Афганистан. Без права на забвение

Афганистан. Без права на забвение

Афганистан. Без права на забвение

Художники Витебщины

Художники Витебщины

Художники Витебщины

«Віцебскае вытворчае ўпраўленне па здабычы і перапрацоўцы торфу», філіял УП «Віцебскаблгаз». Докшыцкі раён, аг. Крулеўшчына

 

Сучасная назва філіял «Віцебскторф» УП «Віцебскаблгаз»
Былая назва Віцебскае» торфапрадпрыемства
Дата заснавання 1967
Месца знаходжання  Віцебская вобласць, Докшыцкі раён, аг. Крулеўшчына
Галіна паліўна-энергетычная прамысловасць
Сайт https://www.torf.by

 

У 2011 годзе ў аг. Крулеўшчына Докшыцкага раёна ўведзены ў эксплуатацыю новы завод па вытворчасці грунтоў пажыўных і кіпавання торфу верхавога вытворчай магутнасцю 38 тыс. тон прадукцыі ў год, на якім было ўстаноўлена абсталяванне вядучых сусветных вытворцаў: Premier Tech – Канада, Ehcolo – Данія, Kruviks – Эстонія, Warnking – Германія .

Але ж здабываць пажыўны торф пачалі яшчэ ў 1956 годзе. У першыя пасляваенныя дзесяцігоддзі энергетыка Беларусі працавала пераважна на гэтым відзе паліва. Тады было заснавана торфапрадпрыемства «Рамжына», закладзены жылы пасёлак для рабочых і спецыялістаў, якія прысылаліся сюды з усёй краіны.

Будаўніцтва торфабрыкетнага завода ў Крулеўшчыне пачалося ў 1964 годзе. У 1967 годзе ён атрымаў назву «Віцебскі». Да гэтага часу ўжо была пабудавана вузкакалейка, якая звязвала прадпрыемства з участкамі торфаздабычы. Здадзены «пад ключ» два 18-кватэрныя дамы ў новым пасёлку. З гэтага часу пачынаецца росквіт торфабрыкетнага завода, пік якога прыйшоўся на 70-я гг. У 1978 годзе ён стаў удзельнікам Усесаюзнай выставы дасягненняў народнай гаспадаркі, дзе быў узнагароджаны медалём 2-й ступені.

Але ў 90-я гг. мінулага стагоддзя торфапрадпрыемства было ўжо ў заняпадзе. Таму было некалькі прычын як аб'ектыўнага, так і суб'ектыўнага характару. І галоўным было тое, што пачынаючы з 60-х гадоў, у СССР актыўна пракладваліся вялікія магістральныя газапровады і каштоўнасць торфу пачала зніжацца. Пакуль на долю торфу засталося 3 % у агульным энергетычным балансе краіны.

Новае дыханне тарфяная прамысловасць, у тым ліку і Крулеўшчынскае прадпрыемства, атрымала, дзякуючы Дзяржаўнай праграме «Торф» на 2008-2010 гг. і распрацаванай да 2020 года. Перш, чым прыступіць да яе рэалізацыі, торфапрадпрыемствы аб'ядналіся з газавай гаспадаркай.

У 2007 годзе торфапрадпрыемства «Віцебскае» ўвайшло ў склад вытворчага рэспубліканскага ўнітарнага прадпрыемства «Віцебскаблгаз» і стала філіялам пад назвай «Докшыцкае раённае вытворчае ўпраўленне газавай гаспадаркі» (РВУ «Докшыцырайгаз»).

Прадаваць проста сыравіну было нявыгадна, а таму ў сціслыя тэрміны была стварана сучасная вытворчасць па выпуску торфапрадукцыі. У Крулеўшчыне вельмі хутка быў пабудаваны ўнікальны для Беларусі экспартаарыентаваны завод па вытворчасці пажыўных грунтоў і кіпаванага торфу. Мадэрнізацыя вытворчасці заняла каля двух гадоў.

У 2015 годзе пасля рэканструкцыі раённых вытворчых упраўленняў, у тым ліку «Докшыцырайгаза», быў створаны філіял «Віцебскае вытворчае ўпраўленне па здабычы і перапрацоўцы торфу» (ВУ «Віцебскторф») унітарнага прадпрыемства «Віцебскаблгаз» разам з Полацкім і Лукомльскім філіяламі, з юрыдычным адрасам у в. Крулеўшчына.

Прадпрыемства інтэнсіўна працягвае развівацца. Асвоены новы від прадукцыі – разны торф. Гэта новая тэхналогія, пры якой торф з поля забіраюць нарэзанымі кускамі, што дазваляе захаваць некранутай прыродную структуру. Атрыманая ў выніку яе прымянення прадукцыя ідзе на экспарт. Апрабаваны яшчэ адзін спосаб здабычы – пнеўматычны, калі торф валкуецца, з насцілу засмоктваецца пнеўмамашынай, і ўжо ў яе бункеры разрэджваецца. Прымяненне падобнай тэхналогіі, якая не залежыць ад надвор'я, дазволіць яшчэ больш павялічыць аб'ёмы здабычы торфу.

Сучаснае абсталяванне і прафесійны падбор кадраў дазваляе выпускаць прадукцыю высокай якасці, якая задавальняе самых патрабавальных кліентаў. Так пажыўныя грунты «Дзвіна» неаднаразова станавіліся лаўрэатамі конкурсу «Лепшыя тавары Рэспублікі Беларусь».

Завод сёння – гэта сучаснае прадпрыемства, якое выпускае шырокі асартымент вырабаў у рознай фасоўцы, гаме фракцыйнага складу, прадукцыя экспартуецца больш чым ў 20 краін свету: Расію, Казахстан, Украіну, Турцыю, Германію, Італію, Балгарыю, Чэхію, Швейцарыю, Славакію і іншыя краіны. Пажыўны грунт «Дзвіна» прадаецца ва ўсіх буйных гарадах Беларусі (Магілёве, Рэчыцы, Мінску, Гомелі, Наваполацку і інш.), а таксама ў Польшчы.

І наогул УП «Віцебскаблгаз» з'яўляецца адным з лідэраў у краіне па вытворчасці і продажы тарфяных пажыўных грунтоў. Тут распрацавана больш за 60 рэцэптур тарфяных грунтоў для розных відаў раслін. Прадпрыемства вырабляе каля 30 тыс. тон верхавога торфу ў вялікіх кіпах біг-болях – аб'ёмам да шасці кубаметраў і каля 5 тыс. тон пажыўных грунтоў.

Адрас: Віцебская вобласць, Докшыцкі раён, аг. Крулеўшчына, вул. Заводская, 37.

 

Завод па вытворчасці пажыўных грунтоў і кіпавання верхавога торфу. Фотаздымак з сайта http://vitvesti.by/Завод па вытворчасці пажыўных грунтоў і кіпавання верхавога торфу. Фотаздымак з сайта http://vitvesti.by/

ЛІТАРАТУРА

1. Працуе і развіваецца / падрыхт. Т. Альшэўская ; фота В. Чарвінскага // Родныя вытокі (Докшыцы). – 2016. – 14 мая. – С. 4.

2. Берникович, Д. Высокое качество гарантирует успех / Д. Берникович // Витебские вести. – 2016. – 12 июля. – С. 5.

3. Бяляўская, Н. Прадпрыемства адраджаецца / Н. Бяляўская // Родныя вытокi (Докшыцы). – 2008. – 19 студз. – С. 2.

4. Лукьянова, Н. Антикризисный маневр... с торфом // Народнае слова. – 2009. – 25 крас. – С. 3.

5. Прадпрыемства айчынае – узровень еўрапейскі / старонку падрыхтавала А. Несцяронак // Родныя вытокі (Докшыцы). – 2018. – 1 верас. – С. 5.

6. Працуе і развіваецца / падрыхт. Т. Альшэўская // Родныя вытокі (Докшыцы). – 2016. – 14 мая. – С. 4.

7. Сауліч, У. Не дымяць трубы брыкетнага / У. Сауліч // Вiцебскi рабочы. – 2007. – 20 лют. – С. 1–2.

8. Шик, В. Обогрев – вечная проблема / В. Шик // Витебский курьер. – 2002. – 4 окт. – С. 3.