Звонь, возера. Ушацкі раён

Подробности

Створана 11.05.2020 11:56

Адноўлена 11.05.2020 09:32

Возера Звонь (Званское возера) знаходзіцца ў басейне р. Ушача, за 12 км на поўдзень ад г. п. Ушачы, каля в. Звонь.

Плошча 1,46 км². Найбольшая глыбіня 17,9 м. Даўжыня 2,1 км. Аб'ём вады 17,4 млн. м³. Даўжыня берагавой лініі 7,04 км, утварае шэраг заліваў (найбуйнейшыя ў паўночна-ўсходняй частцы). Плошча вадазбору 17,4 км².

Катлавіна складанага тыпу, лопасцевай формы, выцягнутая з паўднёвага захаду на паўночны ўсход. Схілы катлавіны вышынёй да 5–9 м (на паўночным усходзе 20–25 м), спадзістыя, пясчаныя і супясчаныя, на паўночным усходзе суглінкавыя, пераважна разараныя, на поўдні і захадзе парослыя лесам. Берагі нізкія, пясчаныя і пясчана-галечныя, часткова пад хмызняком. Дно да глыбіні 3,5–4 м выслана пяском, глыбей – гліністым ілам і сапрапелем (на паўночным усходзе і ўсходзе). Шырыня прыбярэжнай паласы зарастання да 35 м, пашырана да глыбіні 2,5 м. Па падоўжанай восі возера трыма астравамі (агульная плошча 4,2 га) катлавіна падзяляецца на глыбакаводную паўночна-заходнюю і мелкаводную паўднёва-ўсходнюю часткі. Водзяцца акунь, плотка, ёрш, карась залаты, язь, шчупак, лешч, судак, лінь. На поўдні ўпадае ў р. Зуйніца, на поўначы выцякае ручай у воз. Вялікае Існа. Адзначаны паселішчы баброў.

Уваходзіць у зону курорта рэспубліканскага значэння «Ушачы».

ЛІТАРАТУРА

1. Звонь // Блакітны скарб Беларусі : энцыклапедыя / рэдкал.: Г. П. Пашкоў [і інш.] ; маст.: Ю. А. Тарэеў, У. І. Цярэнцьеў. – Мінск : БелЭн, 2007. – С. 203.

2. Звонь // Природа Беларуси : энциклопедия : в 3 т. / редкол.: Т. В. Белова [и др.]. – Минск : БелЭн імя П. Броўкі, 2009. – Т. 2 : Климат и вода. – С. 193.

3. Звонь // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 452–453.

4. Ушачская группа // География озер Белоруссии / О. Ф. Якушко ; под ред. В. Г. Завриева. – Минск : Вышэйшая школа, 1967. – С. 126–136.