Віцебскія дываны, ААТ. г. Віцебск

Подробности

Створана 20.11.2023 08:23

Адноўлена 20.11.2023 10:36

ААТ «Віцебскія дываны» спецыялізуецца на вытворчасці дывановых вырабаў. Дзейнічае з 1947 года ў Віцебску як дывановы камбінат. Створаны на базе Віцебскай ільнопрадзільнай фабрыкі «Дзвіна» (дзейнічала з 1900 г.). Першы дырэктар – В. Коршунаў. У 1958–1961 гг. камбінат рэканструяваны для вытворчасці дывановай прадукцыі. У 1968 годзе – прадпрыемства імя 50-годдзя БССР. У 1978–1979 гг. працуе як фабрыка прашыўных дывановых вырабаў. У 1980 годзе на базе камбіната створана дывановае вытворчае аб'яднанне, у якое ўвайшла Віцебская фабрыка нятканых матэрыялаў (створана ў 1947 годзе як ільнопрадзільная шпагатная фабрыка). У снежні 1994 года дывановае вытворчае аб'яднанне рэарганізавана ў ААТ «Віцебскія дываны». У склад прадпрыемства ўваходзілі фабрыкі: ткацка-аддзелачная, прашыўных дывановых вырабаў, нятканых матэрыялаў. Асноўная прадукцыя: дываны і дывановыя вырабы (жакардавыя і аксмінстарскія паўшарсцяныя), дарожкі ворсавыя машыннай выпрацоўкі паўшарсцяныя і з хімічных валокнаў, прашыўныя (тафтынгавыя) дывановыя пакрыцці, швейны і мэблевы вацін, байка для абутку. У 2007 годзе ААТ «Віцебскія дываны» стала рэзідэнтам свабоднай эканамічнай зоны «Віцебск».

Развіццё тканых мастацка-прамысловых вырабаў прадпрыемства «Віцебскія дываны» адбывалася ў рэчышчы агульных тэндэнцый усходняга і еўрапейскага дываноў з выкарыстаннем традыцый беларускага дыванаткацтва. Гісторыя стварэння дываноў звязана са станаўленнем на Беларусі ворсавага дывана машыннай вытворчасці. У канцы 1940-х – 1950-я гады для набіўных стужкавых жакардавых дываноў мастакі Т. Гусева, М. Дзёмін, З. Луданэ, Г. Саленікава, В. Сенькіна, І. Шурупаў выкарыстоўвалі кампазіцыйныя схемы класічнага ўсходняга дывана з выразна акрэсленым цэнтрам і шлякам. У іх пераважалі матывы традыцыйнага беларускага арнаменту са строгай монакампазіцыяй і буйнымі геаметрызаванымі формамі (ромб, крыж), выкарыстоўвалася і арнаментыка іншых народаў свету. У 1960–1970-я гады сталі пашыранымі аксмінтарскія дываны, якія побач з прутковым жакардам складалі аснову асартыменту. Змяніліся суадносіны іх асноўных элементаў, часцей выкарыстоўваліся рапортныя кампазіцыі з эклектычным спалучэннем формаў, іх каларыстычная гама стала больш светлай. З другой паловы 1970-х гадоў асвойваецца вытворчасць тафтынгавых пакрыццяў з рэльефным і друкаваным малюнкам. Мастакі Я. Папова, У. Федаровіч, В. Шастоўскі шукаюць новыя мастацкія вырашэнні, шляк замяняецца бардзюрам, больш цэльным становіцца каларыт. Цэнтральнае месца ў кампазіцыях дываноў канца 1980-х гадоў адведзена асацыятыўным вобразам (мастакі Г. Бычкоўская, М. Кабанава, А. Свірыдзенка, Л. Цыбульская), складаны арнамент набыў жывапіснасць, падкрэслена гарманічным і вытанчаным стаў каларыт. Віцебскія дываны экспанаваліся на міжнародных выстаўках у Алжыры, Англіі, Бразіліі, Галандыі, Індыі, Турцыі, Францыі і інш.

У 1998 годзе пачалася новая эпоха ў развіцці ААТ «Віцебскія дываны» – прыярытэтным напрамкам было абрана развіццё двухпалотнага дыванаткацтва на сучасных ткацкіх станках з электроннай жакардавай машынай. Дадзенае рашэнне вылілася ў шэраг паспяховых інвестыцыйных праектаў і істотнае аднаўленне парка тэхналагічнага абсталявання для вытворчасці тканых дываноў. Наступным кардынальным крокам стала ў 2003 годзе мадэрнізацыя вытворчасці прашыўных дывановых пакрыццяў шляхам укаранення новай соплавай тэхналогіі друку «Храмаджэт» па ворсавай паверхні дываноў. Гэта паслужыла стартам для мадэрнізацыі і аднаўлення як абсталявання, так і асартыменту выпускаемай прадукцыі.

На сённяшні дзень прадпрыемства мае сучаснае абсталяванне, якое дае магчымасць канкурыраваць з вядучымі вытворцамі на рынку тканых дывановых вырабаў. У рамках Дзяржаўнай праграмы інавацыйнага развіцця Рэспублікі Беларусь на 2016–2020 гг. паспяхова рэалізаваны інавацыйны праект «Асваенне тэхналогіі вытворчасці поліпрапіленавых нітак» і ў 2019 годзе атрыманы першыя тоны поліпрапіленавай ніткі на новым еўрапейскім абсталяванні. У 2020 годзе ў Брэсце быў створаны філіял «Брэсцкія дываны», што дазволіла не толькі павялічыць вытворчую магутнасць прадпрыемства, а таксама пашырыць асартымент тканай прадукцыі.

Прадпрыемства выпускае шырокі асартымент дывановай прадукцыі: двухпалотныя дываны з поліпрапіленавым ворсам розных якасцяў, у тым ліку Шагі, Супершагі, цыноўкі, дываны з камбінаваным ворсам, дываны са спалучэннем розных відаў перапляценняў ворсавай асновы, дываны з выкарыстаннем у асобных элементах малюнка высокаўсадачнай поліэфірнай ніткі, прашыўныя пакрыцці з петлявым, разразным, рэльефным ворсам з друкаваным малюнкам, пакрыцці з разразным ворсам тыпу «Штучная трава», пакрыцці на гумовай аснове. З 2017 года арганізавана ўласная вытворчасць і пачаўся выпуск кардонных гільз.

Дзейнасць ААТ «Віцебскія дываны» неаднаразова адзначалася дзяржаўнымі ўзнагародамі. Прадпрыемства экспартуе сваю прадукцыю ў Расію, Казахстан, Украіну, Таджыкістан, Малдову, Кыргызстан.

Адрас: Віцебская вобласць, г. Віцебск, вуліца М. Горкага, 75.

ЛІТАРАТУРА

1. Бекиш, Е. И. Значение интеграции маркетинга и логистики в условиях конкуренции / Е. И. Бекиш, О. А. Брагина, Е. Е. Мантур // Право. Экономика. Психология. – 2022. – № 3. – С. 60–64.

2. Богачева, О. Хорошо сделано – хорошо продано! / О. Богачева // Рэспубліка. – 2021. – 19 лістап. – С. 10–11.

3. Бородулин, М. Ровесник века / М. Бородулин, Д. Петров, Г. Рябушев. – Минск : Беларусь, 1969. – 102 с.

4. Бренды родного края. Витебск / отв. за вып. Е. Чаплева // Витебские вести. – 2023. – 10 янв. – С. 8–9.

5. Витебское производственное ковровое объединение / отв. за вып. Н. И. Нестеренко ; ред. Н. В. Рогатнев. – Минск : Полымя, 1988. – 31 с.

6. Віцебскае вытворчае дывановае аб'яднанне імя 50-годдзя БССР = Витебское производственное ковровое объединение имени 50-летия БССР / адказ. за вып. М. А. Тлкачова ; рэд. Н. І. Навумава. – Мінск : Полымя, 1984. – 23 с.

7. Каталог резидентов СЭЗ «Витебск» [Электронный ресурс] / Свободная экономическая зона Витебск. – Режим доступа: http://fez-vitebsk.by/upload/iblock/b23/Residents%20Catalog.pdf. – Дата доступа: 30.05.2023.

8. Крупица, Н. За эмоциями – на завод / Н. Крупица // Віцьбічы = Витьбичи. – 2022. – 18 авг. – С. ІІІ. – (Прил.: «Вечерний Витебск»).

9. Крупица, Н. Новый импульс / Н. Крупица // Віцьбічы = Витьбичи. – 2023. – 21 марта. – С. 6.

10. Любочка, С. С учетом запросов покупателей / С. Любочка // Віцьбічы = Витьбичи. – 2022. – 12 марта. – С. 9.

11. Наумова, А. Ковровая дорожка к успеху / А. Наумова // Рэспубліка. – 2022. – 12 мая. – С. 1, 8.

12. Наумова, А. Лучшие инвестиции в завтра / А. Наумова // СБ. Беларусь сегодня. – 2023. – 12 апр. – С. 1, 7.

13. Петров, Д. И. Работаем по-коммунистически / Д. И. Петров. – Минск : Госиздат БССР, 1961. – 40 с.

14. Петров, Д. И. Работаем по-коммунистически / Д. И. Петров. – 2-е изд., доп. – Минск : Госиздат БССР, 1963. – 37 с. – (Библиотечка новатора).

15. Прищепа, Ю. Городские пейзажи – мягкие и яркие / Ю. Прищепа // Віцьбічы = Витьбичи. – 2023. – 4 марта. – С. 11.

16. Соловьёва, Т. Набирая обороты / Т. Соловьёва // Витебские вести. – 2023. – 5 мая. – С. 6.

17. Федарчук, А. А. Акцыянернае таварыства «Віцебскія дываны» / А. А. Федарчук, М. Л. Цыбульскі // Памяць: Віцебск : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад. А. І. Мацяюн ; мастак Э. Э. Жакевіч. – Мінск : БелЭн, 2003. – Кн. 2. – 459–460.

18. Шамшура, А. В. «Витебские ковры» / А. В. Шамшура // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 197–198.

СПАСЫЛКІ

 Наша марка. Открытое акционерное общество «Витебские ковры»