Касцёл святога Лаўрэнція. Ушацкі раён, г. п. Ушачы
- Подробности
- Створана 18.10.2018 15:23
- Адноўлена 14.05.2020 11:27
Касцёл святога Лаўрэнція, пабудаваны ў 1913 годзе, з'яўляецца асноўнай славутасцю г. п. Ушачы. А вось парафія ва Ушачах бярэ свой пачатак з 1716 года, калі падваявода полацкі Іеранім Жаба разам з жонкай заснавалі касцёл і кляштар дамініканцаў. У 1787 годзе манахі-дамініканцы ўзвялі 2-павярховы мураваны кляштар, заклалі 6-класную школу-вучылішча (дзейнічала да 1839 года). Інтэр'ер храма быў распісаны фрэскамі адным з ксяндзоў-дамініканцаў. Яшчэ ў 1758 годзе м. Ушачы атрымала магдэбургскае права і герб, на якім была выява святога Лаўрэнція. Менавіта з таго часу і да нашых дзён святы Лаўрэнцій з'яўляецца апекуном г. п. Ушачы, а касцёл носіць яго імя.
У 1863 годзе касцёл і кляштар закрыты, будынкі часткова разбураны, усё літургічнае начынне перанесена ў касцёл у в. Селішча. Энергічныя намаганні парафіян (каля 1600 чалавек) па вяртанні касцёла пачалі здзяйсняцца з 1905 года пасля прыняцця ўрадам талерантнага закона. Быў атрыманы дазвол на будаўніцтва новага храма. Яно пачата ў 1908 годзе, закончана ў 1913 годзе. Храм закрыты ў 1932 годзе.
Дзякуючы намаганням лепельскага пробашча ксяндза Мечыслава Янцышына, у 1994 годзе парафія святога Лаўрэнція адрадзілася. У 2001 годзе, амаль праз два стагоддзі, ва Ушачах быў прызначаны пастаянны пробашч і перададзена пляцоўка з касцёлам, які пачалі аднаўляць. Тут праводзяцца рэгулярныя заняткі для дзяцей і моладзі, адбываюцца духоўныя сустрэчы для паглыблення рэлігійных ведаў. 24 кастрычніка 2004 года біскуп Віцебскай дыяцэзіі Уладзіслаў Блін урачыста асвяціў адбудаваную святыню.
Архітэктура мураванага храма вырашана ў стылі неаготыкі. Адносіцца да тыпу 2-вежавых 1-нефавых храмаў з 3-граннай апсідай. Гатычны характар будынку надаюць высокія стральчатыя аконныя праёмы, ступеньчатыя контрфорсы, аркатурны фрыз, фіялы. Вельмі шанаваўся маляваны на палатне абраз «Найсвяцейшая Дзева Марыя» ў сярэбранай рызе. Першапачаткова галоўны фасад касцёла ўпрыгожвалі дзве вежы, але да цяперашняга часу яны не захаваліся. Тым не менш, касцёл у г. п. Ушачы з'яўляецца цікавым турыстычным аб'ектам, важным архітэктурным помнікам пачатку ХХ ст., гісторыка-культурнай каштоўнасцю Беларусі.
|
ЛІТАРАТУРА
1. Багдановіч, Н. Рабіць дабро не напаказ / Н. Багдановіч // Патрыёт (Ушачы). – 2019. – 14 жн. – С. 5.
2. Багдановіч, Н. Свята заступніка Ушач / Н. Багдановіч // Патрыёт (Ушачы). – 2015. – 12 жн. – С. 4.
3. Караленка, В. Са светлай радасцю ў свой храм / В. Караленка // Патрыёт (Ушачы). – 2004. – 27 кастр. – С. 2.
4. Караленка, В. Ушацкаму касцёлу – 100 год / В. Караленка // Патрыёт (Ушачы). – 2014. – 9 жн. – С. 4.
5. Караленка, В. Што пакінем пасля сябе? / В. Караленка // Патрыёт (Ушачы). – 2008. – 6 верас. – С. 3.
6. Касцёл святога Лаўрэнція // Каталіцкія храмы Беларусі / А. М. Кулагін ; фат. А. Л. Дыбоўскі. – Мінск : БелЭн iмя П. Броўкi, 2008. – С. 361.
7. Степан, В. Был, есть, будет / В. Степан // Советская Белоруссия. – 2009. – 28 авг. – С. 13.
СПАСЫЛКІ
