Віцебскаблгаз, ВРУП. г. Віцебск

Подробности

Створана 17.05.2017 12:23

Адноўлена 08.12.2023 15:13

ВРУП «Віцебскаблгаз» з'яўляецца шматпрофільным прадпрыемствам. Газавая гаспадарка Віцебскай вобласці – складаны інжынерны комплекс, асноўнай задачай якога з'яўляецца бесперабойнае і безаварыйнае газазабеспячэнне спажыўцоў, для чаго неабходна выконваць вялікі аб'ём работ па тэхнічным абслугоўванні газаразмеркавальнай сістэмы, прапагандзе і навучанні бяспечнаму карыстанню газам у прамысловасці, энергетыцы, сельскай гаспадарцы і ў быту.

Пачатак газіфікацыі і развіцця сістэм газазабеспячэння Віцебскай вобласці быў пакладзены ў 1960 годзе, калі былі створаны Віцебскі, а пазней – Аршанскі эксплуатацыйна-мантажныя ўчасткі звадкаванага газу. Менавіта яны пачалі манціраваць першыя газабалонныя ўстаноўкі ў сваіх гарадах. У студзені 1961 года быў створаны Полацкі ўчастак звадкаванага газу, а ў жніўні таго ж года Віцебскі ўчастак быў рэарганізаваны ў мантажна-эксплуатацыйную кантору па газіфікацыі Віцебскай вобласці. У сувязі з вялікімі транспартнымі выдаткамі на дастаўку звадкаванага газу з Мінска і ростам аб'ёмаў яго спажывання ў верасні 1960 года ў пасёлку Ноўка Віцебскага раёна пачалося будаўніцтва Віцебскай газанапаўняльнай станцыі. На працягу 1961–1962 гг. былі створаны Лепельскі, Глыбоцкі і Браслаўскі ўчасткі звадкаванага газу, пачалася газіфікацыя заходніх раёнаў Віцебскай вобласці. У снежні 1965 года быў створаны Віцебскі трэст па газіфікацыі, пачалося бурнае развіццё газіфікацыі Віцебскай вобласці. У жніўні 1975 года Віцебскі трэст па газіфікацыі пераўтвораны ў абласное аб'яднанне газавай гаспадаркі з шаснаццаццю спецыялізаванымі цэхамі.

Газіфікацыя вобласці прыродным газам пачалася з горада Оршы. У 1977 годзе завершана будаўніцтва газаправода-адвода ад магістральнага газаправода Таржок – Мінск – Івацэвічы. У ліпені таго ж года газ пачаў паступаць у жылыя дамы ў Оршы, а ў чэрвені 1980 года – у Віцебску. Першым прамысловым спажыўцом прыроднага газу стала кацельня вучэбна-вытворчага прадпрыемства сляпых у Оршы, у Віцебску – завод заточных станкоў. У 1988 годзе прыродны газ пададзены гарадам Дуброўна і Талачын. У 1991 годзе завершана будаўніцтва газаправода-адвода Крупкі – Новалукомль і ў маі гэтага ж года на газавае паліва пераведзена Лукомская ДРЭС, якая з'яўляецца самым буйным спажыўцом прыроднага газу ў Рэспубліцы Беларусь. У 1994 годзе пабудаваны газаправод-адвод Новалукомль – Наваполацк, а ў студзені 1995 года прыродны газ пададзены і Наваполацкай ЦЭЦ. У гэтым жа годзе пераведзена на газавае паліва Полацкая ЦЭЦ. Сёння ж усе буйныя энергетычныя аб'екты вобласці працуюць на газавым паліве.

З уводам у эксплуатацыю газаправода-адвода Крупкі – Новалукомль – Наваполацк з'явілася магчымасць падачы прыроднага газу паўночна-заходнім раёнам вобласці. У 1996 годзе прыродны газ пададзены ў Чашнікі, 1997 г. – ва Ушачы, 1998 г. – у Лёзна, 1999 г. – у Лепель, 2000 г. – у Бешанковічы, 2001 г. – у Сянно і Шуміліна, 2002 г. – у Гарадок. У 2004 годзе прыродны газ быў пададзены гарадам Глыбокае і Паставы, у 2006 г. – у Докшыцы, Верхнядзвінск, Мёры, Шаркаўшчыну і Браслаў. У 2007 годзе быў газіфікаваны апошні раённы цэнтр – г. п. Расоны.

Пачынаючы з 2005 года, у склад ВРУП «Віцебскаблгаз» увайшло аграрнае прадпрыемства «Мазалава», а адным з відаў дзейнасці стала вытворчасць сельскагаспадарчай прадукцыі: жывёлагадоўля, вытворчасць і рэалізацыя малака; вытворчасць і рэалізацыя насення азімых і яравых збожжавых культур, алейнага насення яравога рапсу, шматгадовых траў; вытворчасць і рэалізацыя камбікармоў.

З 2007 года ў дзейнасці прадпрыемства з'явіўся новы напрамак – здабыча торфу і вытворчасць торфапрадукцыі. У склад ВРУП «Віцебскаблгаз» увайшлі тры торфавытворчасці ў Докшыцкім, Шумілінскім і Чашніцкім раёнах, якія спецыялізуюцца на здабычы фрэзернага і кускавога паліўнага торфу, вытворчасці торфу кіпаванага і грунтоў пажыўных. Вырабленая торфапрадукцыя экспартуецца больш чым у 20 краін свету.

У 2014 годзе прадпрыемствам укаранёна тэхналогія выканання рамонтных работ на газаправодах з дапамогай стоп-сістэмы і часовага байпасу, дзякуючы якой з'явілася магчымасць выконваць работы без адключэння спажыўцоў. У тым жа годзе пачалося эксперыментальнае прымяненне дыстанцыйных дэтэктараў уцечак метану, што спрыяла павелічэнню хуткасці абследавання вонкавых газаправодаў, павышэнню якасці абслугоўвання падземных газаправодаў, а таксама з'явілася магчымасць абследавання размешчаных на вышыні і ў цяжкадаступных месцах газаправодаў і праверкі на загазаванасць закрытых падвалаў, пад'ездаў і кватэр праз шкло.

У цяперашні час у галіне газіфікавана больш за 500 тыс. кватэр, прыродны газ падаецца больш як 500 энергетычным, прамысловым і сельскагаспадарчым спажыўцам. Па аб'ёмах рэалізацыі газу прадпрыемства займае першае месца ў Рэспубліцы Беларусь. Працягласць газаправодаў складае больш за 6 тыс. км.

Зараз у склад ВРУП «Віцебскаблгаз» уваходзяць наступныя філіялы: ВУ «Віцебскгаз», ВУ «Полацкгаз», ВУ «Оршагаз», ВУ «Чашнікігаз», ВУ «Глыбокаегаз», ВУ «Браслаўгаз», ВУ «Метан», ВУ «Віцебскторф», СГВ «Мазалавагаз», філіял «АйТиГаз».

Адрас: Віцебская вобласць, горад Віцебск, вуліца Праўды, 36.

E-mail: Этот адрес электронной почты защищен от спам-ботов. У вас должен быть включен JavaScript для просмотра. .

ЛІТАРАТУРА

1. Быньков, А. Мазоловогаз – здесь и сейчас / А. Быньков // Віцьбічы = Витьбичи. – 2022. – 12 нояб. – С. 7.

2. «Витебскоблгаз» // Витебск : энциклопедический справочник / редкол.: И. П. Шамякин [и др.]. – Минск : БелСЭ им. П. Бровки, 1988. – С. 123.

3. Каролевич, Э. На «ты» с высокими технологиями / Э. Каролевич // Витебские вести. – 2022. – 2 авг. – С. 8.

4. Каролевич, Э. Раскрывая потенциал, брать новые высоты / Э. Каролевич // Витебские вести. – 2022. – 30 дек. – С. 6.

5. Каролевич, Э. Ставка на технологии и дисциплину / Э. Королевич // Витебские вести. – 2022. – 2 сент. – С. 12–13.

6. Каролевич, Э. Ставка на экспорт / Э. Каролевич // Витебские вести. – 2022. – 22 нояб. – С. 12–13.

7. Орловский, П. А. Газовая тема: про тарифы и не только / П. А. Орловский ; [беседовала] О. Шуйская // Полацкі веснік. – 2022. – 1 лют. – С. 3.

8. Полвека успешного развития: 1960–2010 гг. / под ред. П. П. Шершеня [и др.]. – Витебск : Витебская областная типография, 2010. – 160 с.

9. Производственное республиканское унитарное предприятие «Витебскоблгаз» сегодня: безаварийное и бесперебойное обеспечение газом потребителей! / отв. за вып. В. П. Бобриков. – Витебск : Витебская областная типография, 2018. – 70 с.

10. Сохраняя традиции, приумножать лучшее / подгот. С. Любочка // Віцьбічы = Витьбичи. – 2022. – 3 сент. – С. 4–5.

11. УП «Витебскоблгаз» // История газификации Республики Беларусь / [текст: Ю. Глушаков и др. ; под ред.: А. П. Кореца, А. А. Лапко ; авт. предисл.: В. Семашко, В. Потупчик ; фото И. Кузменков]. – Гомель : Вечерний Гомель–Медиа, 2014. – С. 164–213.

12. УП «Витебскоблгаз»: история и современность, 1960–2007 гг. / авт.-сост. С. Н. Шматов ; фото: А. Монастырский, Т. Петкевич. – Витебск : Витебская областная типография, 2007. – 80 с.