Каледж Пастаўскі дзяржаўны, УА. Пастаўскі раён, г. Паставы
- Подробности
- Створана 18.04.2017 08:40
- Адноўлена 28.02.2019 10:48
| Сучасная назва | УА «Пастаўскі дзяржаўны каледж» |
| Былая назва | Пастаўскае рамеснае вучылішча па механізацыі сельскай гаспадаркі № 2 (1955) |
| Пастаўскае сельскае прафесійна-тэхнічнае вучылішча № 2 (1962) | |
| Пастаўскае сярэдняе сельскае прафесійна-тэхнічнае вучылішча № 2 (1979) | |
| Сярэдняе прафесійна-тэхнічнае вучылішча № 165 (1984) | |
| Прафесійна-тэхнічнае вучылішча № 165 сельскагаспадарчай вытворчасці (1989) | |
| Пастаўскі дзяржаўны прафесійна-тэхнічны ліцэй (2000) | |
| Пастаўскі дзяржаўны прафесійна-тэхнічны каледж сельскагаспадарчай вытворчасці (2003) | |
|
Тып |
установа адукацыі |
| Дата заснавання | 1955 |
| Месца знаходжання | Віцебская вобласць, Пастаўскі раён, г. Паставы |
| Сайт | http://gptk.by/ |
Гісторыя ўтварэння Пастаўскага дзяржаўнага каледжа пачынаецца з 1955 г. У краіне пачалі падымаць сельскую гаспадарку, асвойваць цалінныя землі і для выканання гэтых найважнейшых дзяржаўных задач патрабаваліся кваліфікаваныя кадры: трактарысты, камбайнёры, шафёры.
Згодна з загадам Галоўнага ўпраўлення працоўных рэзерваў ад 3 жніўня 1955 г. № 231, 19 жніўня № 256 і ад 26 лютага 1955 г. № 65 і загадам Беларускага Рэспубліканскага ўпраўлення працоўных рэзерваў ад 2 верасня 1955 г. № 109 ажыццявіць прыём навучэнцаў з 1 кастрычніка 1955 г. у рамеснае вучылішча. Такім чынам, у Паставах у кастрычніку 1955 г. было адкрыта Рамеснае вучылішча па механізацыі сельскай гаспадаркі № 2.
Першым дырэктарам вучылішча быў прызначаны Камісараў Н. М. Першы прыём навучэнцаў для падрыхтоўкі трактарыстаў з шасцімесячным тэрмінам навучання склаў 150 чалавек. Было створана пяць груп па 30 чалавек у кожнай.
У вучылішча былі залічаны навучэнцы з 12 раёнаў Беларусі: Пастаўскі, Дзісненскі, Валожынскі, Шаркаўшчынскі, Радашковіцкі, Мядзельскі, Шклоўскі, Глыбоцкі, Смаргонскі, Пліскі, Докшыцкі, Міёрскі.
Нацыянальны склад навучэнцаў: беларусаў – 142, рускіх – 7, украінцаў – 1.
Першы выпуск вучылішча адбыўся 28 сакавіка 1956 г. Навучэнцы атрымалі прафесію трактарыст і слесар 3-га разраду. 85 чалавек былі накіраваны на працу ў Паўладарскае абласное ўпраўленне сельскай гаспадаркі, Акмалінскую вобласць Казахскай ССР. Астатнія былі размеркаваны ў Пастаўскую МТС, Маладзечанскае абласное ўпраўленне сельскай гаспадаркі.
Другі прыём навучэнцаў у вучылішча адбыўся 12 сакавіка 1956 г., згодна загаду начальніка Беларускага Рэспубліканскага ўпраўлення працоўных рэзерваў ад 24 снежня 1955 г. № 159 па прафесіі трактарыст-машыніст шырокага профілю і слесар 3-га разраду тэрмінам навучання 1 год.
Залічана ў вучылішча 210 чалавек, з іх 8 дзяўчат. Пасля заканчэння вучылішча яны былі накіраваны на працу ў Казахскую ССР.
Другі выпуск вучылішча адбыўся 6 лютага 1957 г.
Нягледзячы на тое, што з дня ўтварэння рамеснага вучылішча МСХ № 2 было падрыхтавана больш за 360 спецыялістаў сельскай гаспадаркі, іх катастрафічна не хапала ў сваіх раёнах. Таму 1 кастрычніка 1957 г. было залічана 30 чалавек для падрыхтоўкі па прафесіі трактарыст-машыніст і слесар 3-га разраду тэрмінам навучання 6 месяцаў (выпуск 29.03.1958 г.). Усе навучэнцы пасля заканчэння былі накіраваны па вобласці: Лынтупская МТС – 3 чалавекі, Навадруцкая МТС – 7 чалавек, Дунілавіцкая МТС – 6 чалавек, Мядзельская МТС – 3 чалавекі.
З 1 лістапада 1959 г. згодна загаду № 1 ад 22 красавіка 1959 г. сталі навучаць прафесіі шафёра, рыхтавалі кадры для ваенкаматаў. У 1960 г. у вучылішчы навучалі двум прафесіям трактарыст-машыніст шырокага профілю – 215 чалавек і шафёр 3-га класа – 60 чалавек. Па заканчэнні вучылішча навучэнцы былі размеркаваны на працу ў Віцебскую вобласць і 118 чалавек у Паўладарскую вобласць Казахскай ССР. 15 навучэнцаў гэтага выпуску скончылі вучылішча з пахвальнай граматай. Узброеныя сілы атрымалі 60 шафёраў 3-га класа.
У 1962 г. Рамеснае вучылішча па МСХ № 2 перайменавана ў Сельскае прафесійна-тэхнічнае вучылішча № 2.
Больш за 40 выпускнікоў тых гадоў за добрасумленную працу мелі высокія ўрадавыя ўзнагароды. Тэрмін навучання быў 2 гады, і жадаючыя атрымаць сярэднюю адукацыю наведвалі вячэрнія школы.
З 1963 года дырэктарам вучылішча быў Жаўрыд Эдуард Сцяпанавіч. На гэтай пасадзе працаваў да 1984 г.
Пад яго кіраўніцтвам калектыў змог падрыхтаваць звыш 10 тыс. спецыялістаў для калгасаў і саўгасаў.
Працавала і рамонтна-будаўнічая група. Сіламі навучэнцаў быў пабудаваны клуб на 350 месцаў, вытворчыя класы і лабараторыі. У 1979 г. быў здадзены ў эксплуатацыю інтэрнат на 395 месцаў, і навучэнцы з вёсак сталі пражываць у ім. З 1979 г. вучылішча стала сярэднім, з трохгадовым тэрмінам навучання. Вядучай прафесіяй стала прафесія трактарыста-машыніста шырокага профілю і вадзіцеля катэгорыі «С».
З 1984 г. да 1998 г. педагагічны калектыў узначальваў дырэктар Дзеравянка Аляксандр Аляксандравіч.
У перыяд з 1989 па 1998 гг. ПТВ-165 падрыхтавала і выпусціла 2036 спецыялістаў па такіх прафесіях:
– трактарыст-машыніст;
– слесар-рамонтнік;
– электраманцёр па абслугоўванні і рамонту электраабсталявання ў сельскагаспадарчай вытворчасці;
– вадзіцель аўтамабіля;
– электразваршчык;
– кухар;
– швачка;
– кравец;
– аператар машыннага даення;
– лабарант ХБА;
– бухгалтар;
– прадавец.
З 1998 года ў вучылішчы распачата падрыхтоўка спецыялістаў для сельскай гаспадаркі па сістэме бесперапыннага навучання ПТВ – БАТУ.
З 1998 г. дырэктарам ПТВ-165 стаў Курто Пётр Леанідавіч.
Пад кіраўніцтвам Пятра Леанідавіча ПТВ-165 у 2000 г. было перайменавана ў Пастаўскі дзяржаўны ліцэй, а ў 2003 г. ліцэй быў рэарганізаваны ва УА «Пастаўскі дзяржаўны прафесійна-тэхнічны каледж сельскагаспадарчай вытворчасці».
З 2005 г. дырэктарам УА «Пастаўскі дзяржаўны прафесійна-тэхнічны каледж сельскагаспадарчай вытворчасці» з'яўляўся Лысянок Мікалай Мікалаевіч.
У 2015 г. перайменавана ва УА «Пастаўскі дзяржаўны каледж».
З 2017 г. дырэктарам УА «Пастаўскі дзяржаўны каледж» з'яўляецца Герасіменка Сяргей Мікалаевіч.
Колькасць навучэнцаў на 1 верасня 2018 г. складала 445 чалавек.
Каледж ажыццяўляе падрыхтоўку па наступных спецыяльнасцях:
1. Узровень ССА:
– машыны і абсталяванне дрэваапрацоўчай прамысловасці;
– тэхнічная эксплуатацыя аўтамабіляў (па напрамках);
– грамадскае харчаванне;
– аўтасэрвіс;
– бухгалтарскі ўлік, аналіз і кантроль.
2. Узровень ПТА:
– тэхнічнае забеспячэнне сельскагаспадарчых работ;
– эксплуатацыя і рамонт аўтамабіляў;
– тэхналогія зварачных работ;
– тэхнічная эксплуатацыя электраабсталявання;
– грамадскае харчаванне;
– гандлёвая справа;
– вытворчасць прадукцыі жывёлагадоўлі;
– сацыяльная праца.
3 кастрычніка 2014 г. быў адкрыты музейны пакой «Гісторыя і сучаснасць», якая знаходзіцца ў будынку інтэрната.
Ва УА «Пастаўскі дзяржаўны каледж» ёсць свой узорны духавы аркестр.
У каледжы вялікая ўвага надаецца занятасці навучэнцаў у пазаўрочны час. Працуюць гурткі «Наша спадчына», «Саламяныя фантазіі», «Вакальныя спевы», інфармацыйны цэнтр, выдаецца часопіс – «Каледж – гэта мы».
Адрас: Віцебская вобласць, Пастаўскі раён, г. Паставы, вуліца 17 верасня, д. 90.
|
ЛІТАРАТУРА
1. Александровіч, К. Запатрабаваны жыццём / К. Александровіч // Вольнае Глыбокае. – 2015. – 12 ліст. – С. 2.
2. Анішкевіч, А. Вучаць запатрабаваным прафесіям / А. Анішкевіч // Пастаўскі край. – 2017. – 9 верас. – С. 2.
3. Курто, П. Л. За зменай назвы – змена асаблівасцяў работы / П. Л. Курто ; гутарыла А. Шапавалава // Пастаўскі край. – 2003. – 23 жн. – С. 2.
4. Курыловіч, П. Стратэгію развіцця дыктуе рынак працы / П. Курыловіч // Пастаўскі край. – 2010. – 16 кастр. – С. 5.
5. Курыловіч, П. У пошуку новага, перадавога, прагрэсіўнага / П. Курыловіч // Пастаўскi край. – 2005. – 12 лістап. – С. 2.
6. Лысёнак, М. Даказала сваю жыццядзейнасць / М. Лысёнак // Пастаўскi край. – 2005. – 2 лістап. – С. 3–4.
7. Пашкевіч, Т. З улікам попыту на новыя прафесіі / Т. Пашкевіч // Витебские вести. – 2015. – 8 дек. – С. 6.
8. Пашкевіч, Т. Зрэагавалі на попыт / Т. Пашкевіч // Витебские вести. – 2017. – 28 янв. – С. 3.
9. Пашкевіч, Т. У навуковым пошуку / Т. Пашкевіч // Витебские вести. – 2017. – 21 янв. – С. 6.
10. Прафтэхкаледжу – 60 гадоў / падрыхт. П. Курыловіч // Пастаўскі край. – 2015. – 21 кастр. – С. 1, 4–5.
11. Умацоўваючы імідж / падрыхт. Н. Калядзіч // Настаўніцкая газета. – 2012. – 9 жн. – С. 2.
12. Філіпенкаў, В. Д. Пастаўскаму дзяржаўнаму прафесійна-тэхнічнаму каледжу сельскагаспадарчай вытворчасці – 55 / В. Д. Філіпенкаў ; гутарыла Ю. Шарабайка // Вольнае Глыбокае. – 2010. – 7 кастр. – С. 11.
13. Шапавалава, А. На трох кітах / А. Шапавалава // Пастаўскi край. – 2008. – 2 лют. – С. 1, 3.
14. Шапавалава, А. Школа музыкі, старт у прафесію / А. Шапавалава // Пастаўскі край. – 2018. – 14 крас. – С. 5.
15. Шилько, Н. Это всё о нём... / Н. Шилько // Пастаўскі край. – 2015. – 22 крас. – С. 4.
СПАСЫЛКІ
