Народны клуб «Майстры». Пастаўскі раён, г. Паставы

Подробности

Створана 17.05.2017 12:23

Адноўлена 04.03.2019 15:46

Створаны ў 1991 г. у г. Паставы пры раённым арганізацыйна-метадычным цэнтры, з 2004 г. дзейнічае пры Доме рамёстваў. У 1994 г. прысвоена званне «Народны аматарскі калектыў».

Кіраўнікі – І. К. Атрахімовіч (з 1991), А. А. Касенка (з 2014).

У складзе калектыву 69 чалавек ва ўзросце ад 18 да 76 гадоў. Гэта – таленавітыя людзі, якія працуюць у розных жанрах: ручная вышыўка, габелен, разьба па дрэве, вязанне кручком, фрывалітэ, ласкутная мазаіка, жывапіс.

Асноўныя накірункі дзейнасці – эстэтычнае выхаванне насельніцтва з дапамогай прапаганды лепшых узораў народнай творчасці і выяўленчага мастацтва; стварэнне ўмоў для натуральнага існавання і развіцця традыцый, розных відаў народных промыслаў і саматужных тэхналогій; перадача сакрэтаў рамяства носьбітамі рамесніцкіх традыцый; адраджэнне рэдкіх і забытых кірункаў творчасці.

Працуюць гурткі лоза- і саломапляцення, майстры працуюць над вырабамі з керамікі, лёну, займаюцца жывапісам, маляванкай, ручной вышыўкай, народнымі цацкамі, габеленам, кавальствам.

Калектыў – удзельнік міжнародных фестываляў: народнай музыкі «Звіняць цымбалы і гармонік» (Паставы), мастацтваў «Славянскі базар у Віцебску» (Віцебск), традыцыйнай культуры «Браслаўскія зарніцы» (Браслаў), абласных выставак: вязання «Карункі зімы», роспісу «Краскі Паазер'я», «Ратуша» (Віцебск, 2014), а таксама выстаўкі лялек у Нацыянальным гісторыка-культурным музеі-запаведніку «Нясвіж» (Нясвіж, 2014) і інш.

Пастаянна выстаўляюць свае цудоўныя гліняныя цацкі, упрыгажэнні, свісцёлкі, графіку С. У. і Л .Э. Шчэрбы. А. А. Анкудовіч – пачынальнік пляцення кветак і дробных упрыгажэнняў з саломкі. Вырабы каваля Ю. А. Фурса ўпрыгожваюць не толькі фасады дамоў у Паставах, але ёсць і ў многіх замежных краінах. Зачароўваюць прыгажосцю цудоўныя вырабы прафесійнага рэзчыка па дрэве, пераможцы абласных і рэспубліканскіх конкурсаў рэзчыкаў В. А. Мельца. Выдатны рэзчык па дрэве В. М. Шамшура.

Заўсёды ў творчым пошуку знаходзяцца вышывальшчыцы М. І. Ананьева і Л. Р. Зарэцкая, майстры: па габелене – Ж. В. Глабенка, Н. В. Акулава, А. А. Шыман, лозапляценні – М. І. Аўгусціновіч, А. В. Дробышава, кераміцы – В. М. Гукава, мастакі І. Протас, І. І. Гарбуноў, І. К. Атрахімовіч і многія іншыя майстры.

Народны клуб «Майстры» мае свой салон-магазін, дзе кожны жадаючы можа купіць самабытныя рэчы – прадметы хатняга ўжытку, аўтарскія цацкі, вышыўкі, карціны, выкананыя мясцовымі майстрамі.

Адрас: Віцебская вобласць, Пастаўскі раён, г. Паставы, вуліца Чырвонаармейская, д. 10.

ЛІТАРАТУРА

1. Давідовіч, В. В. Пастаўскі народны клуб «Майстры» / В. В. Давідовіч // Культура Беларусі : энцыклапедыя : [у 6 т.] / рэдкал.: У. У. Андрыевіч [і інш.]. – Мінск : БелЭн імя П. Броўкі, 2015. – Т. 6 : М–Я. – С. 142–143.

2. Ивченко, Л. Мария – искусница из Постав / Л. Ивченко // Віцебскі рабочы. – 2010. – 15 апр. – С. 22.

3. Клуб народных умельцаў «Майстры» // Памяць: Пастаўскі раён : гісторыка-дакументальныя хронікі гарадоў і раёнаў Беларусі / рэдкал.: Г. К. Кісялёў [і інш.] ; уклад.: К. І. Козак, А. І. Кузняцоў ; рэд.-склад. Г. К. Кісялёў ; мастак Э. Э. Жакевіч. – Мінск : Белта, 2001. – С. 570–571.

4. Петух, Т. Горад майстроў – на цэнтральнай плошчы / Т. Петух // Пастаўскi край. – 2007. – 26 мая. – С. 4.