Млын вадзяны. Шаркаўшчынскі раён, аг. Лужкі

Подробности

Створана 10.03.2020 15:23

Адноўлена 10.03.2020 11:01

Вадзяны млын знаходзіцца каля плаціны на правым беразе р. Мнюта. Пабудаваны ў XIX – пачатку XX стст. Прамавугольны ў плане трохпавярховы будынак пад высокім двухсхільным дахам. Цокальны паверх з бутавага каменю. Прафіляваны карніз аддзяляе два верхнія паверхі. Унутры на кожным паверсе вылучаны 3 памяшканні: вялікае цэнтральнае і два вузкія тарцовыя. Унізе заходняй часткі будынка (у камеры) устаноўлены дзве турбіны. У цэнтральным памяшканні цокальнага паверха зманціраваны механізмы перадачы і рэгулявання руху турбін. На другім паверсе ўстаноўлены жорны і прыстасаванні для сарціроўкі мукі. Адсюль па транспарцёры мука падаецца на трэці паверх.

Млын – помнік прамысловай архітэктуры.

Пастановай Савета Міністраў Рэспублікі Беларусь № 578 ад 14 мая 2007 года гэтаму будынку нададзены статус гісторыка-культурнай каштоўнасці.

ЛІТАРАТУРА

1. Вадзяны млын // Збор помнікаў гісторыі і культуры Беларусі. Віцебская вобласць / рэдкал.: С. В. Марцэлеў [і інш.]. – Мінск : БелСЭ, 1985. – С. 461.

2. Дзяржаўны спіс гісторыка-культурных каштоўнасцей Рэспублікі Беларусь / склад. В. Я. Абламскі [і інш.]. – Мінск : БЕЛТА, 2009. – С. 216.