Сядзіба. Аршанскі раён, в. Высокае

Подробности

Створана 16.10.2018 15:23

Адноўлена 20.02.2024 08:40

Сядзіба знаходзіцца на паўночнай ускраіне в. Высокае. Пабудавана на мяжы XIX–XX ст. Ядро сядзібнага ансамбля спланавана па сіметрычна-восевай схеме, у цэнтры якой жылы дом. Перад ім прамавугольны двор, фланкіраваны 2 флігелямі. Сядзібны дом складаецца з драўлянага аднапавярховага корпуса і пазнейшай двухпавярховай мураванай прыбудовы. Прамавугольная ў плане прыбудова вылучана ў цэнтры паўднёвага фасада пяцігранным эркерам са стральчатымі аконнымі праёмамі. Яе цокальны паверх расчлянёны лучковымі падвальнымі вокнамі. Першы паверх дэкарыраваны рустам, другі – руставанымі вуглавымі лапаткамі і абрамленнем аконных праёмаў у выглядзе прафіляваных ліштваў з трохвугольнымі франтончыкамі і падаконнымі філёнгамі.

Непадалёк ад сядзібнага дома знаходзіцца пабудаваны ў 1912 годзе аднапавярховы мураваны флігель з мансардавым паверхам. На галоўным фасадзе выступае пяцігранны двухпавярховы эркер, у дэкоры выкарыстаны руст, меандр. Другі флігель мае традыцыйныя рысы сельскага зрубнага дома. Аднапавярховы будынак пад вальмавым дахам, у цэнтры ганак са слупамі, стылізаванымі пад калоны.

Сядзіба – помнік эклектычнай архітэктуры.

ЛІТАРАТУРА

1. Высоковская усадьба // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 282.

2. Высокое // Садово-парковое искусство Белоруссии / А. Т. Федорук. – Минск : Ураджай, 1989. – С. 231.

3. Высокое // Сядзібы Віцебшчыны : даведнік / М. В. Півавар ; рэцэнзент А. У. Русецкі ; фота і іл. А. Адама і інш. – Мінск : Беларуская Энцыклапедыя імя Петруся Броўкі, 2020. – С. 19–20.

4. Караткевіч, В. Б. Сядзіба / В. Б. Караткевіч, А. М. Кулагін // Збор помнікаў гісторыі і культуры Беларусі. Віцебская вобласць / рэдкал.: С. В. Марцэлеў [і інш.]. – Мінск : БелСЭ імя П. Броўкі, 1985. – С. 103–104.

5. Півавар, М. В. Высокаўская сядзіба / М. В. Півавар // Культура Беларусі : энцыклапедыя : [у 6 т.] / / рэдкал.: Т. У. Бялова [і інш.]. – Мінск : БелЭн імя П. Броўкі, 2011. – Т. 2 : Б–Г. – С. 419–420.

6. Сядзіба // Памяць: Орша. Аршанскі раён : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; уклад.: Т. Г. Ігнацьева [і інш.] ; мастак Э. Э. Жакевіч. – Мінск : БелЭн, 2000. – Кн. 2. – С. 464–465.

7. Турок, Н. Маляўнічы парк, сядзіба, царква. Чым прываблівае Высокае? / Н. Турок // Аршанская газета. – 2020. – 6 чэрв. – С. 5