Браслаўская града. Браслаўскі раён

Подробности

Створана 31.03.2017 07:26

Адноўлена 27.04.2017 12:56

Браслаўская града, Браслаўскае ўзвышша знаходзіцца на крайнім паўночным захадзе Беларусі, займае большую частку Браслаўскага і частку Міёрскага раёнаў Віцебскай вобласці. Некаторыя даследчыкі лічаць яе часткай Беларускага Паазер'я. На поўначы града абмежавана далінай Заходняй Дзвіны, на ўсходзе і поўдні – Полацкай нізінай. Працягнулася з захаду на ўсход на 66 км, з поўначы на поўдзень – амаль на 60 км, плошча 1,9 тыс. км². Найбольшая вышыня 210 м над узроўнем мора каля в. Слабодка. Града канчаткова аформілася ў час браслаўскага прыпынку (стадыялу) паазерскага ледавіка. У рэльефе вылучаюцца дугападобныя грады, паміж якімі паніжэнні і невялікія азёры. Трапляюцца шматлікія озавыя і камавыя ўзгоркі. Карысныя выкапні: керамічная сыравіна, пясчана-жвіровы матэрыял, торф. Рэкі належаць да басейна Заходняй Дзвіны, найбольшая – Друйка, якая працякае праз некалькі азёр. Пад азёрамі каля 10% тэрыторыі, большасць з іх належыць да Браслаўскай групы азёр. Разарана каля 60%, пад лесам і хмызняком каля 20% тэрыторыі. Браслаўская града вызначаецца маляўнічасцю краявідаў, асабліва там, дзе аблесеныя ўзгоркі спалучаюцца з азёрнымі плёсамі. У межах грады знаходзіцца Міжазёрны ландшафтны заказнік, зоны адпачынку, санаторыі, дамы адпачынку, турбаза.

ЛІТАРАТУРА

1. Браславская краевая ледниковая возвышенность // Физическая география Витебской области : учебное пособие / М. Ю. Бобрик [и др.]. – Витебск, 2004. – С. 53–54.

2. Браслаўская града, Браслаўскае ўзвышша // Беларуская энцыклапедыя : у 18 т. / рэдкал. Г. П. Пашкоў [і інш.]. – Мн., 1996. – Т. 3. – С. 246.

3. Пилецкий, И. В. Браславская гряда / И. В. Пилецкий // География Витебской области : учебное пособие. – 2-е изд., испр. – Витебск, 2001. – С. 158.