Касцёл Унебаўзяцця Найсвяцейшай Дзевы Марыі. Глыбоцкі раён, аг. Празарокі

Подробности

Створана 22.10.2019 15:23

Адноўлена 22.10.2019 10:59

Касцёл Унебаўзяцця Найсвяцейшай Дзевы Марыі знаходзіцца ў паўночнай частцы аграгарадка. Пабудаваны ў 1899–1907 гг. з цэглы. Закрыты ў 1950 г., адкрыты 29 чэрвеня 1989 года.

Першы драўляны касцёл быў пабудаваны ў 1698 г. па фундацыі полацкага падкаморыя Ю. Шчыта. Пры ім меўся кляштар францысканцаў. У пачатку 18 ст. кляштарны комплекс згарэў. У 1721 г. на яго месцы смаленскі падхаружы Павел Корсак фундаваў новы касцёл і кляштар, скасаваны ў 1832 г. Чарговы пажар 14 жніўня 1892 года зноў знішчыў кляштар. У лістападзе таго ж года парафіяне атрымалі дазвол віленскага губернатара на аднаўленне плябаніі і будаўніцтва часовага малітоўнага памяшкання, а ў 1896 г. — на будаўніцтва новага касцёла.

Помнік архітэктуры неараманскага стылю. Трохнефавы базілікальны храм з 5-граннай апсідай і трохграннымі нізкімі сакрысціямі па яе баках. Накрыты 2-схільным дахам з вальмамі над алтарнай часткай. Вось сіметрыі 2-вежавага фасада вылучана ўваходным праёмам і акном-трыфорумам над ім. Карнізныя паясы расчляняюць плоскасць фасада і вежаў на ярусы. Бакавыя плоскасныя фасады рытмічна расчлянёны 2 ярусамі арачных аконных праёмаў. Цокальны мае бутавую муроўку.

У інтэр'еры плоская столь размалявана ілюзорнымі кесонамі, над уваходам хоры.

ЛІТАРАТУРА

1. Касцёл Маці боскай // Збор помнікаў гісторыі і культуры Беларусі. Віцебская вобласць / рэдкал.: С. В. Марцэлеў [і інш.]. – Мінск : БелСЭ імя П. Броўкі, 1985. – С. 236

2. Касцёл Унебаўзяцця Найсвяцейшай Дзевы Марыі // Каталіцкія храмы Беларусі / А. М. Кулагін ; фат. А. Л. Дыбоўскі. – Мінск : БелЭн, 2008. – С. 302.

3. Касцёл Ушэсця Найсвяцейшай Дзевы Марыі // Каталіцкія храмы на Беларусі : энцыклапедычны даведнік / А. М. Кулагін ; маст. І. І. Бокі. – Мінск : БелЭн, 2000. – С. 127–128.

4. Костел Внебовзятой Найсвятейшей Девы Марии // Духовные святыни Витебщины = Geistliche heiligtuemer des Gebiest Witebsk / текст Н. И. Степаненко, В. Г. Синковец. – Витебск : Национальное агенство по туризму, 2007. – С. 24.