Парк ландшафтны. Глыбоцкі раён, в. Мосар

Подробности

Створана 21.10.2019 15:23

Адноўлена 21.10.2019 11:08

Парк заклаў больш за 20 гадоў таму назад ксёндз Юозас Булька.

Ізумрудныя газоны, экзатычныя кветкі (больш за 180 відаў раслін), вадаёмы з лілеямі, шматлікія скульптуры, алеі і жывыя загарадзі з дрэў і хмызнякоў хвойных парод, арачныя праходы, вазоны, клумбы набліжаюць сад да знакамітага парку Версаль.

На ўзвышшы знаходзіцца касцёл Святой Ганны.

Цэнтральныя прысады саду ўпрыгожваюць скульптура «Аплакванне Хрыста», помнікі Ісусу Хрысту і папу рымскаму Яну Паўлу II.

На тэрыторыі парку налічваецца некалькі сотняў дрэў і кустоў хвойных парод. Адразу прыцягваюць увагу шэрагі пірамідальных туй. Выдатным аздабленнем ўсяго саду сталі жывыя загарадзі туі еўрапейскай і кізільніка. Своеасабліва выкарыстаны для плота кохія і астра. Ідэальная жывая агароджа атрымалася з магутнага шматгадовага хмызняку – Маклая. Буйнае, рэдкай афарбоўкі і незвычайнае па форме лісце з серабрыстым ніжнім бокам і дробныя кветкі ў высокіх мяцёлках утвараюць вельмі прывабную кампазіцыю. Шыкоўныя зялёныя кулісы і аркі ўтварыў вінаград.

Выдатным фонам для кустоў і камянёў сталі глебапокрыўныя расліны. У парку паўсюдна як бы вырастаюць з навакольнага пейзажу дэкаратыўныя кампазіцыі з камянёў, вечназялёных кустоў і кветак. З каменя зробленыя своеасаблівы плот, шматлікія аркі, альпійскія горкі, рабаткі. Па-майстэрску згрупаваныя валуны ў спалучэнні з папараццю, зёлкавымі травамі імітуюць цэлыя горныя ландшафты.

На тэрыторыі парку тры вялікія возеры. Ёсць дзве крыніцы і некалькі штучных вадаёмаў. На іх берагах расце бузульнік Пржэвальскага. Вадаёмы ўпрыгожаны прыгожымі фантанамі і карункавымі масткамі. Усё лета тут можна бачыць дыван з жоўтых і белых гарлачыкаў.

Шмат гадоў таму назад на тэрыторыі ландшафтнага парку размяшчаўся графскі парк з дубовай алеяй. Аб ім нагадваюць два велізарныя дубы, якім больш за 200 гадоў. Растуць яны на пагорку побач з касцёлам.

ЛІТАРАТУРА

1. Берникович, Д. «Мосарский Версаль» есть и будет! / Д. Берникович // Народнае слова. – 2011. – 7 ліп. – С. 16.

2. Берникович, Д. Торжество в «белорусском Версале» / Д. Берникович // Витебские вести. – 2016. – 28 июня. – С. 8.

3. Дым, Н. Райский уголок Юозаса Бульки / Н. Дым // Народная газета. – 2005. – 14 студз. – С. 1, 4.

4. Мядзелец, А. Брэнд азёрнага краю / А. Мядзелец // Літаратура і мастацтва. – 2012. – 31 жн. – С. 23.

5. Сауліч, У. Пабачыць Мосар. І ўспомніць Бульку: чым адметны сённяшні дзень 500-гадовай глыбоцкай вёскі / У. Сауліч // Сельская газета. – 2014. – 2 сент. – С. 1–2.

6. Сурвіла, В. І. Ландшафтны парк і касцёл у в. Мосар Глыбоцкага раёна / В. І. Сурвіла // Образование XXI века : материалы XI (56) Региональной научно-практической конференции студентов и магистрантов, 24–25 марта 2011 г. / редкол.: А. П. Солодков [и др.]. – Витебск : ВГУ им. П. М. Машерова, 2011. – С. 154–155.

7. Яновская, О. Мосар – райский уголок / О. Яновская // Родная прырода. – 2017. – № 10. – С. 48–49.