Інстытут тэхнічнай акустыкі Нацыянальнай акадэміі навук Беларусі, ДНУ. г. Віцебск

Подробности

Створана 09.03.2021 08:40

Адноўлена 05.01.2024 13:45

Дзяржаўная навуковая ўстанова «Інстытут тэхнічнай акустыкі Нацыянальнай акадэміі навук Беларусі» (да 1994 года – Віцебскае аддзяленне інстытута фізікі цвёрдага цела і паўправаднікоў) заснавана 25 верасня 1975 года ў адпаведнасці з Пастановай Прэзідыума Акадэміі навук БССР № 140. Інстытут быў створаны на базе трох акадэмічных інстытутаў (Фізіка-тэхнічнага інстытута, інстытута фізікі, інстытута фізікі цвёрдага цела і паўправаднікоў) і з'яўляўся першым у Віцебскай вобласці навукова-даследчым інстытутам. Ключавую ролю ў арганізацыі і развіцці Інстытута адыграў яго першы дырэктар Уладзімір Уладзіміравіч Клубовіч. Пад яго кіраўніцтвам і пры непасрэдным удзеле праведзены фундаментальныя даследаванні ўплыву ультрагуку на фізіка-механічныя ўласцівасці металаў і сплаваў, распрацаваны і ўкаранёны тэхналагічныя працэсы апрацоўкі металаў і палімерных матэрыялаў з ультрагукам.

Інстытут тэхнічнай акустыкі займаецца правядзеннем фундаментальных і прыкладных даследаванняў, а таксама ажыццяўляе навукова-тэхнічныя распрацоўкі ў рамках дзяржаўных праграм навуковых даследаванняў, рэгіянальнай навукова-тэхнічнай праграмы, рэспубліканскіх і міжнародных праектаў Беларускага фонду фундаментальных даследаванняў і інш.

Асноўнымі напрамкамі дзейнасці інстытута з'яўляюцца: даследаванне ўздзеяння канцэнтраваных патокаў энергіі на кандэнсаванае асяроддзе і фізічныя працэсы; распрацоўка метадаў і тэхналогій атрымання матэрыялаў функцыянальнага і спецыяльнага прызначэння; садзейнічае ў рэалізацыі дзяржаўнай палітыкі ў галіне малога і сярэдняга інавацыйнага бізнесу ў стварэнні новых тэхналогій, распрацоўцы новых прыбораў і абсталявання.

У 2015 годзе ў Інстытуце тэхнічнай акустыкі НАН Беларусі быў створаны Рэспубліканскі цэнтр ультрагукавых тэхналогій, які з'яўляецца міждысцыплінарным навукова-тэхнічным цэнтрам (кластарам) перспектыўных навуковых даследаванняў. Цэнтр створаны з мэтай распрацоўкі новых высокаэфектыўных працэсаў і прылад апрацоўкі матэрыялаў, стварэння новых функцыянальных матэрыялаў для павышэння якасці прадукцыі і інш.

Пры інстытуце таксама дзейнічае і філіял Рэспубліканскага цэнтра трансферу тэхналогій, які падтрымлівае інавацыйную дзейнасць, садзейнічае развіццю інавацыйнага прадпрымальніцтва і пашырэнню міжнародных партнёрскіх адносін у сферы навуковых распрацовак.

Сёння ў структуру інстытута ўваходзяць:

– лабараторыя фізікі металаў, якая займаецца распрацоўкай тэхналагічных працэсаў з выкарыстаннем ультрагукавых ваганняў і вырабаў ультрагукавой тэхнікі, рамонтам і мадэрнізацыяй айчыннага і замежнага ультрагукавога абсталявання, нанясеннем ахоўна-дэкаратыўных пакрыццяў на вырабы медыцынскага прызначэння і інш.;

– лабараторыя нелінейных матэрыялаў займаецца распрацоўкай і вырабам абсталявання спецыяльнага прызначэння для рамонту аптычных і лазерных сістэм авіяцыйнай тэхнікі, абсталявання для выпрабаванняў і выбракоўвання актыўных дыэлектрыкаў і паўправаднікоў, шматканальных партатыўных вымяральнікаў тэмпературы;

– перспектыўныя матэрыялы і тэхналогіі – сумесная лабараторыя ДНУ «Інстытут тэхнічнай акустыкі НАН Беларусі» і УА «Віцебскі дзяржаўны тэхналагічны ўніверсітэт»;

– аддзел электрафізічных вымярэнняў, спецыялісты якога займаюцца выкананнем работ па тэхнічным абслугоўванні сістэм пажарнай і ахоўнай сігналізацыі, ажыццяўляюць дэмантаж і мантаж гэтых сістэм;

– аддзел маркетынгу і міжнародных сувязяў, які займаецца распрацоўкай прапаноў па развіцці міжнародных сувязяў у інстытуце, ажыццяўленнем мерапрыемстваў па ўсталяванні акадэмічных, навукова-тэхнічных сувязяў з замежнымі партнёрамі, займаецца каардынацыяй работы з замежнымі партнёрамі і інш.

Спецыялісты інстытута актыўна ўдзельнічаюць у міжнародных канферэнцыях, сімпозіумах, семінарах, у міжнародных праектах і праграмах, у спецыялізаваных выставах, кірмашах, інавацыйных і інвестыцыйных форумах.

У 2015 годзе ДНУ «Інстытут тэхнічнай акустыкі НАН Беларусі» быў занесены на Дошку гонару Віцебскай вобласці як пераможца спаборніцтва сярод арганізацый, якія ажыццяўляюць навуковыя даследаванні і распрацоўкі.

Дырэктар – Рубанік Васіль Васільевіч.

Адрас: Віцебская вобласць, г. Віцебск, праспект Люднікава, 13.

ЛІТАРАТУРА

1. Антонов, С. Академическая синергия / С. Антонов // Витебские вести. – 2016. – 21 мая. – С. 1.

2. Антонов, С. Повысить престиж ученых / С. Антонов // Витебские вести. – 2017. – 21 марта. – С. 2.

3. Бакевич, Э. Придумать и внедрить: институт технической акустики занимается не только фундаментальными исследованиями, но и практическими разработками / Э. Бакевич // Витебские вести. – 2014. – 25 янв. – С. 9.

4. Бегунова, Е. Здесь рождаются идеи...: витебский институт технической акустики НАН Беларуси воплощает в жизнь уникальные идеи / Е. Бегунова // Рэспубліка. – 2013. – 17 студз. – С. 4.

5. Бохан, Ю. А. Інстытут тэхнічнай акустыкі Нацыянальнай акадэміі навук Беларусі / Ю. А. Бохан // Памяць: Віцебск : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад. А. І. Мацяюн ; мастак Э. Э. Жакевіч. – Мінск : БелЭн, 2003. – Кн. 2. – С. 467–468.

6. Волкова, Л. А пистолет «стреляет» ультразвуком / Л. Волкова // Віцьбічы = Витьбичи. – 2016. – 30 янв. – С. 2.

7. Дроздова, Н. Я. Их разработки нам жить помогают / Н. Дроздова // Віцьбічы = Витьбичи. – 2023. – 28 янв. – С. 1, 6.

8. Камлёва, Н. Будущее – за умными материалами / Н. Камлёва // Витебские вести. – 2017. – 14 янв. – С. 3.

9. Камлёва, Н. Звуки науки / Н. Камлёва // Витебские вести. – 2015. – 24 сент. – С. 10.

10. Карпас, Е. Впереди планеты всей / Е. Карпас // Витебские вести. – 2018. – 29 дек. – С. 11.

11. На волне ультразвука // Навука. – 2020. – 28 верас. – С. 7.

12. Покоритель ультразвука / подгот. Н. Камлёва // Витебские вести. – 2018. – 24 марта. – С. 12.

13. Рубаник, В. В. Наука работает на экономику / В. В. Рубаник ; беседовал В. Быстров // Советская Белоруссия. – 2015. – 24 сент. – С. 6.

14. Сарасеко, М. Н. Институт технической акустики / М. Н. Сарасеко // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 467–468.

15. Сарасеко, М. Н. Институт технической акустики / М. Н. Сарасеко // Республика Беларусь : энциклопедия : [в 7 т.] / редкол.: Г. П. Пашков [и др.]. – Минск : БелЭн, 2006. – Т. 3 : Герасименко–Картель. – С. 768–769.

16. Черниченко, Н. От игрушек до медицинского оборудования / Н. Черниченко // Віцьбічы = Витьбичи. – 2019. – 26 янв. – С. 2.

17. Шут, В. М. Інстытут тэхнічнай акустыкі / В. М. Шут // Беларуская энцыклапедыя : у 18 т. / рэдкал.: Г. П. Пашкоў [і інш.]. – Мінск : БелЭн, 1998. – Т. 7 : Застаўка–Кантата. – С. 272.