Касцёл Найсвяцейшага імя Марыі. Докшыцкі раён, в. Параф'янава

Подробности

Створана 19.08.2019 15:23

Адноўлена 19.08.2019 14:44

Касцёл Найсвяцейшага імя Марыі ў в. Параф'янава – першая яго фундацыя ажыццяўлена ў 1630 г. Мельхіёрам Гіляшкевічам, архідыяканам віленскім. У вялікай колькасці ранейшых манаграфій касцёл у Параф'янаве мае тытул св. Яна Хрысціцеля. Парафія і касцёл у цяперашні час маюць тытул імя Марыі.

Сучасны касцёл быў пабудаваны ў 1903–1908 гг. пад кіраўніцтвам кс. Баляслава Корна (на кожнай цагліне маюцца яго ініцыялы). Гэты помнік архітэктуры неабарока яшчэ больш выразна імітуе пашыраную ў часы барока 2-вежавую базіліку з трансептам. Выцягнуты прэсбітэрый з паўкруглым завяршэннем абкружаны абхадным хорам. Цэнтральны неф і трансепт накрыты ўзаемна перпендыкулярнымі двухсхільнымі дахамі з 3-вугольнымі франтонамі на тарцах. Галоўны фасад вырашаны як 2-ярусны аб'ём-нартэкс, па баках якога ўзвышаюцца чацверыковыя вежы са складанай кампазіцыяй завяршэнняў. Сцены цалкам змураваны з цэглы і атынкаваны. Фасады ажыўляе багатая ордэрная пластыка: прафіляваныя карнізы, пілястры, вялікія і разнастайныя па форме праёмы. Унутры цэнтральны неф перакрыты цыліндрычным скляпеннем з распалубкамі, бакавыя нефы – крыжовымі. Слупы і сцены расчлянёны падвойнымі пілястрамі і ўпрыгожаны арнаментальным роспісам і гіпсавымі барэльефамі на тэму «Крыжовы шлях Хрыста», выкананымі ў 1927 г.

Пасля Першай Сусветнай вайны рэлігійнае жыццё развівалася даволі дынамічна, пра што сведчаць рэлігійныя супольнасці на тэрыторыі парафіі. У той час пры касцёле з дзяцінства атрымліваў рэлігійную фармацыю будучы святар Мечыслаў Багаткевіч, пазней аб'яўлены благаслаўлёным. Пасля Другой Сусветнай вайны апошнім святаром, які працаваў у мясцовай парафіі, быў кс. Ян Завістоўскі. У 1956 г. касцёл у в. Параф'янава быў закрыты і прыстасаваны пад склад. 3 1989 г. ён вернуты каталіцкай парафіі. У парафіі налічваецца каля 2000 вернікаў, пераважна асоб старэйшага ўзросту. Катэхезай ахоплены дзеці і моладзь. У парафіі ёсць некалькі колаў Жывога Ружанца, малітоўныя групы. Ёсць парафіяльны дом, дзе жывуць законніцы, якія дапамагаюць у парафіі.

ЛІТАРАТУРА

1. Жоўтка, А. Параф'янава. Касцёл iмя Марыi / А. Жоўтка // Родныя вытокi (Докшыцы). – 1999. – 29 снеж. – С. 3.

2. Касцёл Іаана Хрысціцеля // Збор помнікаў гісторыі і культуры Беларусі. Віцебская вобласць / рэдкал.: С. В. Марцэлеў [і інш.]. – Мінск : БелСЭ імя П. Броўкі, 1985. – С. 253–254.

3. Касцёл Найсвяцейшай Дзевы Марыі // Памяць: Докшыцкі раён : гісторыка-дакументальныя хронікі гарадоў і раёнаў Беларусі / рэдкал.: Г. П. Пашкоў [і інш.] ; уклад. А. В. Скараход ; мастак Э. Э. Жакевіч. – Мінск : БелЭн, 2004. – С. 670.

4. Касцёл Найсвяцейшага Імя Марыі // Каталіцкія храмы Беларусі / А. М. Кулагін ; фат. А. Л. Дыбоўскі. – Мінск : БелЭн iмя П. Броўкi, 2008. – С. 282.

5. Костёл имени Святой Марии д. Парафьяново // Докшицам 600 : справочно-информационные материалы / отдел идеологической работы Докшицкого райисполкома ; фото: С. А. Васько, Ю. А. Шульгат. – Новополоцк, 2007. – С. 18.