Бібліятэка УА «Віцебская ордэна “Знак Пашаны” дзяржаўная акадэмія ветэрынарнай медыцыны». г. Віцебск
- Подробности
- Створана 22.03.2021 08:40
- Адноўлена 22.03.2021 08:45
Гісторыя бібліятэкі цесна звязана з гісторыяй навучальнай установы, якая пачалася ў далёкім 1924 годзе. Прыказам № 1 ад 10 кастрычніка 1924 года была арганізавана бібліятэка Віцебскай акадэміі ветэрынарнай медыцыны.
У аснову першапачатковага бібліятэчнага фонду ўвайшлі кнігі бібліятэкі Вышэйшага сельскагаспадарчага тэхнікума – каля 2000 асобнікаў літаратуры. Бібліятэка абслугоўвала 137 студэнтаў і выкладчыкаў. Значна павялічыўся кніжны фонд пасля аб'яднання Магілёўскага інстытута свінагадоўлі і Віцебскага ветэрынарнага інстытута.
Падчас Вялікай Айчыннай вайны фонды бібліятэкі былі значна пашкоджаны і разрабаваны.
Пасля вызвалення горада ад нямецка-фашысцкіх захопнікаў пачалося аднаўленне бібліятэкі. Толькі дзякуючы намаганням адданых сваёй справе бібліятэкараў, было знойдзена каля 11 тыс. кніг і іншых выданняў са штампам бібліятэкі ветэрынарнага інстытута, якія былі раскіданы па розных кутках горада. З кожным годам колькасць чытачоў хутка расла, адчуваўся востры недахоп літаратуры. Бібліятэчныя работнікі звярнуліся да супрацоўнікаў іншых бібліятэк сельскагаспадарчых ВНУ краіны і прыватных асоб, ад якіх атрымалі ў дар вялікую колькасць выданняў (каля 4500 экз.). Камплектаванне фонду бібліятэкі вялося з улікам профіля навучальнай установы, для гэтага выкарыстоўваліся розныя крыніцы: кнігаабменныя фонды, бібліятэчны калектар, падпіска на перыядычныя выданні, якая павялічвалася з кожным годам і інш.
Пачала фарміравацца і структура бібліятэкі. У 1957 годзе бібліятэка атрымала дадатковае памяшканне для фундаментальнай бібліятэкі з кнігасховішчам (вуліца Леніна 46/1) і чытальную залу. У галоўным корпусе інстытута засталася вучэбная бібліятэка з чытальнай залай. З цягам часу змянілася і сістэма абслугоўвання чытачоў – гэта ўжо былі абанементы вучэбнай, навуковай і мастацкай літаратуры, чытальныя залы, даведачна-інфармацыйны аддзел, аддзел камплектавання.
У 1974 годзе, у год 50-годдзя з дня заснавання, бібліятэка пераехала ў новы тыпавы будынак. У 1993 годзе пачалося актыўнае ўкараненне аўтаматызаваных працэсаў у работу бібліятэкі. У 1995 годзе бібліятэка атрымала аўтаматызаваную бібліятэчна-інфармацыйную праграму МАРК, новыя паступленні пачалі ўносіцца ў базу з мэтай фарміравання электроннага каталога. Чытачы бібліятэкі атрымалі магчымасць працаваць з электроннымі базамі дадзеных. У 2010 годзе ў бібліятэцы была арганізавана зала інфармацыйных рэсурсаў. У 2012 годзе быў распрацаваны афіцыйны сайт бібліятэкі.
Сёння бібліятэка УА «Віцебская ордэна "Знак Пашаны" дзяржаўная акадэмія ветэрынарнай медыцыны» – адно з найважнейшых структурных падраздзяленняў акадэміі, на якое ўскладзены задачы інфармацыйнага забеспячэння навучальнага і навуковага працэсаў.
У структуру бібліятэкі ўваходзяць: аддзел абслугоўвання, аддзел камплектавання і каталагізацыі, даведачна-інфармацыйны аддзел, бібліятэкі Пінскага і Рэчыцкага філіялаў, бібліятэка аграрнага каледжа акадэміі.
Велізарную каштоўнасць уяўляе рэдкі фонд бібліятэкі, які налічвае 7000 экз. і ўключае фундаментальныя манаграфіі, даведачна-энцыклапедычныя выданні, падручнікі і навучальныя дапаможнікі, дысертацыі, працы сельскагаспадарчых інстытутаў, вопытных станцый, навуковых таварыстваў, земскіх устаноў і інш. Храналагічны ахоп фонду: 1834–1945 гг. Значная частка рэдкага фонду – гэта дарэвалюцыйныя часопісы па сельскай гаспадарцы і ветэрынарыі: «Ветэрынарная справа», «Ветэрынарны веснік», «Лясны часопіс» і інш.
У бібліятэцы створана адзінае інфармацыйнае асяроддзе, якое дазваляе ажыццяўляць пошук інфармацыі ад бібліяграфічнага апісання да першакрыніцы, як самастойна, так і з дапамогай спецыялістаў даведачна-інфармацыйнага аддзела.
Для абслугоўвання карыстальнікаў выкарыстоўваюцца разнастайныя інфармацыйна-бібліяграфічныя рэсурсы, як традыцыйныя – картачныя каталогі, фонды рэфератыўных часопісаў і іншай даведачна-інфармацыйнай літаратуры, так і новыя, якія заснаваны на электронных тэхналогіях. Супрацоўнікамі бібліятэкі ствараюцца біябібліяграфічныя паказальнікі вучоных акадэміі і вядуцца іх персанальныя старонкі на афіцыйным сайце акадэміі.
Важным напрамкам у дзейнасці бібліятэкі з'яўляецца культурна-асветніцкая (выхаваўчая) работа. Бібліятэка арганізоўвае сустрэчы з пісьменнікамі, праводзіць агляды, экскурсіі. Бібліятэка імкнецца развіваць і падтрымліваць цікавасць да кнігі і чытання: раскрывае свае фонды на выставах, тэматычных аглядах. Для аспірантаў і магістрантаў праводзяцца кансультацыі-трэнінгі, дзе яны вучацца шукаць інфармацыю па электронных рэсурсах. Вядзецца тэматычная папка электронных адрасоў баз дадзеных ветэрынарнай і сельскагаспадарчай тэматыкі ў дапамогу навуковым супрацоўнікам, аспірантам, магістрантам, студэнтам.
Штогод бібліятэка абслугоўвае больш за 13 тыс. чытачоў, фонд бібліятэкі налічвае больш за 800 тыс. экз., а кнігавыдача складае больш за 700 тыс. экз.
Дырэктар бібліятэкі – Карнійчанка Наталля Віктараўна.
Адрас: Віцебская вобласць, г. Віцебск, 1-я вуліца Даватара, д. 7/11.
  
|
ЛІТАРАТУРА
1. Белотелова, Л. Не забываем прошлого, думаем о будущем, живем настоящим: к 90-летию библиотеки Витебской государственной академии ветеринарной медицины / Л. Белотелова, Н. Корнийченко // Бібліятэчны свет. – 2014. – № 5. – С. 30–32.
2. Библиотека: с чего все начиналось... // Вестник Академии ветеринарной медицины. – 2019. – № 1 (март). – С. 3.
3. Волкова, Л. Диссертация о золотой рыбке и «отравители» с городской бойни / Л. Волкова // Віцьбічы = Витьбичи. – 2012. – 31 мая. – С. III. – (Прил.: Вечерний Витебск).
4. Залесская, С. «Наш фонд поистине уникален», – считает директор библиотеки УО «ВГАВМ» / С. Залесская ; беседовала Л. Белотелова // Віцебскі рабочы. – 2012. – 20 сак. – С. 6.
5. Ятусевич, А. И. Итоги и задачи [УО «Витебская ордена "Знак Почёта" государственная академия ветеринарной медицины»] / А. И. Ятусевич // Вестник Академии ветеринарной медицины. – 2016. – № 1 (февр.). – С. 1.
СПАСЫЛКІ
