Касцёл Унебаўзяцця Насвяцейшай Дзевы Марыі. Глыбоцкі раён, в. Дзеркаўшчына

Подробности

Створана 22.10.2019 15:23

Адноўлена 22.10.2019 10:55

Касцёл Унебаўзяцця Насвяцейшай Дзевы Марыі размешчаны ў цэнтры вёскі. Будаўніцтва было пачата 7 мая 1822 года з бутавага каменю. Пасля закрыцця ў XX ст. вернуты парафіянам у 1989 г. Абнесены бутавай агароджай з 2-яруснай 4-граннай мураванай званіцай пад шатровым дахам і арачнай брамай. У падмурак умураваны мемарыяльны камень з надпісам: «Лявон сын Казіміра Дамейка пам. 1845 ліпеня 29 на 78 годзе жыцця».

Помнік архітэктуры позняга класіцызму. Прамавугольны ў плане аб'ём пад 2-схільным дахам. Галоўны фасад вырашаны 4-калонным порцікам з трохвугольным франтонам, завершаным спічастай сігнатуркай. На фоне паліхромнай бутавай муроўкі вылучаюцца атынкаваныя і пабеленыя элементы архітэктурнага дэкору: прафіляваны карніз і вуглавыя лапаткі, ліштвы лучковых і арачных аконных праёмаў, паўкруглых і круглых люкарнаў. У агульнай прасторы залы бакавыя сакрысціі вылучаюць апсіду, аб'яднаную агульнай плоскай бэлечнай столлю. Пры ўваходзе галерэя хораў на 2 магутных калонах.

ЛІТАРАТУРА

1. Касцёл // Збор помнікаў гісторыі і культуры Беларусі. Віцебская вобласць / рэдкал.: С. В. Марцэлеў [і інш.]. – Мінск : БелСЭ імя П. Броўкі, 1985. – С. 231.

2. Касцёл Узнесення // Каталіцкія храмы на Беларусі : энцыклапедычны даведнік / А. М. Кулагін ; маст. І. І. Бокі. – Мінск : БелЭн, 2000. – С. 55.

3. Костел Вознесения Господня // Духовные святыни Витебщины = Geistliche heiligtuemer des Gebiest Witebsk / текст Н. И. Степаненко, В. Г. Синковец. – Витебск : Национальное агенство по туризму, 2007. – С. 22.