Руіны драўлянай царквы. Талачынскі раён, ля в. Рэчкі

Подробности

Створана 03.02.2020 15:23

Адноўлена 03.02.2020 11:31

Руіны драўлянай царквы размешчаны на могілках паміж вёскамі Рэчкі і Галошава.

Па стылявых характарыстыках адносяцца да канца XVIII – пачатку XIX стст.

Храм складаўся з двух прамавугольных зрубаў аднолькавай вышыні, асноўнага і алтарнага, накрытых агульным дахам.

Сцены мелі традыцыйную для беларускага храмабудаўніцтва вертыкальную шалёўку дошкамі з нашчыльнікамі.

Уваход быў аформлены невысокім ганкам: двухсхільным дахам на двух слупах.

Архіўныя дакументы вёскі Галошава згадваюць дзве царквы. Адна з іх у імя святога Духа, названа ў дакуменце 1784 года, паўторна згадваецца ў 1905 годзе як драўляная, крытая гонтай. Паблізу знаходзілася другая царква ў імя святога Барыса і Глеба, пабудаваная ў 1803 годзе. У 1812 годзе Барысаглебскую царкву спалілі французы, а на яе месцы ў 1830 г. была пабудавана новая драўляная царква, якая таксама згадваецца ў дакументах 1908 года.

У Віцебскім абласным краязнаўчым музеі захавалася справа аб адкрыцці пасля Вялікай Айчыннай вайны ў Галошаве праваслаўнага прыхода і пераносе ў 1947 годзе на вясковыя могілкі драўлянай царквы.

Верагодна, што менавіта гэты храм знаходзіцца ў зруйнаваным стане.

ЛІТАРАТУРА

1. Габрусь, Т. В. Историко-архитектурная панорама Друцко-Толочинского региона / Т. В. Габрусь // Друцк / О. Н. Левко [и др.] ; редкол.: А. А. Коваленя [и др.]. – Минск : Беларуская навука, 2014. – С. 535–545. – (Древнейшие города Беларуси).