Касцёл Беззаганнага Зачацця Найсвяцейшай Дзевы Марыі. Мёрскі раён, г. Дзісна

Подробности

Створана 03.09.2020 15:23

Адноўлена 07.09.2020 14:17

Мураваны каталіцкі храм з'яўляецца помнікам архітэктуры позняга барока.

У 1583 годзе Стафан Баторый заснаваў у Дзісне манастыр францысканцаў. Праз 190 гадоў на беразе аднайменнай ракі быў пабудаваны касцёл Беззаганнага Зачацця Дзевы Марыі. Касцёл вырашаны 1-нефавым бязвежавым аб'ёмам, які пераходзіць у магутную паўкруглую апсіду. Бакавыя фасады рытмічна расчлянёны арачнымі аконнымі праёмамі і тонкімі лапаткамі ў прасценках. Зала была перакрыта цыліндрычным скляпеннем на распалубках, якія абапіраліся на прысценныя, крапаваныя пілястрамі пілоны. У інтэр'еры апсідную сцяну ўпрыгожваў стукавы алтар у стылі ракако.Захаваліся фрагменты блакітна-белай арнаментальнай мазаічнай падлогі.

У ансамбль манастыра некалі ўваходзіў і жылы корпус, які датуецца пачаткам XIX ст. Аднак да нашых дзён ён не захаваўся. Касцёл таксама чакаў няпросты лёс. Падчас Другой сусветнай вайны ён быў сур'ёзна пашкоджаны і не аднаўляўся. У 1958 годзе касцёл узарвалі разам з пахаваннямі, якія знаходзіліся пад падлогай. Засталіся толькі тры сцяны, пярэдняя сцяна была разбурана.

У 80-я гады XX ст. была зроблена прыбудоўка да паўднёвай сцяны. З'явілася капліца ў сакрыстыі былога касцёла, у якой зараз праходзяць службы. У 2007 годзе ў касцёле пачаліся работы па яго аднаўленні. Дзякуючы гэтаму, Дзісна зможа вярнуць сабе адну з галоўных сваіх каштоўнасцей.

ЛІТАРАТУРА

1. Адамовіч, В. Ксёндз Вячаслаў Адамовіч: «Кожную вольную хвіліну прысвячаю таму, што люблю...» / В. Адамовіч ; гутарыў З. Лупач // Каталіцкі веснік. – 2018. – № 1 (студз.). – С. 8.

2. Баговіч, П. Каталіцтва ў Дзісне / П. Баговіч // Міёрскія навіны. – 2016. – 26 сак. – С. 8.

3. Богович, П. Святыня ждет спасителей / П. Богович // Народнае слова. – 1999. – 5 студз. – С. 4.

4. Касцёл Беззаганнага Зачацця Найсвяцейшай Дзевы Марыі // Каталіцкія храмы Беларусі / А. М. Кулагін ; фат. А. Л. Дыбоўскі. – Мінск : БелЭн імя П. Броўкі, 2008. – С. 123–124.

5. Шымуковіч, Ф. Святыя месцы г. Дзісны / Ф. Шымуковіч // Вольнае Глыбокае. – 2011. – 14 ліп. – С. 5 ; 21 ліп. – С. 5.