Інстытут развіцця адукацыі Віцебскі абласны, ДУДАД

Подробности

Створана 15.01.2024 08:40

Адноўлена 15.01.2024 13:52

У красавіку 1941 года Бюро Віцебскага абкама КП(б)Б прыняло пастанову аб адкрыцці ў г. Віцебску інстытута ўдасканалення настаўнікаў на базе абласнога педагагічнага кабінета, першым дырэктарам быў прызначаны Акаловіч Леанід Яўгенавіч. 1 ліпеня 1944 года абласны інстытут удасканалення настаўнікаў аднавіў сваю работу на чале з дырэктарам Бальшовай Варварай Васільеўнай. Калектыў складаў усяго 13 чалавек.

У 1947 годзе ўводзіцца новая сістэма павышэння кваліфікацыі настаўнікаў: вочна-завочныя курсы для ўсіх настаўнікаў «з дастатковай педагагічнай кваліфікацыяй» і стажам работы да 15 гадоў.

З 1985 года ў інстытуце склалася сістэма бесперапыннага павышэння кваліфікацыі педагагічных кадраў. Створаны новыя кабінеты дыягностыкі і прагназавання, эксперыментальна-даследчай работы, камп'ютарных тэхналогій, эканамічнай падрыхтоўкі, рэдакцыйна-выдавецкі аддзел. У структуры інстытута з'яўляецца адзіны ў рэспубліцы кабінет астраноміі, а ў 1986 годзе – кабінет інфарматыкі і электронна-вылічальнай тэхнікі.

У 1989 годзе ў Віцебскім абласным інстытуце ўдасканалення настаўнікаў адкрываецца перападрыхтоўка кадраў па спецыяльнасці «Практычная псіхалогія» і «Беларуская мова і літаратура».

Інстытут першым у рэспубліцы прапанаваў і эксперыментальна апрабаваў мадэль павышэння кваліфікацыі педагагічнага калектыву школы без адрыву ад асноўнай дзейнасці. З цягам часу ўдасканальваецца сістэма абагульнення і распаўсюджвання эфектыўнага педагагічнага вопыту, укараняюцца новыя педагагічныя тэхналогіі, распрацоўкі новых навучальных і вучэбна-тэматычных планаў.

У 1998 годзе адкрыты факультэт павышэння кваліфікацыі кіруючых кадраў органаў дзяржаўнага кіравання і створаны аддзел маніторынгу якасці адукацыі.

У лютым 2008 года інстытут узнагароджаны дыпломам I ступені Міністэрства адукацыі Рэспублікі Беларусь па выніках XII Рэспубліканскай выстаўкі навукова-метадычнай літаратуры і педагагічнага вопыту «Сацыяльна-педагагічнае і псіхалагічнае суправаджэнне станаўлення асобы навучэнцаў і іх прафесійнага самавызначэння».

У 2015 годзе па выніках работы Віцебскі абласны інстытут развіцця адукацыі занесены на Дошку гонару Кастрычніцкага раёна і Дошку гонару г. Віцебска.

Па выніках работы ў 2021 годзе інстытут занесены на Дошку гонару г. Віцебска.

Інстытут уваходзіць у склад рэгіянальнага вучэбна-навукова-інавацыйнага кластара бесперапыннай педагагічнай адукацыі (Рэспубліка Беларусь). З'яўляецца членам Міжнароднага метадычнага цэнтра «Акадэмія педагагічнага майстэрства: навыкі XXI стагоддзя» (Расійская Федэрацыя, Омская вобласць). Заключаны дагаворы аб міжнародным супрацоўніцтве. Інстытут цесна ўзаемадзейнічае з 11 установамі адукацыі Расійскай Федэрацыі.

Дзейнасць інстытута сертыфікавана ў адпаведнасці са стандартам якасці СТБ ISO 9001-2015.

У лютым 2020 года створаны Рэгіянальны цэнтр педагагічнай STEM-адукацыі пры падтрымцы Парка высокіх тэхналогій.

У снежні 2022 года падпісана пагадненне аб супрацоўніцтве паміж Віцебскім абласным інстытутам развіцця адукацыі і Пскоўскім абласным інстытутам павышэння кваліфікацыі работнікаў адукацыі.

У 2022 годзе створаны абласны рэсурсны цэнтр па духоўна-маральным і патрыятычным выхаванні навучэнцаў.

У 2023 годзе адкрыты першы ў Беларусі абласны рэсурсны цэнтр па ваенна-патрыятычным выхаванні, адметнасць якога заключаецца ў мэтавай аўдыторыі: ён нацэлены на дапамогу педагогам – кіраўнікам па ваенна-патрыятычным выхаванні і ўсім, хто задзейнічаны ў арганізацыі работы ваенна-патрыятычных класаў і клубаў, пошукавых аб'яднанняў па інтарэсах.

На працягу амаль дваццаці гадоў у інстытуце на рэгулярнай аснове праходзяць адкрытыя абласныя Стрэчанскія, Кірыла-Мяфодзіеўскія педагагічныя чытанні. Нядаўна ў рамках дзейнасці цэнтра стартаваў рэспубліканскі інавацыйны праект «Укараненне мадэлі выкарыстання драматызацыі як сродку духоўна-маральнага развіцця навучэнцаў (на прыкладзе традыцыйнага беларускага тэатра "Батлейка")». Ва ўстанове адукацыі таксама дзейнічаюць педагагічныя клубы: клуб менеджараў у сферы адукацыі «Лідар», педагагічны клуб настаўнікаў пачатковых класаў «УРОК», клуб педагогаў-псіхолагаў «Альянс», клуб педагагічных работнікаў сістэмы дашкольнай адукацыі «Праблемы. Пошукі. Знаходкі», клуб настаўнікаў-метадыстаў Віцебскай вобласці «КонSTELLAрыс».

Штогод праводзяцца міжнародныя навукова-практычныя канферэнцыі для педагогаў па актуальных пытаннях адукацыі ў вочным і анлайн рэжыме.

Віцебскі абласны інстытут развіцця адукацыі рэалізуе адукацыйную праграму павышэння кваліфікацыі кіруючых работнікаў і спецыялістаў, выконвае інфармацыйна-аналітычную, навукова-метадычную, арганізацыйна-метадычную функцыі ў сферы дадатковай адукацыі дарослых.

З 2019 года Віцебскі абласны інстытут развіцця адукацыі выступае рэгіянальным цэнтрам у сферы дадатковай адукацыі дарослых, забяспечвае на аснове сучасных стандартаў якасці бесперапынную прафесійную адукацыю кіруючых работнікаў, спецыялістаў дашкольнай, агульнай сярэдняй, спецыяльнай адукацыі для задавальнення патрэб грамадства ў кваліфікаваных, прафесійных спецыялістах у кантэксце рэалізацыі мэт устойлівага развіцця Рэспублікі Беларусь.

Адрас: Віцебская вобласць, горад Віцебск, праспект Фрунзэ, 21.

ЛІТАРАТУРА

1. Бабашка, Р. І. Выкарыстанне магчымасцей абласнога метадычнага савета як сродку абагульнення и распаўсюджвання педагагічнага вопыту / Р. І. Бабашка // Современное образование Витебщины. – 2021. – № 2. – С. 12–15.

2. Бондарава, Т. Каштоўны вопыт / Т. Бондарава // Настаўніцкая газета. – 2021. – 3 крас. – С. 4.

3. Бондарава, Т. Свята ў працоўным рытме / Т. Бондарава // Настаўніцкая газета. – 2022. – 30 верас. – С. 10.

4. Бондарава, Т. Супрацоўніцтва развіваецца / Т. Бондарава // Настаўніцкая газета. – 2021. – 25 сак. – С. 5.

5. Бондарава, Т. STEM-адукацыя: веды, практыка, перспектывы / Т. Бондарава // Настаўніцкая газета. – 2020. – 10 кастр. – С. 3.

6. Бондарава, Т. 100+ ідэй для «Ваенрука» / Т. Бондарава // Настаўніцкая газета. – 2023. – 8 верас. – С. 7.

7. Бондарава, Т. Творцам будучыні, інжынерам лічбавага свету / Т. Бондарава // Настаўніцкая газета. – 2020. – 21 сак. – С. 13.

8. Ивченко, Л. Для консолидации усилий / Л. Ивченко // Витебские вести. – 2023. – 7 июля. – С. 4.

9. Лапацінская, В. В. Сінергетыка супрацоўніцтва / В. В. Лапацінская ; гутарыла Т. Бондарава // Настаўніцкая газета. – 2023. – 17 лістап. – С. 18. – (Дадат.: «Школа кіравання»).

10. На новы прафесійны ўзровень / падрыхт.: В. Дубоўская [і інш.] // Настаўніцкая газета. – 2020. – 19 верас. – С. 2.

11. Пукшанский, А. Воспитать патриотов / А. Пукшанский // Віцьбічы = Витьбичи. – 2022. – 20 дек. – С. 3.

12. Фёдорова, Е. Для повышения мастерства педагогов / Е. Фёдорова // Витебские вести. – 2022. – 27 сент. – С. 4.

13. Черниченко, Н. Новый уровень образования / Н. Черниченко // Віцьбічы = Витьбичи. – 2022. – 29 сент. – С. 3.

14. Яковлева, С. Православные ценности: принять за основу / С. Яковлева // Витебские вести. – 2023. – 29 дек. – С. 14.

СПАСЫЛКІ

Витебский областной институт развития образования. Официальный канал

Витебский областной институт развития образования: векторы перспективного развития

Витебский областной институт развития образования. Фильм к 60-летию института