Забудова вуліцы Мінскай. Аршанскі раён, г. Орша

Подробности

Створана 18.10.2018 15:23

Адноўлена 18.10.2018 15:24

Забудова па вуліцы Мінскай – прыклад жыллёвага будаўніцтва, дзе шырока выкарыстаны дэкаратыўныя ўласцівасці цаглянай муроўкі. Забудова сфарміравана ў пачатку XX стагоддзя. Уключая цагляныя дамы № 11, № 17, № 19, якія ствараюць адзіны ансамбль.

Дом № 11. Вуглавы, на скрыжаванні вуліц Мінскай і Леніна, на ўзгорку. Пабудаваны ў пачатку XX стагоддзя. Двухпавярховы прамавугольны ў плане будынак накрыты двухсхільным дахам. Да галоўнага фасада асіметрычна далучаецца аб'ём уваходнага тамбура з міжпаверхавай лесвіцай, да тарцовага – прыбудова. Элементы дэкору фасадаў выкрашаны сродкамі цаглянай муроўкі: ліштвы акон, сандрыкі, клінападобныя аркі, філёнгі, лапаткі, міжпаверхавы фігурны пояс. Папярочнай сцяной дом падзелены на 2 палавіны, планіроўка зменена адпаведна сучаснаму выкарыстанню.

Дом № 17. Уключаны ў фрагмент забудовы вуліцы ў пачатку XX стагоддзя. Двухпавярховы аб'ём з пакатым дахам выцягнуты ўздоўж вуліцы і павернуты да яе галоўным фасадам. Яго рытм ствараюць рады лучковых акон і 2 дзвярныя праёмы. Фасад дэкарыраваны клінападобнымі аркамі, лапаткамі, філёнгамі, рустам, сандрыкамі, выкананымі сродкамі цаглянай муроўкі. Тарцовыя фасады глухія, без праёмаў і архітэктурнага дэкору. Дом папярочным калідорам падзелены на 2 палавіны.

Дом № 19. Вуглавы, на скрыжаванні вуліц Мінскай з 2-м Мінскім завулкам. Пабудаваны ў пачатку XX стагоддзя. Двухпавярховы Г-падобны ў плане будынак апрацаваны тынкоўкай. На яе фоне вылучаюцца 2 рады лучковых і прамавугольных аконных праёмаў. Плоскасна вырашаныя фасады ўпрыгожаны міжпаверхавым тонкапрафіляваным поясам, карнізам з сухарыкамі. Тарцовыя фасады пазбаўлены праёмаў і дэкору. Два крылы дома маюць розную планіроўку: на вуліцы Мінскай – анфіладную, на завулку – калідорную.

ЛІТАРАТУРА

1. Копцік, Ю. Архітэктурныя прагулкі: Мінская, 17 / Ю. Копцік // Аршанская газета. – 2007. – 24 лістап. – С. 3 ; 22 снеж. – С. 3.

2. Кулагін, А. М. Забудова вуліцы Мінскай / А. М. Кулагін // Збор помнікаў гісторыі і культуры Беларусі. Віцебская вобласць / рэдкал.: С. В. Марцэлеў [і інш.]. – Мінск : БелСЭ, 1985. – С. 91.

3. Урублеўская, Г. Г. Забудова вуліцы Леніна // Памяць: Орша. Аршански раён : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; уклад.: Т. Г. Ігнацьева [і інш.] ; мастак Э. Э. Жакевіч. – Мінск : БелЭн, 2000. – Кн. 2. – С. 464.