Чарэйскае, возера. Чашніцкі раён

Подробности

Створана 25.11.2019 11:56

Адноўлена 10.12.2019 14:34

Возера Чарэйскае знаходзіцца ў Чашніцкім раёне Віцебскай вобласці ў 26 км на паўднёвы ўсход ад г. Чашнікі, паміж вёскамі Чарэя, Бярозкі, Белая Царква і Мар'іна і адносіцца да басейна р. Ула (левы прыток р. Заходняя Дзвіна).

Плошча паверхні возера складае 3,38 км². Даўжыня 6,71 км, найбольшая шырыня 1,12 км. Найбольшая глыбіня дасягае 17 м, сярэдняя складае 5,6 м. Аб'ём вады 18,96 млн. м³. Даўжыня берагавой лініі 17,32 км. Плошча вадазбору 16,9 км².

Катлавіна возера лагчыннага тыпу, моцна выцягнутая з поўначы на поўдзень і складаецца з некалькіх плёсаў. Схілы катлавіны вышынёй ад 2 да 18 метраў, сугліністыя. Берагавая лінія моцна звілістая. Берагі нізкія, пясчаныя. Месцамі берагі зліваюцца са схіламі катлавіны, абрывістыя, абразійныя, у паўднёвай частцы сплавінныя. Літаральная зона спадзістая, шырынёй да 100 м, выслана глінай, пясчанымі і пясчана-глеістымі адкладамі. Глыбей дно возера глеістае. У сярэдзіне возера знаходзіцца востраў плошчай 0,02 га.

Возера эўтрофнае, праточнае. Злучана пратокай з азёрамі Галаўня і Чамярыца. У Чарэйскае возера ўпадаюць больш за 10 ручаёў і каналаў, выцякае ручай у возера Родамля.

Прыбярэжная надводная расліннасць пашыраецца да глыбіні 2,5 м і на адлегласці да 50 м ад берага. Падводная расліннасць пашыраецца да глыбіні 4 м.

У возеры водзяцца шчупак, лешч, гусцяра, краснапёрка, плотка, акунь і іншыя віды рыб.

ЛІТАРАТУРА

1. Чарэйскае возера // Блакітная кніга Беларусі (водныя аб'екты Беларусі) : энцыклапедыя / рэдкал.: Н. А. Дзісько [і інш.]. – Мінск: БелЭн імя П. Броўкі, 1994. – С. 396.

2. Чарэйскае возера // Блакітны скарб Беларусі : энцыклапедыя / рэдкал.: Г. П. Пашкоў [і інш.] ; маст.: Ю. А. Тарэеў, У. І. Цярэнцьеў. – Мінск : БелЭн, 2007. – С. 455.