
Азбука закона для маленькіх: віцебскія школьнікі далі старт праекту «Правазнайка»
- Details
- Створана 21.10.2026 14:17
Першае знаёмства з прававым праектам «Правазнайка» для вучняў 2 «А» класа сярэдняй школы № 2 імя Ф. Ц. Блахіна адбылося 19 кастрычніка ў бібліятэцы.
У лёгкай і займальнай форме супрацоўнікі аддзела прававой інфармацыі і электронных рэсурсаў расказалі дзецям пра сур'ёзныя і важныя рэчы. Другакласнікі даведаліся, што ў кожнага чалавека з самага нараджэння ёсць нябачны, але вельмі каштоўны багаж – яго асабістыя правы, сярод якіх права на жыццё, імя, сям'ю, вучобу і адпачынак.
Каб замацаваць новыя веды, рабяты ўключыліся ў пазнавальна-гульнявую дзейнасць: дружна склалі дэвіз праекта, а таксама пазнаёміліся з яго афіцыйнай эмблемай – савой, якая сімвалізуе веды і мудрасць.
Гульнявы фармат заняткаў дазволіў данесці да другакласнікаў сур'ёзныя тэмы проста, зразумела і па-сапраўднаму захапляльна. Наперадзе ўдзельнікаў праекта «Правазнайка» чакае яшчэ шмат карысных тэматычных сустрэч і займальных адкрыццяў у свеце права.


































