольнасцяў навучэнцаў і ўдзел адоранай моладзі ў рэгіянальных і рэспубліканскіх мерапрыемствах розных напрамкаў; развіццё дзіцяча-юнацкага турызму і краязнаўства праз удзел у акцыі «Жыву ў Беларусі і тым ганаруся», рэспубліканскім конкурсе «Пазнай Радзіму – выхавай сябе» і інш.

Ва ўстанове арганізавана работа 54 аб'яднанняў па інтарэсах. Яны працуюць на базе раённага Цэнтра дзяцей і моладзі і 8 ўстаноў адукацыі раёна (5 школ і 3 установы дашкольнай адукацыі).

Напрамкі дзейнасці:

– грамадзянска-патрыятычны;

– турысцка-краязнаўчы;

– мастацка-эстэтычны;

– выхаванне культуры вольнага часу;

– фарміраванне навыкаў ЗЛЖ.

Усяго ў аб'яднаннях па інтарэсах ДУДА «Ушацкі раённы Цэнтр дзяцей і моладзі» на пачатак 2019/2020 навучальнага года было занята звыш 600 навучэнцаў, што складае 50 % ад агульнай колькасці навучэнцаў раёна. З імі працуюць 22 педагагічныя работнікі.

Структурным падраздзяленнем ДУДА «Ушацкі раённы Цэнтр дзяцей і моладзі» з'яўляецца аздараўленчы лагер «Турасполле», які размешчаны ва ўсходняй частцы Ушацкага раёна. Лагер знаходзіцца на беразе р. Дзіва, недалёка ад гідралагічнага заказніка «Возера Крывое». Аздараўленчы лагер працуе ў тры змены. Старшы атрад лагера мае эколага-біялагічны профіль.

Ушацкім раённым Цэнтрам дзяцей і моладзі аказваюцца дадатковыя платныя паслугі: правядзенне культурна-забаўляльных мерапрыемстваў (навагоднія святы, дні нараджэння, пракат музычнай апаратуры і інш.); распрацоўка сцэнарыяў, выраб сувеніраў (падарункаў) з саломы, бяросты; бутаньерак, букетаў, пано і інш.

Адрас: Віцебская вобласць, Ушацкі раён, г. п. Ушачы, вуліца Ленінская, 15-2.

ЛІТАРАТУРА

1. Барановiч, Н. Выстава дзiцячай творчасцi / Н. Барановiч // Патрыёт (Ушачы). – 1999. – 15 мая. – С. 6.

2. Вяль, Л. Весткі з цэнтра пазашкольнай работы / Л. Вяль // Патрыёт (Ушачы). – 2003. – 5 лют. – С. 2.

3. Давыдава, Л. Убачыць чароўнае ў звычайным / Л. Давыдава // Настаўніцкая газета. – 2018. – 10 лют. – С. 11.

4. Каваленка, Н. М. Занятак знойдзецца кожнаму / Н. М. Каваленка ; гутарыў А. Пашковіч // Патрыёт (Ушачы). – 2008. – 6 верас. – С. 3.

5. Каваленка, Н. Праз творчасць – да поспеху / Н. Каваленка // Патрыёт (Ушачы). – 2013. – 27 крас. – С. 2.

6. Камаркова, В. Майстры барабаннай справы / В. Камаркова // Патрыёт (Ушачы). – 2017. – 1 лістап. – С. 5.

7. Футарман, А. Выхаваўчая роля спадчыны / А. Футарман // Настаўніцкая газета. – 2019. – 2 сак. – С. 7.