Вучылішча Віцебскае кадэцкае, ДУА. Віцебскі раён, п. Лужасна

Подробности

Створана 18.04.2017 08:40

Адноўлена 02.04.2019 14:38

Дзяржаўная ўстанова адукацыі «Віцебскае кадэцкае вучылішча» створана на падставе рашэння Віцебскага аблвыканкама ад 12 красавіка 2011 г. № 223. Адкрыццё адбылося 1 верасня 2011 г. Вучылішча сфармавана шляхам рэарганізацыі Лужаснянскай школы-інтэрната-гімназіі для здольных і таленавітых дзяцей Віцебскай вобласці. Гэта дазволіла выкарыстоўваць інавацыйны вопыт педагагічнага калектыву, надаваць павышаную ўвагу патрыятычнаму выхаванню і фізічнай культуры дзяцей з высокім узроўнем іх падрыхтоўкі па агульнаадукацыйных дысцыплінах. Выпускнікі Віцебскага кадэцкага вучылішча паспяхова паступаюць ва ўстановы адукацыі сілавых структур і іншыя найбольш рэйтынгавыя ВНУ.

Кадэцкае вучылішча – установа агульнай сярэдняй адукацыі, якая выконвае задачы атрымання навучэнцамі (кадэтамі) базавай адукацыі, сярэдняй адукацыі, а таксама першасных ведаў і навыкаў, неабходных для службы ва Узброеных Сілах, органах памежнай службы, унутраных войсках, Следчым камітэце, Дзяржаўным камітэце судовых экспертыз, органах унутраных спраў, органах і падраздзяленнях па надзвычайных сітуацыях Рэспублікі Беларусь. Віцебскае кадэцкае вучылішча мае Знамя (уручана 1 верасня 2011 г.) і геральдычны знак. Воінскім навучаннем кадэтаў займаюцца афіцэры запасу.

ДУА «Віцебскае кадэцкае вучылішча» размешчана ў в. Лужасна. Віцебскае кадэцкае вучылішча размяшчаецца ў адасобленым гарадку, тэрыторыя якога аб'ядноўвае ўсе навучальныя, спартыўныя, бытавыя і адміністрацыйныя аб'екты, у маляўнічым месцы паміж лясным масівам і ракой Заходняя Дзвіна. Вучылішча мае ўласны транспарт, які забяспечвае выезд кадэтаў на спартыўныя спаборніцтвы і экскурсіі ў абласны цэнтр і іншыя гарады. Кадэты з'яўляюцца пастаяннымі ўдзельнікамі ўрачыстых мерапрыемстваў, якія праводзяцца кіраўніцтвам вобласці, горада Віцебска, Віцебскага гарнізона, упраўленнямі ўнутраных спраў і МНС.

У вучылішчы добрая матэрыяльна-тэхнічная база. У навучальных кабінетах устаноўлена сучаснае абсталяванне, кадэты забяспечаны класамі для самападрыхтоўкі, у іх распараджэнні бібліятэка з кніжным і мультымедыйным фондамі, доступ да сеткі Інтэрнэт. Працуюць факультатывы па прадметах навучання, праводзяцца заняткі па стральбе, рукапашным баі, парашутным спорце, крыміналістыцы, бальных танцах і іншыя. Дзейнічае спорткомплекс, які быў пабудаваны ў 2009 годзе, футбольнае поле са штучным пакрыццём, хакейная каробка. Маюцца цір, страявы пляц, а таксама танцавальная зала і «кадэцкае кафэ».

У Віцебскім кадэцкім вучылішчы навучаюцца юнакі і дзяўчаты 8–11 класаў. Знаходжанне кадэтаў у вучылішчы ў дні заняткаў кругласутачнае, у выходныя дні ажыццяўляецца выезд да месца пастаяннага жыхарства (звальненне) з бацькамі або самастойна. Кадэты забяспечваюцца бясплатна месцам у інтэрнаце, паўсядзённым і парадным форменным адзеннем па сезоне, а падчас знаходжання ў вучылішчы (уключаючы вучэбна-палявыя зборы) – чатырохразовым гарачым харчаваннем. Перыяды і працягласць канікул такія ж, як ва ўсіх відах устаноў агульнай сярэдняй адукацыі.

Адрас: Віцебская вобласць, Віцебскі раён, п. Лужасна, вул. М. Лынькова, д. 3.

ЛІТАРАТУРА

1. Александрова, Т. Служить Отчизне суждено тебе и мне / Т. Александрова // Жыццё Прыдзвіння (Віцебск). – 2018. – 23 лют. – С. 1.

2. Бакевич, Э. Сменили форму / Э. Бакевич // Витебские вести. – 2014. – 20 мая. – С. 7.

3. Грэчка, І. Разам, адной камандай / І. Грэчка // Настаўніцкая газета. – 2018. – 2 чэрв. – С. 13.

4. Камлёва, Н. Дело чести / Н. Камлёва // Витебские вести. – 2018. – 22 февр. – С. 1, 5.

5. Кутынко, А. Приглашаем в кадеты! / А. Кутынко // Витебские вести. – 2014. – 27 марта. – С. 3.

6. Петрова, Е. У витебских кадетов – «бронза» / Е. Петрова // Витебские вести. – 2017. – 24 янв. – С. 5.

7. Сахарова, С. Кадеты молодцы! / С. Сахарова // Твой город (Витебск). – 2016. – 10 нояб. – С. 7.

8. Сырамаха, А. Вандруем разам / А. Сырамаха, М. Півавар // Витебские вести. – 2018. – 17 мая. – С. 20.

9. Шпаковская, Г. Возрождается кадетство / Г. Шпаковская // Народнае слова. – 2011. – 3 верас. – С. 2.