Музей баявой славы, ДУА «Бабінавічская яслі-сад базавая школа». Лёзненскі раён, аг. Бабінавічы

Подробности

Створана 10.12.2019 12:23

Адноўлена 30.03.2020 11:06

Музей баявой славы быў заснаваны ў 1965 годзе настаўніцай гісторыі і геаграфіі Галінай Аляксандраўнай Цімчанка.

Музей складаецца з чатырох раздзелаў: «Археалагічны» і «Гістарычны», дзе сабраны матэрыялы пра стаянкі першабытных людзей, прадстаўлены дакументы Цэнтральнага дзяржаўнага гістарычнага архіва Беларусі аб першым згадванні пра населены пункт Бабінавічы, каменныя элементы працы і побыту, грашовыя папяровыя і металічныя знакі III–IV тыс. да нашай эры і іншае; «Народныя рамёствы», бо бабінавіцкія вырабы з гліны былі знакамітыя яшчэ да рэвалюцыі нават у Пецярбургу; «Баявой славы» – самы шматлікі і ўключае ў сябе наступныя экспазіцыі: «Партызанскі рух Лёзненшчыны», «Землякі – удзельнікі Вялікай Айчыннай вайны», «Наступальная аперацыя «Баграціён», «Баявы шлях 152-га ўмацаванага раёна», «Ціхмянаўская вышыня». Таксама ў фондах музея захоўваюцца матэрыялы па гісторыі мясцовай адукацыі, пра піянераў-герояў, падарункі гасцей-ветэранаў.

Музей баявой славы больш за паўстагоддзя з'яўляецца цэнтрам ваенна-патрыятычнага выхавання моладзі, прывівае падрастаючаму пакаленню любоў да роднага краю, жаданне вывучаць гістарычнае мінулае сваёй малой радзімы. У музеі праходзяць урокі мужнасці, мітынгі, навучальныя лекцыі і інш. Музей цесна супрацоўнічае з раённым ваенна-гістарычным музеем, саветамі ветэранаў 99-й цяжкай гаўбічнай артылерыйскай брыгады, 152-га Чырванасцяжнага ўмацаванага раёна, пошукавым клубам «Выток» г. Іскра Маскоўскай вобласці, вайскоўцамі 52-га асобнага спецыяльнага пошукавага батальёна Міністэрства абароны Рэспублікі Беларусь, якія вялі пошукавыя работы на тэрыторыі сельсавета летам 2009 года.

У 2015 годзе музею баявой славы Бабінавіцкай дзіцячага сада–базавай школы было прысвоена званне народнага.

У сувязі з рэарганізацыяй установы адукацыі са жніўня 2017 года музей перастаў працаваць. Але 1 снежня таго ж года зноў гасцінна расчыніў свае дзверы для наведвальнікаў. Зараз музей дзейнічае ў складзе бібліятэкі-музея ў аг. Бабінавічы. А памяшканне для фондаў музея было прадастаўлена Бабінавіцкім сельскім саветам.

Кіраўнік музея – Багдановіч Дзіна Анатольеўна.

ЛІТАРАТУРА

1. Бирюлькова, Л. Бабиновичский музей снова принимает посетителей / Л. Бирюлькова // Сцяг Перамогі (Лёзна). – 2017. – 5 снеж. – С. 6.

2. Вишневская, Е. «125 блокадных грамм с огнём и кровью пополам...» / Е. Вишневская // Сцяг Перамогі (Лёзна). – 2019. – 1 лют. – С. 6.

3. Шпаковская, Г. Через годы, через расстояния / Г. Шпаковская // Витебские вести. – 2015. – 5 мая. – С. 6.

4. Экскурсия «Непокорённая высота» // Сцяг Перамогі (Лёзна). – 2018. – 18 снеж. – С. 7.