Валун Шавекінскі. Шумілінскі раён, в. Шавекі

Подробности

Створана 23.06.2020 15:23

Адноўлена 23.06.2020 16:14

Шавекінскі валун навукоўцы адносяць да культавых валуноў з рукатворнымі паглыбленнямі.

Ён знаходзіцца на заходняй ускраіне в. Шавекі, у 1,1 км на паўднёвы захад ад в. Куксы, у 2,5 км на захад ад в. Ставіца, на заходнім схіле невялікага марэннага ўзгорка.

З'яўляецца геалагічным помнікам прыроды рэспубліканскага значэння.

Плошча помніка прыроды складае 6 м². Плошча ахоўнай зоны – 65 м². Мяжой ахоўнай зоны з'яўляецца лінія, умоўна праведзеная на адлегласці 3 м ад мяжы гэтага помніка.

Валун чырвона-бурага дробназярністага граніту, з уключэннямі крышталяў ружовага палявога шпату, рагавой падманкі, шэрага кварцу. Прынесены падчас Паазерскага абледзянення з Аландскіх астравоў. На верхняй паверхні валуна маецца характэрнае штучнае паглыбленне, якое сведчыць пра яго ранейшае культавае значэнне.

Маюцца на паверхні Шавекінскага гіганта і адбіткі куль, снарадаў, гранат. Жыхар вёскі М. М. Чапурноў расказаў пра тое, як у гады вайны шасціметровы валун не раз ратаваў салдат ад смяротнага агня праціўніка.

Ля каменя адчуваеш сябе тужліва, быццам душыць ён цябе сваёй вялікасцю, іншы раз пераконвае, што чалавек – пясчынка ў параўнанні з ім. Ён як бы гаворыць: «Ты, чалавек, не жывеш і стагоддзя, а я стагоддзямі ахоўваю вёску. І нашэсце спазнаў, і страляніну, калі за мяне хаваліся ад бяды. Звінелі па мне кулі, ляцелі снарады, гранаты, а я выжыў...».

ЛІТАРАТУРА

1. Мароз, М. Вартавыя цішыні / М. Мароз // Герой працы (Шуміліна). – 2006. – 16 мая. – С. 3.

2. У краі каменных волатаў // Герой працы (Шумiлiна). – 2012. –18 верас. – С. 4–5.

3. Шевекинский валун // Валуны родной сторонки / А. Параскевин. – Минск : Колорград, 2017. – С. 10–12.