Касцёл Хрыста Валадара. Мёрскі раён, в. Лявонпаль

Подробности

Створана 07.09.2020 15:23

Адноўлена 07.09.2020 08:52

Касцёл Хрыста Валадара з'яўляецца помнікам архітэктуры барока. Знаходзіцца на заходняй ускраіне вёскі. Ён быў адкрыты ў мураваным палацы, пабудаваным у 1750 годзе ўладаром маёнтка М. Лапацінскім. У 1769 годзе Лапацінскі пабудаваў у маёнтку капліцу. Палац быў часткова зруйнаваны ў гады Першай сусветнай вайны.

У 1920-я гады за кошт былых уладальнікаў палац пераабсталяваны пад касцёл, які праіснаваў да 1939 года. З 1939 года ў будынку месцілася праўленне калгаса «17 верасня». Пасля тут знаходзілася сельскагаспадарчае вучылішча, школа-інтэрнат, клуб. Будынак з цягам часу стаў занядбаным, а потым і ўвогуле закінутым. У 1992 годзе палац зноў вярнулі мясцовым жыхарам.

Адведзеная пад касцёл цэнтральная прамавугольная ў плане 2-светлавая зала на франтальным фасадзе завершана фігурным франтонам, над якім у 1920-я гады надбудавана сігнатурка з крыжом (адноўлена ў канцы ХХ ст.). Аб'ёмна-прасторавая кампазіцыя будынка сіметрычна-восевая, 3-часткавая. Цэнтральны 2-павярховы аб'ём і 1-павярховыя бакавыя крылы аб'яднаны папярочным корпусам. Фасады расчлянёны прамавугольнымі аконнымі праёмамі ў прафіляваных ліштвах, крапаваны вуглавымі лапаткамі.

ЛІТАРАТУРА

1. Аніськовіч, А. Лявонпальскія замалёўкі / А. Аніськовіч // Віцебскі сшытак : гістарычны навукова-папулярны альманах / рэд. Л. Хмяльніцкая. – Мінск : НББ, 2017. – Вып. 5. – С. 31–52.

2. Архітэктурная спадчына Лявонпаля і яе лёс // Гонар і слава Віцебшчыны : зборнік матэрыялаў конкурсу «Гісторыя славутых родаў Беларусі» / уклад. Л. І. Сіманенак. – Віцебск : ГА «Фонд імя Льва Сапегі» і ГАЦМI «Контур», 2001. – С. 21–24.

3. Касцёл Хрыста Валадара // Каталіцкія храмы на Беларусі / А. М. Кулагін ; фат. А. Л. Дыбоўскі. – Минск : БелЭн iмя П. Броўкi, 2008. – С. 205.

4. Лапацінскія з Лявонпаля: радавод (ХV–XIX в.): пакінулі архітэктурную спадчыну // Міёрскія навіны. – 2002. – 12 сак. – С. 3–4.

5. Матэленак, Л. Лявонпалю – 1000 / Л. Матэленак // Сцяг працы (Мiёры). – 2000. – 11 лiп. – С.1–3.

6. Тропинками славного Леонполя // Очарование Миорского края = Сharm of Myory region / cост.: В. А. Ермалёнок, П. И. Боголей ; фото О. В. Молодечкин. – Новополоцк : О. В. Молодечкин, 2007. – С. 26–27.