Цэнтральная раённая бібліятэка, ДУК. Гарадоцкі раён, г. Гарадок

Подробности

Створана 02.07.2020 08:40

Адноўлена 02.07.2020 08:18

Цэнтральная раённая бібліятэка была ўтворана ў 1921 годзе. Загадчыкам працавала Аўчыннікава Вольга Мітрафанаўна. Колькасць чытачоў – 286 чалавек. Кніжны фонд невядомы. Штат бібліятэкі – 1 чалавек.

У 1947 годзе фонд ЦБ складаў 5000 экзэмпляраў, чытачоў – 823, у тым ліку 600 чытачоў школьнага ўзросту. У бібліятэцы працавалі 3 работнікі. Пры бібліятэцы была чытальная зала, працавала 5 перасовак. З 1954 па жнівень 1969 гг. Гарадоцкую раённую бібліятэку ўзначальвала Яфрэмава Аляксандра Васільеўна.

У 1955 годзе Гарадоцкая цэнтральная раённая бібліятэка атрымала асобнае памяшканне. Кніжны фонд складаў 11971 экзэмпляр, чытачоў – 1036 чалавек, кнігавыдача – 9410 экзэмпляраў.

З 1996 года бібліятэка аказвае платныя віды паслуг карыстальнікам. На сённяшні дзень прадастаўляецца 20 відаў паслуг.

Асаблівай папулярнасцю ў насельніцтва карыстаецца аддзел камерцыйнага фонду з відэатэкай. Пры Гарадоцкай цэнтральнай бібліятэцы з 2004 года працуе Публічны цэнтр прававой інфармацыі.

Цэнтральная бібліятэка вядзе змястоўную і перспектыўную дзейнасць па выкананні мэтавай праграмы «Бібліятэка і міласэрнасць». З 2004 года ў рамках праграмы пачаў сваю працу клуб «Залаты ўзрост».

У 2007 годзе бібліятэка набыла бібліёбус.

У пачатку 2009 года ў раённай бібліятэцы была цалкам аўтаматызавана бібліятэчная сістэма. Пачаў працаваць літаратурны клуб «Гараднянка». З лютага 2010 года і па сённяшні дзень дырэктарам бібліятэкі з'яўляецца Абрамава Ада Вітальеўна.

У 2013 годзе да 70-годдзя вызвалення Гарадоцкага раёна ад нямецка-фашысцкіх захопнікаў супрацоўнікамі бібліятэкі быў распрацаваны раённы праект «Кніга народнай славы».

У студзені 2015 года ЦРБ палепшыла сваю матэрыяльна-тэхнічную базу. Згодна з рашэннем Гарадоцкага райвыканкама яна атрымала статус юрыдычнай асобы – ДУК «Гарадоцкі культурна-асветніцкі цэнтр і сетка публічных бібліятэк». Гарадская дзіцячая бібліятэка была рэарганізавана і пачала працаваць як аддзел дзіцячай і юнацкай літаратуры Гарадоцкай цэнтральнай бібліятэкі.

У 2016 годзе на сайце цэнтральнай бібліятэкі былі прадстаўлены электронны рэсурс «Афганістан» і віртуальная літаратурная гасцёўня «Уладзімір Скарынкін», дзе сабраны матэрыялы пра жыццё і творчасць знакамітага земляка, паэта.

26 кастрычніка 2018 года ў бібліятэцы адкрылася кафедра праваслаўнай літаратуры.

Ініцыятарамі і арганізатарамі адкрыцця кафедры выступілі Віцебская Епархія, Віцебскае абласное грамадскае аб'яднанне праваслаўных жанчын, аддзел ідэалагічнай работы, культуры і па справах моладзі Гарадоцкага райвыканкама, Гарадоцкае благачынне і Гарадоцкая цэнтральная раённая бібліятэка. Праваслаўная кафедра – месца, дзе будзе праводзіцца даследчая праца, дзе чытачы змогуць пазнаёміцца з духоўнай літаратурай, дзе будуць праходзіць цікавыя духоўныя сустрэчы і мерапрыемствы.

Сёння бібліятэка з'яўляецца не толькі сучасным культурна-адукацыйным і інфармацыйным цэнтрам, але і метадычным асяродкам бібліятэчнага маркетынгу для ўсіх філіялаў бібліятэчнай сістэмы.

Адрас: Віцебская вобласць, Гарадоцкі раён, г. Гарадок, вуліца Пралетарская, 4.

ЛІТАРАТУРА

1. Антонаў, Л. У КАЦ «Гарадок» у Міжнародны дзень роднай мовы адзначылі рупліўцаў роднага слова Гарадоччыны / Л. Антонаў // Наша слова. – 2018. – 14 сак. – С. 4.

2. Башмакова, И. Гость в библиотеке / И. Башмакова // Гарадоцкі веснік. – 2018. – 10 ліп. – С. 1.

3. Городокская центральная районная библиотека // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 332.

4. Мукомол, Л. Родился новый... клуб! / Л. Мукомол // Гарадоцкі веснік. – 2009. – 10 лют. – С. 1.

5. Шалыго, З. Встреча с поэтом / З. Шалыго // Гарадоцкі веснік. – 2019. – 9 студз. – С. 5.

6. Шляйко, Л. Нашы «кнігадрукары» лепшыя / Л. Шляйко // Гарадоцкі веснік. – 2017. – 23 верас. – С. 1.

7. Яковлева, С. «Есть храм у книг – библиотека» / С. Яковлева // Гарадоцкі веснік. – 2016. – 20 верас. – С. 4.

8. Яковлева, С. Через книгу – к духовности / С. Яковлева // Гарадоцкі веснік. – 2018. – 30 кастр. – С. 1, 5.

СПАСЫЛКІ

 В Городокской библиотеке открылась кафедра православной литературы