Пастаўскі малочны завод, ААТ. Пастаўскі раён

Подробности

Створана 03.10.2017 12:23

Адноўлена 14.03.2019 11:27

ААТ «Пастаўскі малочны завод» – адно з лепшых і найстарэйшых горадаўтваральных прадпрыемстваў горада і раёна. Першыя архіўныя звесткі пра наяўнасць у Паставах прадпрыемства па перапрацоўцы малака сустракаюцца ў даваенных крыніцах. 1 ліпеня 1939 г. прынята лічыць датай заснавання Пастаўскага завода па перапрацоўцы малака. Пасля вызвалення Заходняй Беларусі і стварэння ў 1940 г. Пастаўскага раёна прадпрыемства нацэльвалася на прыёмку малака ад насельніцтва і яго першасную перапрацоўку. У перыяд нямецка-фашысцкай акупацыі 1941–1944 гг. завод працаваў толькі часткова. Ён тады размяшчаўся па вул. Паркавай, 4 і вырабляў выключна сметанковае масла. Пасля вызвалення г. Паставы Савецкай Арміяй 5 ліпеня 1944 г. завод працягнуў сваю працу. Адначасова на ім вяліся аднаўленчыя работы. Штат завода складаўся тады ўсяго з 10 чалавек. З лістапада 1944 г. завод увайшоў у склад Пастаўскага раймаслапрама Маладзечанскага трэста аблмаслапрама. З 1949 г. прадпрыемства стала галаўным маслазаводам Маладзечанскага абласнога трэста «Маслопром». 7 верасня 1953 г. Пастаўскае раённае заводаўправленне было скасавана, завод атрымаў назву «Пастаўскі маслазавод» і пэўную гаспадарчую самастойнасць. Праз год, у лістападзе 1954 г., ён стаў галаўным маслазаводам у Пастаўскім раёне. Пасля скасавання Маладзечанскай вобласці ў 1960 г. завод увайшоў у падпарадкаванне Віцебскаму абласному трэсту «Маслопром». У сувязі з ростам насельніцтва ў г. Паставы, павелічэннем попыту на малочную прадукцыю, а таксама з павелічэннем аб’ёмаў закупак малака ў калгасаў, саўгасаў і ў насельніцтва паўстала пытанне аб неабходнасці будаўніцтва новага малакаперапрацоўчага завода ў райцэнтры. На гэты конт было прынята адпаведнае ўрадавае рашэнне. Для будаўніцтва новага завода ў 1958 г. быў адведзены зямельны ўчастак на плошчы 2,25 га, размешчаны з паўднёва-ўсходняга боку горада. У 1961 г. на пастаўскай зямлі было распачата будаўніцтва новага завода на тым месцы, дзе ён зараз і размяшчаецца.

Выпускаемая прадукцыя: сыры, кісламалочныя прадукты, алей, малако, вяршкі, смятана.

У 2005 г. прадпрыемства рэалізавала спажыўцам разнастайнай прадукцыі амаль на 17 мільярдаў рублёў, рост склаў 21 %. Высокая канкурэнтаздольнасць яе пацвярджаецца 35-% ростам экспартных паставак, якія ў агульным аб’ёме рэалізацыі прадукцыі на канец года склалі 45 %. Прыбытак за год чакаецца ў межах аднаго мільярда рублёў. Завод не ведае праблем з рэалізацыяй прадукцыі. У гандлёвую сетку раёна, Віцебска, Мінска і іншых гарадоў яна дастаўляецца па заяўках гандлю і іншых надзейных партнёраў.

У залатой скарбонцы прадпрыемства немала ўзнагарод. Самыя апошнія з іх – дыплом фіналіста ў намінацыі «Традыцыйныя беларускія прадукты» прэміі «Народная марка Беларусі-2017», два Гран-пры і прызавыя месцы ў народным конкурсе-дэгустацыі «Чэмпіён густу» (г. Мінск), перамога ў «Лепшых таварах Рэспублікі Беларусь-2017».

На сённяшні дзень ААТ «Пастаўскі малочны завод» з’яўляецца адным з найбуйнейшых прадпрыемстваў раёна. Удзельная вага яго прадукцыі ў агульным аб’ёме прамысловай вытворчасці складае крыху больш за 31 %. ААТ «Пастаўскі малочны завод» з’яўляецца рэгіянальным прадпрыемствам Віцебскай вобласці, якое займае 9,8 % у агульным выпуску малочнай прадукцыі. Такім чынам, сёння доля завода ў агульным балансе малочнай прадукцыі краіны складае прыкладна 1 %. Існуючыя вытворчыя магутнасці завода разлічаны на выпуск у год пры адназменнай працы 1020 т масла жывёльнага, 6000 т сыру, за 22000 т натуральнамалочнай прадукцыі. Найбольшую ўдзельную вагу ў агульным аб’ёме вытворчасці на сённяшні дзень маюць сыры – 60 %. Удзельная вага натуральнамалочнай прадукцыі складае 25 %, масла жывёльнага – 7 %. Прыкладна 8 % прыпадае на іншыя пазіцыі (сыроватка, ЗЦМ і інш.). Вытворчыя магутнасці загружаныя на ўзроўні, дастатковым для рэнтабельнай працы прадпрыемства.

Адрас: Віцебская вобласць, Пастаўскі раён, г. Паставы, вуліца Крупскай, 84.

ЛІТАРАТУРА

1. Боровикова, О. Все краски жизни / О. Боровикова // СБ. Беларусь сегодня. – 2017. – 27 июня. – С. 6.

2. Бут, А. В Поставах сыра будет много. Но!.. / А. Бут // Віцебскі рабочы. – 2012. – 2 жн. – С. 10.

3. Бут, А. К свершениям готов! / А. Бут // Віцебскі рабочы. – 2011. – 9 июня. – С. 10.

4. Гарлуковіч, Т. Г. Малыя, ды ўдалыя / Т. Г. Гарлуковіч ; гутарыў У. Сауліч // Вiцебскi рабочы. – 2006. – 12 снеж. – С. 2.

5. Касаткина, Ф. Народ оценил / Ф. Касаткина // Пастаўскі край. – 2017. – 21 чэрв. – С. 1.

6. Касцень, Г. П. «Работа над якасцю і мадэрнізацыя дазваляюць не губляць рынкі» / Г. П. Касцень ; гутарыла А. Шапавалава // Пастаўскі край. – 2017. – 18 лістап. – С. 3.

7. Молочные реки с сырными берегами / подгот.: А. Быньков, Э. Каролевич // Витебские вести. – 2016. – 17 дек. – С. 8–9.

8. Наумова, А. От хорошего – к лучшему, от лучшего – к совершенству / А. Наумова // Сельская газета. – 2018. – 29 марта. – С. 14.

9. Пастернак, Т. Натуральные продукты от «Поставы городка» / Т. Пастернак // Народнае слова. – 2007. – 26 чэрв. – С. 5.

10. Поставский молочный завод // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 361–362.

11. «Поставы городок»: новый этап развития // Народная газета. – 2013. – 10 снеж. – С. 9.

12. Танана, А. Представили себя достойно / А. Танана // Пастаўскі край. – 2018. – 28 лют. – С. 3.

13. Філановіч, В. «Паставы-гарадок» – гэта высокая якасць / В. Філановіч // Пастаўскі край. – 2015. – 12 лют. – С. 3.

14. Хількевіч, У. «Паставы–гарадок» жыве і змагаецца / У. Хількевіч // Звязда. – 2006. – 28 студз. – С. 8.

15. Шпаковская, Г. «Всегда высокое качество продукции!» / Г. Шпаковская // Витебские вести. – 2018. – 27 февр. – С. 2.

16. Юхно, И. У. «Поставы-городок» – гарантия качества / И. У. Юхно ; беседовала С. С. Потенкова // Вiцебскi рабочы. – 2007. – 21 ліп. – С. 3.

СПАСЫЛКІ

1. О предприятии  ОАО «Поставский молочный завод»